2017年1月1日 星期日

紅棗雪耳圓肉雞蛋茶




咁多位~Happy New Year~ , 大家昨晚有冇出街或在家睇電視倒數 ??? 袁太基本上年年都會盡量等到12點先訓 , 不過今年就唔覺意十點幾訓左 , 袁生個衰人又唔叫我起身 , 到我醒的時候已經係2017年1月1日的凌晨時份 ~哼~ ......



最近天氣都涼涼地 , 每朝訓醒喉嚨又乾又痛 , 頭又有少少痛的感覺 , 袁生例牌都係個句 , 只會叫我食頭痛藥 , 飲多多水等等 , 但我就一向至討厭食藥 , 可以說我係唔想依賴藥物 , 當妳食完藥覺得好番少少的時候 , 下次再唔舒服 , 又會自自然然食粒藥就會覺得冇事 , 從此就會依賴坊間的成藥 



如其食藥 , 倒不如自己整食物出來為身體增強體力 , 今日就為大家推介一款又簡單 , 又滋潤 , 又飽肚的糖水 , 呢款糖水係我昨日大除夕煲架 , 整個甜甜潤潤的糖水來迎接美好的2017年都唔錯呢



呢款糖水所需材料非常簡單 , 只需要紅棗 , 雪耳 , 圓肉 , 雞蛋及冰糖就可以 , 全部材料都好容易在家廚房裡找到 , 大家都知袁生平時唔太愛甜的食物 , 譬如甜的湯水 , 甜甜的西餅蛋糕 , 當然甜的糖水佢都麻麻地喜歡 , 只不過當糖水內有雞蛋的話 , 佢幾甜都會食得落 , 所以今次呢款糖水雖然甜甜地 , 但因為有雞蛋的關係 , 佢完全唔會有投訴  ,  好乖乖地將平時唔喜愛食的雪耳同圓肉都食晒落肚



而且呢款雞蛋茶仲有好多功效 :
(一) 潤燥養顏  ~啱我~

(二) 治失眠  ~我同袁生暫時都訓得好好~

(三) 記憶力退減人士適合  ~呢個啱晒袁生 , 佢記憶力衰退得好緊要 , 10分鐘前同佢講過的說話 , 轉頭兩三分鐘佢已經可以唔記得 , 好快連我都唔記得呢~

(四) 肺陰虛燥熱  ~袁生食咁鬼多煙 , 個肺一定唔多靚仔~ 



煲好的雞蛋茶冷熱食都得 , 我地就比較喜愛熱食 , 因為熱食感覺比較潤 , 煲左一大煲 , 食唔晒先放入雪櫃冷凍 , 再凍食都得 ^^



材料 : 雪耳 , 紅棗 , 圓肉 , 雞蛋 , 冰糖 , 杞子 , 水 




紅棗去核 , 雪耳浸水至軟身後剪碎 , 連同圓肉一起用水沖一沖洗及瀝乾








煲內放入雪耳 , 圓肉 , 紅棗及加入3500ml水 , 用中火煮滾拌一拌勻煲內材料 , 再蓋上蓋繼續用中火煲20分鐘 , 期間謹記睇火以免滾瀉












期間將雞蛋放入水中用中火煮15分鐘至熟透 , 盛起用水沖洗至涼 , 再去殼備用







20分鐘後再加入雞蛋 , 冰糖拌勻用中火煮滾 , 蓋上蓋轉慢火煲5分鐘 , 最後加入杞子拌勻熄火焗10分鐘即可



















材料
雪耳1個 , 紅棗6粒 , 圓肉 , 雞蛋6隻 , 冰糖 , 杞子 , 水3500ml



做法
1. 紅棗去核 , 雪耳浸水至軟身後剪碎 , 連同圓肉一起用水沖一沖洗及瀝乾

2. 煲內放入雪耳 , 圓肉 , 紅棗及加入3500ml水

3. 用中火煮滾拌一拌勻煲內材料 , 再蓋上蓋繼續用中火煲20分鐘 

4. 期間謹記睇火以免滾瀉

5. 期間將雞蛋放入水中用中火煮15分鐘至熟透 , 盛起用水沖洗至涼 , 再去殼備用

6. 20分鐘後再加入雞蛋 , 冰糖拌勻用中火煮滾

7. 蓋上蓋轉慢火煲5分鐘

8. 最後加入杞子拌勻熄火焗10分鐘即可 




滋潤的糖水最適合最近的天氣食用 , 熱食夠滋潤 , 食唔晒仲可以入雪櫃凍食亦可以呢 ^^





28 則留言:

  1. 這個甜蜜蜜呢, 祝你們幸福滿滿. 💗

    回覆刪除
    回覆
    1. 祝Kwann一家都甜甜蜜蜜,繼續同老公sweet sweet

      刪除
  2. 祝您和袁生:新年進步!平安喜樂!甜甜蜜蜜!

    回覆刪除
  3. 祝福你同袁生,2017年幸福快樂,充滿新希望!

    回覆刪除
    回覆
    1. 祝妳,王子同三色貓甜甜蜜蜜,開開心心

      刪除
  4. 袁太,小高來了!好耐無浦頭啦 ~
    祝你新年快樂、身為健康,有個更美好和精彩的2017年 ~

    回覆刪除
    回覆
    1. 小高生完囡囡後真係好耐冇見妳update喇,新一年祝妳們一家開開心心,小朋友快高長大,健健康康,同老公甜甜蜜蜜

      刪除
  5. 袁太,新年快樂~~哩個好滋潤呀:)

    回覆刪除
    回覆
    1. 新年快樂呀艾華斯,呢款糖水真係好潤架

      刪除
  6. 新年快樂喔袁太~~~
    呢個糖水我之前都有成日食, 但中醫話我食唔岩呀...
    因為肥人我係夜猫子黎架....圓肉會令我熱氣, 搞到更加訓唔到呢...

    回覆刪除
    回覆
    1. 大肥人新年快樂,新一年祝妳同老公健健康康,開開心心,甜甜蜜蜜,原來夜貓子係唔可以食圓肉呀,袁生都係夜貓一名,我仲成日叫佢食添

      刪除
  7. 呢款糖水好潤呀

    回覆刪除
  8. 唔記得同袁太講聲新年快樂添

    回覆刪除
  9. 我又想要一碗呀

    回覆刪除
  10. 呢個雞蛋茶一定好好味,新年快樂呀袁太

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......