冬瓜薏米螺頭瘦肉湯

平時袁太會鐘意煲湯多過滾湯,
因為覺得煲湯始終會多d選擇,
以前如果煲螺頭湯的話,一定會加埋鮑魚一齊煲,
但其實螺頭都可以配搭其他唔同的材料,
煲出黎都一樣咁好味架!
而且一大包螺頭價錢又唔貴,仲可以分好多次煲添!

而袁太今次用螺頭煲的湯水就係:冬瓜薏米螺頭瘦肉湯喇!
夏天的湯水多數都會用冬瓜,
因為消暑又好味!
再加埋今次用螺頭,薏米,瘦肉一齊煲,
雖然味道比較甜,但袁太覺得好好飲!
但袁生一向都唔鐘意咁甜的湯喎!咁點算呢?
好彩袁生都鐘意飲,
又或者可能袁生鐘意食螺頭,所以先鐘意飲掛!

~冬瓜薏米螺頭瘦肉湯~食譜

材料 : 冬瓜-1斤 / 生薏米-$2 / 螺頭-$12粒 / 紅蘿蔔-1條 / 瘦肉-$10 / 蜜棗-2粒                

做法:
1.冬瓜連皮切厚件,瘦肉飛水,撈起,備用.

2.螺頭洗淨飛水,生薏米洗淨備用.

3.煲內放入適量的水,待滾後,放入蜜棗,生薏米,紅蘿蔔瘦肉用大火煲30分鐘.
4.再加入冬瓜,螺頭煲30分鐘後,再轉慢火煲1小時,下少許 鹽調味,即可.    

大班冰皮月餅

由於袁太的老闆有知名度,
所以好多時都有好多客戶送禮品到公司,
而就快到中秋節,
所以有好多月餅送左黎公司,
老細仲叫我地可以拎d番屋企添!
咁我就唔客氣喇!

因為袁太屋企人好鐘意食大班的冰皮月餅架!
攞下攞下有成11包咁多,
有4包就俾家姐,姐夫,
有4包就俾媽咪,爹o地,
有3包就袁生同袁太的,
好開心呀!
我仲聽到老細講話,
下星期仲有楊桃同水蜜桃添呀!
唔知有冇得攞呢

媽咪靚湯

袁太平時放工,多數都會番屋企同爸媽飲茶,
每次番屋企,
媽咪都會煲湯俾我拎番屋企飲,
就算袁太同媽咪煲同一樣湯,
永遠都係媽咪煲的最好味,

而今次媽咪煲的湯就係,
冬瓜薏米水鴨瘦肉湯喇!

雖然唔知點解媽咪煲的湯永遠都好多油,
但真係好好味!
仲有水鴨都煲到好腍,
可以食埋湯渣添!

除左湯之外,
媽咪仲俾左車厘子我添!
d車厘子好甜好好味!
媽咪成日叫我食多d,
話補血個喎!

Happy Lemon - Oreo曲奇咖啡

大家仲記唔記得袁太之前,
飲過Happy Lemon的珍珠奶茶,
都覺得幾好飲,
仲話下次想試另一款,
就係"Oreo Cookies & Cream Coffee"喇!
其實袁太平時唔多好飲咖啡,
但有時經過聞到好香的奶茶同咖啡味,
真係忍唔住要試下!

奶茶就試過喇!
今次終於論到試咖啡喇!
真係好期待個味道會係點?
不過未飲都知味道應該唔差,

因為苦苦地的咖啡,
加上Oreo Cookies同埋Cream,
一定會好好飲,
買左番屋企之後,
已經急不及待喇!
一飲之下,袁太真係愛上了!
好似仲好味過奶茶喎!

夜晚袁生放工番到屋企附近的時候,
打俾袁太問有冇野買,
袁太居然叫袁生去Happy Lemon買杯Oreo Cookies & Cream Coffee,
今日的第二杯咖啡喇!
平時袁太每日都唔會飲一杯咖啡,
但今日居然飲兩杯,
真係人都顛!

鮑魚螺頭雞腳瘦肉湯

最近唔知係咪天氣太熱,
袁生最近夜晚都冇咩胃口食飯,
所以袁太都只係蒸條魚,炒碟菜
簡簡單單就算,
不過就算冇胃口,都飲啖湯喇!
所以袁太都諗住煲d袁生鐘意飲的湯,
希望袁生可以有番胃口喇!
而袁生鐘意飲的湯,就鮑魚螺頭湯喇!
袁太之前係吉吉島買左一大包鮑魚同埋螺頭,
所以就決定今次煲黎飲下,
其實袁太平時好少會煲呢類型的湯架,
因為材料太貴喇!
但冇辦法,鬼叫袁生鐘意咩!
用鮑魚螺頭煲出黎的湯好清甜,好好味,
其實除左袁生鐘意之外,
袁太都好鐘意架!
袁生仲俾左10分滿分呢個鮑魚湯添!

仲有呢個鮑魚湯的另一個好處就係,
煲完湯的鮑魚,螺頭的一半份量,
可以用鮑汁再炆下佢,再加埋西生菜,
咁就攪掂一個餸,唔駛!

~鮑魚螺頭雞腳瘦肉湯~食譜

材料 : 鮑魚(中)-5個 / 螺頭(細)-12個 / 紅蘿蔔-1條 / 雞腳-4隻 / 史x生清雞湯(500ml)-1盒 /
                               瘦肉-$10 / 蜜棗-2粒

做法:
1.鮑魚,螺頭出水備用.
2.紅蘿蔔切件,將瘦肉飛水,備用.

3.雞腳剪去腳甲後出水,放入凍水30分鐘.

4.煲內放入史x生清雞湯及適量及水,待滾後,放入所有材料(除雞腳外),用大火煲30分鐘,再轉慢火煲1小時.
5.再落雞腳煲30分鐘,下少許鹽調味,即可.