椰子圓肉栗子雞湯

呢幾日天氣寒冷 , 無論在家或街外都感覺凍冰冰 , 呢幾日同袁生都打左好多邊爐餐 , 之前講過 , 天氣寒冷的時候 , 除打邊爐外 , 有味飯同雞湯都可以好暖胃 , 有味飯早前就已經同大家分享左 , 今次就同大家分享雞湯的食譜 ......



秋冬季或寒冷天氣對我來說 , 煲椰子湯係一個唔錯的選擇 , 夠滋潤 , 不過講開椰子湯 , 真係好耐好耐冇煲過 , 事關袁生本身唔太喜愛比較甜的湯水 



如用椰子煲湯的話 , 我會比較喜歡配搭雞 , 以前的我會用竹絲雞 , 但現在的我會用雞殼+雞腳煲 , 用雞胸殼感覺會清甜d , 而且我仲加入栗子 , 圓肉同煲 , 栗子令湯的味道可以變得濃郁 , 圓肉就令湯都可以變得甜甜地又潤潤地 , 當湯煲好的時候 , 袁太試味 , 湯水有好香濃的雞味 , 亦有椰子同圓肉的甜味 , 起初仲驚袁生唔鐘意飲 , 不過飲左一碗又冇咩野講 , 仲自然地叫我添加一碗呢 ^^



材料 : 椰子 , 圓肉 , 栗子 , 雞殼 , 雞腳 , 薑 , 蜜棗 , 鹽 , 冰水

雞殼剪成幾件 , 雞腳剪去甲 , 用水沖一沖洗後放入水中蓋上蓋用中火出水5分鐘 , 盛起沖一沖洗及瀝乾 , 雞腳放入大碗內加入冰水浸過面靜待30分鐘

薑去皮切絲 , 椰子切成片 , 用水沖一沖洗及瀝乾 , 栗子放入水中蓋上蓋用中火煮5分鐘 , 盛起趁熱去殼 , 用水沖一沖洗栗子肉

先用少許油爆香雞殼 , 逐一加入栗子肉 , 圓肉 , 薑絲 , 蜜棗及適量水拌勻 , 用中火煲滾 , 待滾期間將浸30分鐘的雞腳倒去水份 , 再瀝乾

滾後加入雞腳及椰子拌勻再煲滾 , 繼續用中火煲30分鐘 , 再蓋上蓋轉慢火煲1 1/2小時 , 最後加少許鹽調味拌勻轉用大火再煲滾 , 熄火焗30分鐘即可

材料
椰子1/2個 , 圓肉 , 栗子1/2磅 , 雞殼1個 , 雞腳5隻 , 薑 , 蜜棗2粒 , 鹽 , 冰水



做法
1. 雞殼剪成幾件 , 雞腳剪去甲 , 用水沖一沖洗後放入水中蓋上蓋用中火出水5分鐘

2. 盛起沖一沖洗及瀝乾

3. 雞腳放入大碗內加入冰水浸過面靜待30分鐘

4. 薑去皮切絲 , 椰子切成片 , 用水沖一沖洗及瀝乾

5. 栗子放入水中蓋上蓋用中火煮5分鐘 , 盛起趁熱去殼 , 用水沖一沖洗栗子肉

6. 先用少許油爆香雞殼

7. 逐一加入栗子肉 , 圓肉 , 薑絲 , 蜜棗及適量水拌勻 , 用中火煲滾

8. 待滾期間將浸30分鐘的雞腳倒去水份 , 再瀝乾  

9. 滾後加入雞腳及椰子拌勻再煲滾 , 繼續用中火煲30分鐘 , 再蓋上蓋轉慢火煲1 1/2小時

10. 最後加少許鹽調味拌勻轉用大火再煲滾 , 熄火焗30分鐘即可 




咁寒冷的天氣 , 飲碗熱辣辣的雞湯真係好暖胃 , 袁生都飲左三碗咁多 , 雞腳沾豉油食仲好鬼正呢 ^^