2017年12月20日 星期三

龍脷葉三果湯




呢幾天的天氣簡直凍到寒 , 著晒大褸帶埋頸巾都唔夠暖 , 呢種天氣就最容易中招 , 好似袁生同袁太呀爹咁 , 已經開始有感冒的症狀出現 , 而且都咳得幾利害 , 究竟有咩湯水可以有止咳功效 , 可以等袁生同呀爹飲完湯水後 , 喉嚨可以舒服些少呢 ......



上網search下 , 發現好多人都推介用龍脷葉煲湯 , 龍脷葉袁太只用過一次 , 仲係N年前加雪梨燉俾袁生飲 , 因為袁生平時食煙多 , 食煙多遲早都會痰多 ~哈~ , 龍脷葉應該都幾啱佢 



係街市好容易搵到龍脷葉賣 , 今次只買左10蚊 



 
呢款湯水完全跟上網search到的食譜照煲 , 不過上網係用雪梨 , 袁太就轉用貢梨 , 而且湯水名字叫三果湯 , 好好聽咁呢 , 用上貢梨 , 蘋果 , 羅漢果配龍脷葉同煲 , 一定甜甜潤潤 , 本身想配用瘦肉煲 , 不過每次煲完的瘦肉一定冇人食 , 大家知喇 , 煲完幾個鐘出來的瘦肉真係硬過我條命 , 所以轉用豬骨煲 , 最後唔知袁生同呀爹飲完之後 , 咳或痰多的問題會唔會有好轉呢 ^^



材料 : 龍脷葉 , 貢梨 , 蘋果 , 羅漢果 , 甘旬 , 豬骨 , 蜜棗 , 南北杏 , 無花果 , 鹽 




豬骨放入煲內 , 加水用中火煮滾 , 盛起用水沖一沖洗去碎骨 , 再瀝乾 , 貢梨去芯連皮切薄片 , 甘旬連皮切件 , 蘋果去芯連皮切薄片 , 無花果切半 , 羅漢果弄碎 , 龍脷葉用水沖一沖洗 , 再瀝乾水份備用












煲內逐一放入豬骨 , 甘旬 , 貢梨片 , 蘋果片 , 羅漢果 , 蜜棗 , 無花果及南北杏 , 加入適量水拌勻 , 用中火煲滾後加入龍脷葉拌勻 , 繼續用中火煲15分鐘至滾起 , 蓋上蓋轉慢火煲1 1/2小時 , 最後加少許鹽調味拌勻轉用大火再煮滾 , 熄火焗30分鐘即可



























材料
龍脷葉$10 , 貢梨2個 , 蘋果1個 , 羅漢果1個 , 甘旬(細)2條 , 豬骨 , 蜜棗3粒 , 南北杏 , 無花果2粒 , 鹽



做法
1. 豬骨放入煲內 , 加水用中火煮滾 , 盛起用水沖一沖洗去碎骨 , 再瀝乾 

2. 貢梨去芯連皮切薄片 

3. 甘旬連皮切件 , 蘋果去芯連皮切薄片 , 無花果切半 , 羅漢果弄碎

4. 龍脷葉用水沖一沖洗 , 再瀝乾水份備用 

5. 煲內逐一放入豬骨 , 甘旬 , 貢梨片 , 蘋果片 , 羅漢果 , 蜜棗 , 無花果及南北杏 

6. 加入適量水拌勻 

7. 用中火煲滾後加入龍脷葉拌勻 , 繼續用中火煲15分鐘至滾起

8. 蓋上蓋轉慢火煲1 1/2小時 

9. 最後加少許鹽調味拌勻轉用大火再煮滾 , 熄火焗30分鐘即可




呢款湯飲完喉嚨感覺好舒服 , 味道清清甜甜 , 大家有機會一定要試煲呢 ^^





17 則留言:

  1. 回覆
    1. 呢個湯水真的唔錯,飲完喉嚨好舒服呢

      刪除
  2. 相信呢個做素湯都好味。

    回覆刪除
  3. 冬天特別想飲湯,哩個啱晒~~

    回覆刪除
  4. 呢個湯好潤呀

    回覆刪除
  5. 冬天飲好潤呀

    回覆刪除
  6. 我只飲過龍脷葉茶,未飲過用龍脷葉煲的湯水呢

    回覆刪除
  7. 我老公都有咳,等假日買龍脷葉煲下

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......