2018年5月3日 星期四

蕃茄薯仔鯽魚煎蛋湯




前排天氣陰陰涼涼又下雨 , 呢幾日溫度又回升 , 簡直熱到爆 , 大家真的要多多留意天氣情況 , 唔好冷親或淋雨 , 要好好保重身體 , 唔係就好似麻煩友咁 , 以為自己好強壯 , 最後就病倒了 ......



最近多數煲素湯或者豬肉湯 , 好似好耐好耐冇煲過魚湯 , 只不過麻煩友唔係咩魚湯都飲 , 好似梳羅魚湯 , 魚頭湯佢就唔多飲 , 不過用鯽魚煲的湯佢就會乖乖飲晒 , 其實好久之前試過買鯽魚煲湯 , 從此就愛上了 , 鯽魚煲湯好甜好香 , 好容易同材料好夾 , 而且仲好有益處 , 之但係袁太好驚煎魚 , 次次煎魚都甩晒皮 , 今次亦唔例外



-鯽魚含豐富蛋白質 , 對肌膚的彈力纖維能起好好的強化作用
-對壓力大或者睡眠不足等有舒緩功效
-對懷孕中的孕婦或小童都好有益處



今次材料除鯽魚 , 仲配搭煲湯的經典組合~蕃茄薯仔~ , 另外袁太再加埋煎蛋一齊煲 , 大家係咪覺得用煎蛋煲湯會好怪 , 想像唔到會係咩味道 ??? 袁太起初都會懷疑 , 但睇電視講過如果煲魚湯再加煎蛋一起煲的話 , 味道會提升不少 , 會更加鮮甜美味 , 不過唔知係咪心理作用 , 加左煎蛋煲真係好味好多 , 煲左一大煲都唔夠飲呢 ^^



材料 : 蕃茄 , 薯仔 , 鯽魚 , 雞蛋 , 薑 , 蜜棗 , 蔥 , 胡椒粉 , 鹽




鯽魚洗淨外內後抹乾水份 , 期間將蔥切粒 , 薑連皮切片 , 蕃茄洗淨切件 , 薯仔去皮切件後用水沖一沖洗及瀝乾












鑊中加入薑片爆香 , 放入鯽魚用中火煎至兩面金黃色 , 加入熱水 , 滾後蓋上蓋用中火煮20分鐘成奶白色湯底 , 將蕃茄 , 薯仔放入煲內加少許油爆香至出茄油 , 加入鯽魚連湯及蜜棗拌勻 , 用中火再煲滾後蓋上蓋用慢火煲1 1/2小時

























雞蛋放入鑊中煎至兩面金黃色後切成細塊 , 鯽魚湯煲1 1/2小時後 , 將湯內的蕃茄及薯仔放入大碗內 , 湯用隔篩隔去湯渣 , 煎蛋塊放入煲內 , 將鯽魚湯放回煲內拌勻 , 用中火煲滾後蓋上蓋轉慢火煲15分鐘 , 最後加少許鹽及胡椒粉調味拌勻 , 轉用大火再煲滾 , 熄火焗30分鐘即可


























材料
蕃茄3個 , 薯仔2個 , 鯽魚1條 , 雞蛋2粒 , 薑 , 蜜棗3粒 , 蔥 , 胡椒粉 , 鹽



做法
1. 鯽魚洗淨外內後抹乾水份 

2. 期間將蔥切粒 , 薑連皮切片 , 蕃茄洗淨切件 , 薯仔去皮切件後用水沖一沖洗及瀝乾

3. 鑊中加入薑片爆香 , 放入鯽魚用中火煎至兩面金黃色 

4. 加入熱水 , 滾後蓋上蓋用中火煮20分鐘成奶白色湯底 

5. 將蕃茄 , 薯仔放入煲內加少許油爆香至出茄油 

6. 加入鯽魚連湯及蜜棗拌勻 , 用中火再煲滾後蓋上蓋用慢火煲1 1/2小時

7. 雞蛋放入鑊中煎至兩面金黃色後切成細塊 

8. 鯽魚湯煲1 1/2小時後 , 將湯內的蕃茄及薯仔放入大碗內 , 湯用隔篩隔去湯渣 

9. 煎蛋塊放入煲內 , 將鯽魚湯放回煲內拌勻 

10. 用中火煲滾後蓋上蓋轉慢火煲15分鐘 

11. 最後加少許鹽及胡椒粉調味拌勻 , 轉用大火再煲滾 , 熄火焗30分鐘即可 

 


今次鯽魚配蕃茄薯仔已經好美味 , 下次可用白蘿蔔或冬瓜粟米煲 , 同鯽魚都好配呢 ^^







16 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......