豆角蝦仁炒滑蛋

今日又黎炒滑蛋喇!
事緣因為冰箱仲有半包蝦仁係度,唔想留咁耐,
一於今晚整埋佢,
又或者因為最近夜放工,
所以都係整比較簡單的餸,
費時又俾老公話煮得耐,咁夜都冇飯開喇!
前世未俾人鬧過咩!
我記得之前炒滑蛋炒得好差架!
不過由於袁太的廚藝越來越好的關係,
而家已經炒得好好喇!



~豆角蝦仁炒滑蛋~食譜

材料 : 蝦仁-12隻 / 雞蛋-5隻 / 豆角-6條

                      醃料 : 蛋白-1隻 / 胡椒粉 , 鹽 - 少許

 
1.蝦仁洗淨,加入醃料拌勻,備用.
2.豆角切粒後,用少許雞湯煮10分鐘,撈起,備用.

3.雞蛋打發後,加入少許生抽調味,再將豆角粒,蝦仁與蛋液拌勻.
4.燒紅鑊,將蛋液慢慢倒入鑊中,加多些油,拌勻,在凝結成固體前撈起,即可.


蝦的處理方法 :蝦去殼,挑腸後,緊記要用鹽抓洗至少兩次,用清水沖洗乾淨後,用乾淨布徹底吸乾水份.