2018年1月31日 星期三

[燒鴨骨湯底] 雪菜火鴨絲窩米




燒鴨呢樣食物我家袁生好鬼鐘意 , 喜愛的程度絕對可以話完全進入瘋狂狀態 , 無論燒鴨用來炒 , 用來煲粥或者炆米都無任歡迎 , 多多佢都食得落 , 之但係如果用來煮米粉的話 , 我會比較喜愛窩米 ......



袁太喜愛窩米的原因好簡單 , 因湯底方面會用燒鴨起肉剩下的鴨骨來煲 , 咁湯底的味道就會變得濃郁美味 , 另外用火鴨絲做窩米離不開用雪菜同煮 , 仲有袁生必定Order的銀芽 , 仲要多多銀芽個隻 , 記得以前係酒樓叫過一窩火鴨絲米 , 個碗窩米真係夠經典 , 米粉就多多 , 但湯底就淡過水 , 但都要成五十幾蚊一窩 , 會唔會有少許搵笨呢



說回窩米的做法 , 其實好簡單 , 首先煲好個鴨骨湯底 , 煲湯底期間就好配料 , 再將米粉煮軟放入煲或碗內 , 淋上鴨骨湯 , 再放上配料 , 咁一碗熱辣辣 , 湯底濃郁美味又足料的窩米就食得 ,窩米內全部都係袁生喜愛的食物 , 佢喜愛到連湯都飲埋



講講題外話 , 呢幾日清清電腦的時候發現呢張舊相 , 袁太仲記得好清楚 , 當日有好猛太陽射入屋 , 我家豬豬生前就最愛曬太陽 , 但天氣又有少許涼風 ,  所以袁生就幫豬豬披上毛巾 , 預防豬豬會冷親 , 係咪樣傻傻 , 好可愛呢(袁生仲幫呢張相改左個名 , 叫"印度西B") , 唔知豬豬而家係彩虹橋生活得如何呢 ^^





材料 : 雪菜 , 燒鴨肉 , 燒鴨骨 , 銀芽 , 薑 , 蔥 , 八角 , 上湯 , 炒米粉 , 鹽 , 糖 , 胡椒粉




銀芽放入煲內加入水 , 用慢火拌勻煮至滾 , 盛起銀芽用水沖一沖洗及瀝乾 , 雪菜沖一沖洗切去頭(雪菜頭留起) , 薑去皮切絲 , 蔥切段及切粒 , 雪菜放入大碗內加水浸過面靜待30分鐘














煲內加少油爆香燒鴨骨 , 放入雪菜頭 , 薑絲 , 蔥段及八角 , 加入上湯及適量水拌勻 , 先用中火煲15分鐘 , 盛起面上泡泡去掉 , 拌一拌勻煲內材料 , 用中火再煲至滾起時 , 蓋上蓋轉慢火煲1小時





















雪菜浸30分鐘後再用水沖一沖洗乾淨 , 揸乾水份切粒 , 燒鴨肉撕成絲 , 鴨皮切大片 , 湯底煲1小時後加少許鹽及胡椒粉調味拌勻 , 轉用中火煲滾 , 熄火焗30分鐘 , 焗30分鐘後將煲內的鴨骨及其他湯料取出 , 成鴨骨湯底備用














燒鴨皮放入鑊中爆香出油份 , 盛起去掉 , 加入雪菜粒及鴨絲拌勻快炒數分鐘 , 加入銀芽 , 調味料及1碗水拌勻 , 用中火快手至汁料半收乾












將米粉放入煲內加水用慢火煮至軟身後盛起放入煲或碗內 , 淋上鴨骨湯 , 放上雪菜火鴨絲 , 最後灑上蔥粒即可









 


材料
雪菜2棵 , 燒鴨肉1/4隻 , 燒鴨骨1/4隻 , 銀芽 , 薑 , 蔥 , 八角2粒 , 上湯300ml , 炒米粉1個 , 鹽 , 糖 , 胡椒粉

調味料
蠔油 , 生抽 , 老抽 , 糖



做法
1. 銀芽放入煲內加入水 , 用慢火拌勻煮至滾 , 盛起銀芽用水沖一沖洗及瀝乾 

2. 雪菜沖一沖洗切去頭(雪菜頭留起) , 薑去皮切絲 , 蔥切段及切粒 

3. 雪菜放入大碗內加水浸過面靜待30分鐘

4. 煲內加少油爆香燒鴨骨 , 放入雪菜頭 , 薑絲 , 蔥段及八角 

5. 加入上湯及適量水拌勻 

6. 先用中火煲15分鐘 , 盛起面上泡泡去掉 , 拌一拌勻煲內材料

7. 用中火再煲至滾起時 , 蓋上蓋轉慢火煲1小時

8. 雪菜浸30分鐘後再用水沖一沖洗乾淨 , 揸乾水份切粒 

9. 燒鴨肉撕成絲 , 鴨皮切大片 

10. 湯底煲1小時後加少許鹽及胡椒粉調味拌勻 

11. 轉用中火煲滾 , 熄火焗30分鐘 

12. 焗30分鐘後將煲內的鴨骨及其他湯料取出 , 成鴨骨湯底備用

13. 燒鴨皮放入鑊中爆香出油份 , 盛起去掉 

14. 加入雪菜粒及鴨絲拌勻快炒數分鐘 , 加入銀芽 , 調味料及1碗水拌勻

15. 用中火快手至汁料半收乾

16. 將米粉放入煲內加水用慢火煮至軟身後盛起放入煲或碗內 

17. 淋上鴨骨湯 , 放上雪菜火鴨絲 , 最後灑上蔥粒即可 




濃郁的自家製鴨骨湯底配上清淡的米粉 , 再加上雪菜的鹹味 , 絕對一流呢 ^^





20 則留言:

  1. 雪菜火鴨絲米係我至愛,以前在香港可以個個星期食

    回覆刪除
  2. 雪菜火鴨係我至愛

    回覆刪除
  3. 豬豬好可愛,袁太放心,豬豬現在係彩虹橋一定好開心,默默守護袁生袁太的

    回覆刪除
  4. 流口水ING……下次可唔可以預埋我?

    回覆刪除
  5. 自家製湯底,掂呀

    回覆刪除
  6. 用鴨骨煮成湯底,味道一定好濃郁

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......