BB與小魔怪

記得10幾年前係寵物店買BB番屋企的時候，已經覺得BB好似小魔怪，當時買番黎3個月大，細細隻同小魔怪真係好似樣，雖然時間已經過左十幾年，但依然覺得好似，所以袁生每次係街見到有小魔怪的公仔，或者玩具，總知似BB既都會買番屋企

袁生前幾日去旺角攞模型，經過商場精品店，見到有呢隻小魔怪，就買左番屋企，袁太放工番到屋企就見到隻公仔，就拿拿臨將小魔怪同BB黎番張合照，我同袁生就覺得BB仲好似小魔怪喇

唔知大家又覺得似唔似呢 ???

冰皮月餅 <附免煮冰皮粉,特級冰皮粉兩款食譜>，<另有狗狗月餅食譜>

又快到中秋節，過往中秋節都係出去買月餅食，今年就第一次操刀自己自製冰皮月餅，其實初初冇諗過自己整，事緣係某一日去寵物店訂月餅俾BB，點知到應該攞貨的日子都仲未打黎，都唔知有冇攪錯，不過好彩訂個時未俾錢

就係因為咁既原因，所以就決定自家製，其實最主要都係整俾BB食，到假期的時候，就同袁生去二德惠買材料，嘩...個日真係好鬼死多人，原來真係好多人自己買材料整月餅，去到

見到有兩款冰皮粉，都唔知應該買邊隻，袁生就提議每款買一包試下，另外仲要買埋其他材料，例如月餅模，餡料等等 ...

袁生就選擇左綠茶餡，我就例牌蛋黃綠豆蓉，仲有BB個份，餡料就選擇左紫心蕃薯加南瓜，
星期六夜晚食完飯就開始整，整的時間都唔係太長，不過整完都要放係冰箱雪一晚先可以 !

BB~11歲狗狗生日蛋糕 <附南瓜夾心乳酪蛋糕食譜>

9月21日係我家寶貝BB的生日，今年11歲，上年仲記得整左蛋白蛋糕俾BB，咁今年整咩蛋糕好呢 ???

又係時候睇下書或者上網search下有關資料，發覺原來好多狗狗蛋糕多數都係用藍莓做材料，咁我就一於都用藍莓，除左用藍莓外，梗係唔少得南瓜同乳酪，仲有BB最鐘意的狗餅乾，袁太一路整，BB就一直係旁邊睇住我整，好似知我一定係整俾佢

整完之後當然要影相先

袁太一直都影得唔滿意，旁邊的BB終於忍唔住吠左一聲，袁太只好講~得喇，影多幾張得喇，等多陣喇，乖~

 

拿拿臨影埋就切俾BB食，不過都係切一小件，因為驚食得多個肚仔會唔舒服，始終年紀都大，唉 ... 不過BB就係咁，食野真係好鬼急，話過佢好多次都係咁，不過見到BB食得咁滋味，唔駛問個蛋糕一定好好好食 !

西環@德記潮州菜館

星期日袁生袁太番西環搵奶奶，順便就一齊食野，去西環例牌都係去德記開餐，所以今次都唔例外，叫既食物都係個幾款，蠔餅同胡椒豬肚湯就一定要叫既，呢兩款真係好好味，簡直食極都唔厭

除左有蠔餅同豬肚湯外，當然仲要有菜有魚，仲有炒飯，~呀~仲有一道超好味的薑蔥炒蟹，食左咁多野都唔駛七百蚊，雖然呢間菜館係好好味，但始終西環太遠，所以一般都係去西環搵奶奶先會去食，不過到時有地鐡，我相信應該會成日去 !

好滿足的一餐 !

簡簡單單的魚湯浸菜心 !

家鄉炸蠔餅，味道一流 !

薑蔥炒蟹，味道都一流 !

唔記得咩炒飯，都係簡簡單單用火腿，蝦仁，芥蘭，蛋絲炒埋一碟 !

好極胡椒味的胡椒豬肚湯，飲過咁多間，始終都係呢間最正 !

牛蒡栗子無花果瘦肉湯 <附食譜>

身體好番少少，又係時候煲啖湯俾袁生飲，由於袁生膝頭哥偶然會痛的關係，所以袁太一個星期一定會煲一次牛蒡或者土伏岑湯俾佢飲，因為袁生話飲完之後，真係冇咁痛，如果大家都有親戚或朋友都有腳痛問題，可以煲下牛蒡湯或者土伏岑湯

所以又因為袁生呢幾日又話隻腳有少許痛，所以又去買左條牛蒡煲湯，又見呢幾日夜晚涼涼地，又去買左無花果，用無花果煲湯好滋潤，再加埋我至愛的栗子，唔駛諗，煲湯一定會好清甜滋潤

袁太煲多左份量，袁生居然好乖同我飲左三大碗咁多，真係抵錫 !

 

旺角@D.I.F CAFE

呢間D.I.F CAFE好耐之前食過幾次，不過多數都係下午茶時間去，大約一個星期前，袁太未病的時候，同袁生去旺角行街街，行到咁上下袁生問我想食咩 ???

初初諗住去西門町食野，但經過D.I.F CAFE見唔係好多人，所以就決定轉地方，入去D.I.F食野，D.I.F內裡環境太美，有好多水晶燈，好多畫，仲有服務員態度都好好，所以大家得閒都去食下喇 !

煙三文魚芝士酥餅(唔記得係咪咁既名)，我覺得味道唔錯，但如果唔太鐘意生洋蔥味道的朋友，就唔太適合 ，因為生洋蔥味道都幾勁 !

 

袁生的牛柳扒餐，仲有忌廉湯同埋熱辣辣的蒜蓉包 !

傻下傻下的袁生

超好食的鮮茄焗豬扒飯，有好多芝士，熱辣辣，香噴噴的芝士味實在太好味 !

不過都幾大碟，一個人實在食唔晒，分少少俾袁生

 

 

袁生的凍檸茶，袁太的鮮橙什飲

 

 

 CAFE環境好美

走的時候影埋門口廚窗的食物先

金菇牛肉卷拌魚湯銀針粉 <附食譜>

袁太因為呢幾日唔舒服，又去左睇醫生，食完藥呆下呆下，都有幾日冇upload blog，所以一食完藥，又係時間清一清食譜，如果再唔upload的話，我驚大家會唔記得左我>_<

因為食藥的關係，攪到個人傻下傻下，睇醫生的時候，袁太梗係叫醫生寫假紙俾我，所以星期六就請假冇番工，係屋企休息休息，平時袁太休息的時候，一定會早起身去買早餐，但食左藥實在太疲倦，所以就訓晏d，但訓醒都要食野架，唔食野又點食藥呢 ???

但又唔想落街，好彩雪櫃咩都有，有肥牛，有銀針粉，有蟹柳，有金菇，仲有粟米粒，有咁多材料，整咩都得，就決定整個金菇牛肉卷，魚湯銀針粉，不過今次唔係袁太整，而係袁生整

袁生話費時袁太係廚房煮煮下暈左，其實我知佢係唔想我咁辛苦煮野，同佢一齊咁多年，點會唔知佢諗咩呢，咁好喇，就等袁生煮，不過我都有係旁邊睇住佢煮，費時佢攪到個廚房唔知變成點，袁生煮左大約30分鐘，終於有得食，雖然食左藥口淡淡咁，但袁生煮的食物當然係好味 !

日式晚餐 <附茶碗蒸 , 三文魚拌飯 , 三文魚頭蘿蔔湯食譜>

今晚突然好想食三文魚同蒸蛋，但又唔知煮咩好，其實可以煮個日式晚餐，不過例牌動作都要問過袁生先得，又係時候whatapps下佢，袁生話咁快就覆，而答案梗係冇問題，仲好似好開心添

可能袁生平時鐘意食日本菜的關係，咁袁太想食三文魚同蒸蛋，究竟點整好呢 ???

過左一陣，終於決定到，三文魚就整拌飯，蛋就整茶碗蒸，另外再煮多個三文魚頭湯，簡簡單單的日式晚餐好快咁就完成

個茶碗蒸滑嘟嘟，袁生都不知幾鐘意，三文魚拌飯就更加好味，另外三文魚頭湯又香，不過袁生就唔太好三文魚頭，所以個三文魚頭就落左係袁太口中，因為平時我都好鐘意食魚頭，
整體上，袁生對今餐日式晚餐的評價都相當之高，仲叫袁太下次整個海膽茶碗蒸俾佢食 !

竹庶矛根馬蹄水 <附食譜>

炎炎夏日的天熱，大家係咪飲左好多汽水同埋食雪糕，雪條解暑呢 ???

其實除左飲汽水，食凍野外，得閒就應該煲d清熱的飲品嘆下，所以今次袁太就選擇煲呢個竹庶矛根水，何況袁生食咁多煙，煲俾佢飲就最好不過，雖然竹庶水周圍都有得賣，但始終都係自己親手煲最好

煲左兩小時，放入雪櫃等袁生每日放工番到屋企就飲一杯，真係清晒熱氣

嫁左人的女人梗係要無時無刻為老公身體打好基礎，所以我成日都同袁生講，娶左個鐘意入廚的老婆，簡直行運都咩咁，仲好過中六合彩 !

宵夜自助餐@尖沙咀金域假日酒店

自從前年去金域假日酒店食過宵夜buffet之後，我同袁生都愛上了，一來價錢唔貴，二來食物都算多，所以每次我地一想食buffet，都會選擇呢間酒店，多數都係食宵夜時段，大家唔好以為宵夜一定好易book位喎，如果選擇星期五，六，日食的話，一定要早幾日book先得，如果唔係一定full晒

今次宵夜時段buffet依然好多野食，最緊要梗係有袁太至愛的生蠔，袁生至愛的魚生，其實呢間酒店仲有一樣野係好吸引袁太架，就係甜品類，甜品款式都算多，仲要每款都好好味，次次去親袁太都食好多甜品落肚，袁生仲話，如果袁太再係咁食法，遲早會變肥婆

超 ... 我食極都唔肥既，你吹得我脹咩，哈 ...

果醬pancake簡直超好味

焗海鮮枇同燕窩椰汁布甸味道都好好

 袁太至愛生蠔~Yummy~

 袁生至愛魚生同壽司

鮮榨橙汁，任飲唔嬲，我都唔知飲左幾多杯

 

 仲有好多食物

 

反而呢個竹笙海皇羹就麻麻地

我至愛的甜品，睇下有幾多

仲有我至愛的窩夫

食到尾段，梗係要食番d生果消下滯

 

埋單前，仲要食番杯雪糕，嘩 ...好飽呀 !