2017年11月8日 星期三

滷水鴨腿




袁太由細到大都喜愛食滷水 , 滷水雞蛋 , 滷水牛展 , 滷水雞腎 , 豬腩肉等等 ... 我都非常愛吃 , 不過而家衰在牛同雞都唔食得 , 本想轉用豬腩肉做滷水 , 可惜豬腩肉又唔靚仔 ......



最近係街市急凍店又開始有鴨腿賣 , 一次過買多幾隻放冰箱 




閒時從冰箱攞出來用來煮餸炆餸 , 點煮都得 , 鴨腿我比較喜愛用來炆 , 用來滷 , 或者用來焗 , 今次簡單用滷水整 , 一人一隻鴨腿原隻上 , 食時好爽爆 , 以往食滷水多數都係回娘家食媽咪整的滷水併盤 , 不過媽咪係用現成的滷水汁 + 豉油雞汁調出來 , 雖然味道超正 , 但現在的我喜愛咩都自己調一餐



其實由前幾年開始自從自己整滷水汁後 , 百寶箱的現成汁已經俾我掉了 , 自己調的滷水汁絕對唔難 , 而所需材料都好簡單 , 只需要滷水料包 , 生抽 , 老抽 , 紹酒 , 冰糖同薑片 , 全部放晒入煲內煮滾再用慢火煮 , 煮完再焗 , ~哈~ 話咁快就攪掂



焗好的滷水鴨腿 , 將鴨腿頂部包上錫紙 , 咁袁生食時就方便得多 , 今次的滷水汁雖然唔係整得咁鹹 , 但味道都好正 , 剩下的滷水汁留起佢 , 下次袁生要求要滷雞腎 , 豬腸同鴨舌喎 ^^



材料 : 急凍鴨腿 , 滷水料包 , 薑 , 紹酒 , 冰糖 , 錫紙 , 蔥




鴨腿放入煲內加水浸過面 , 用中火煮至滾後盛起 , 用水沖一沖洗油份及瀝乾 , 薑連皮切片 , 蔥切段









燒紅鑊 , 將薑片及蔥段爆香 , 放入鴨腿煎至兩面微黃色 , 連同薑片盛起放入另一煲內 , 加入滷水料 , 冰糖 , 調味料及水(水的份量蓋過鴨腿即可) , 用中火煮15分鐘至滾 , 蓋上蓋轉慢火煮45分鐘 , 再熄火焗1小時 , 食時再煮滾 , 用錫紙包住鴨腿頂部即可






















材料
急凍鴨腿3隻 , 滷水料1包 , 薑 , 紹酒 , 冰糖 , 錫紙 , 蔥

調味料
生抽5湯匙 , 老抽3湯匙 , 酒2湯匙



做法
1. 鴨腿放入煲內加水浸過面 , 用中火煮至滾後盛起 , 用水沖一沖洗油份及瀝乾 

2. 薑連皮切片 , 蔥切段

3. 燒紅鑊 , 將薑片及蔥段爆香 , 放入鴨腿煎至兩面微黃色 

4. 連同薑片盛起放入另一煲內 

5. 加入滷水料 , 冰糖 , 調味料及水(水的份量蓋過鴨腿即可) 

6. 用中火煮15分鐘至滾 , 蓋上蓋轉慢火煮45分鐘 , 再熄火焗1小時 

7. 食時再煮滾 , 用錫紙包住鴨腿頂部即可




呢個滷水鴨腿無論做下午茶或晚餐都一樣得呢 ^^



18 則留言:

  1. 回覆
    1. 我都覺得應該會好味,只可惜我唔食得

      刪除
  2. 我呢邊街市唔見有鴨腿賣呀,想整都唔得

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......