2018年4月12日 星期四

[粟米二重奏] 粟米鬚薏米水 , 黑芝麻辣醬燒粟米




上次煲完竹庶馬蹄水獲得好評後 , 今次就想煲粟米鬚水 , 不過未見街市有得賣 , 之後我日日去街市巡一巡 , 終於發現有一檔有粟米鬚賣 , 個種感覺又如中獎一樣 , 雖然當時已接近黃昏時候 , 而粟米鬚都賣得七七八八 , 不過煲水都唔需要太多份量 , 買左五蚊已經好多 , 買晒所有材料留待翌日煲個有益的粟米鬚水 ......



由於煲呢個粟米鬚水會用上粟米皮 , 所以走去蔬菜店買左條粟米 , 粟米皮有用途 , 咁條粟米又如何處置呢 ??? 想起前幾星期係尖尖的韓國街買左盒辣椒醬 , 大家都知我最愛食辣物 , 如果用辣椒醬整個燒粟米 , 唔知味道夾唔夾得黎呢 ???



不過麻煩友唔太愛辣 , 咁就再加上蜜糖 , 甜甜辣辣好滋味 , 加上黑芝麻令粟米更有咬口 , 而且黑芝麻健康 , 加多幾粒都冇所謂 , 今次的粟米簡單用鑊煎 , 大家亦可轉用焗爐製作 , 只係將用鑊煎的步驟轉換成用焗爐就可以 , 用焗爐的方法係將粟米放入用220C先焗5分鐘至微黃色 , 再取出塗上辣椒醬 , 入焗爐再焗10分鐘 , 再灑上黑芝麻即可 , 整好用來做下午茶好鬼正



而粟米鬚水加入生熟薏米同煲 , 有利尿作用 , 袁生個晚飲左2大杯 , 夜晚見佢不去尿尿 , 所以經常有夜尿的朋友仔們 , 就唔好一次飲咁多杯呢 , 唔係夜晚一定冇夠好訓~哈~ , 粟米鬚除左煲水 , 仲可以用來煲湯飲架 , 下次袁太就同大家分享粟米鬚湯呢 ^^



材料 : 粟米鬚 , 生熟薏米 , 粟米 , 甘旬 , 糖冬瓜 , 韓式辣椒醬 , 麵粉 , 蜜糖 , 黑芝麻 , 牛油紙 , 水 , 掃




粟米鬚用水沖一沖洗再瀝乾 , 甘旬去皮切件 , 粟米去皮留起 , 粟米皮撕成幼條 , 用水沖一沖洗 ,  生熟薏米用水沖一沖洗及瀝乾









煲內放入甘旬及粟米皮 , 再加入粟米鬚 , 生熟薏米及適量水拌勻 , 用中火煲至微滾 , 再拌一拌勻煲內材料 , 蓋上蓋轉慢火煲45分鐘
















煲粟米鬚水期間 , 將原條粟米放入電蒸鍋內蓋上蓋蒸20分鐘 , 蒸粟米時將麵粉 , 蜜糖及水放入碗內拌勻 , 韓式辣椒醬加入少許油拌勻備用







粟米鬚水煲45分鐘後加入糖冬瓜拌勻 , 轉用中火再煲滾 , 熄火焗10分鐘即可









粟米蒸好後取出用廚紙抹乾 , 掃上麵粉蜜糖水靜待10分鐘後切件 , 鑊中落少許油燒熱 , 將粟米放入鑊中用慢火燒至粟米表面有少許微黃 , 掃上辣椒醬 , 轉用中火燒至粟米成金黃色後灑上黑芝麻即可

















材料
粟米鬚$5 , 生熟薏米 , 粟米1條 , 甘旬1條 , 糖冬瓜 , 韓式辣椒醬1湯匙 , 麵粉1湯匙 , 蜜糖 , 黑芝麻 , 牛油紙 , 水3000ml , 掃



做法
1. 粟米鬚用水沖一沖洗再瀝乾 , 甘旬去皮切件 , 粟米去皮留起 

2. 粟米皮撕成幼條 , 用水沖一沖洗

3. 生熟薏米用水沖一沖洗及瀝乾

4. 煲內放入甘旬及粟米皮 , 再加入粟米鬚 , 生熟薏米及適量水拌勻 

5. 用中火煲至微滾 , 再拌一拌勻煲內材料 

6. 蓋上蓋轉慢火煲45分鐘

7. 煲粟米鬚水期間 , 將原條粟米放入電蒸鍋內蓋上蓋蒸20分鐘 

8. 蒸粟米時將麵粉 , 蜜糖及水放入碗內拌勻 , 韓式辣椒醬加入少許油拌勻備用

9. 粟米鬚水煲45分鐘後加入糖冬瓜拌勻 , 轉用中火再煲滾 

10. 熄火焗10分鐘即可

11. 粟米蒸好後取出用廚紙抹乾 , 掃上麵粉蜜糖水靜待10分鐘後切件 

12. 鑊中落少許油燒熱 , 將粟米放入鑊中用慢火燒至粟米表面有少許微黃 

13. 掃上辣椒醬 , 轉用中火燒至粟米成金黃色後灑上黑芝麻即可 




燒粟米可以用來做下午茶 , 粟米鬚水放入雪櫃雪到凍一凍 , 出外回家飲一杯好爽呢 ^^







20 則留言:

  1. 我要等到自己種出有粟米,或者夏天街市有得賣先可以有咁多粟米鬚。

    回覆刪除
  2. 個燒粟米好特別

    回覆刪除
  3. 我前幾日係街市睇過冇粟米鬚賣,煲唔到

    回覆刪除
  4. 呢個要朝早好先飲...肥人夜晚起過身去廁所既話, 就等於無訓過咁架~
    因肥人多數一晚訓天光..太懶啦...hahaaa

    回覆刪除
    回覆
    1. 原來肥人同袁太媽咪一樣,夜晚一去廁所就好難訓番呢

      刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......