薑蔥金菇牛柏葉

呢個餸袁生叫我整的,
因為平時去酒樓飲茶都會叫呢個點心食,
不過而家少去左酒樓喇!
如果好似袁生想食的話,
唯一的辦法就係自己整喇!
不過係叫我整喎!
佢淨係負責食
!不過我就另外加左金菇墊底,
都好好味架!





~薑蔥金菇牛柏葉~食譜

材料 : 柏葉-1塊 / 金菇-1包 / 薑絲 , 蔥條, 蒜粒 - 少許 / 辣椒仔-半條

                      調味料 : 鹽 , 糖 , 雞粉 , 麻油 , 胡椒粉 - 少許 / 水-適量                    
 

 

1.金菇洗淨切尾,放上碟.
2.牛栢葉洗淨,先出水後切條,放在金菇面備用.
 
3.薑絲,辣椒粒,蒜粒,蔥條落鑊爆香後,加入所有調味料煮滾後,淋在金菇牛栢葉上.
4.用大火隔水蒸15分鐘,即可.

粉葛赤小豆扁豆瘦肉湯

又係煲湯的時間喇!
今日選擇左煲粉葛湯,點解?唔知呀!
見好耐冇煲過掛,又或者費事成日俾老公話煲黎煲去都係個幾款湯,
不過用粉葛煲湯,
煲出黎煲湯好似涼涼地,甘甘地咁!
唔緊要喇!
橫掂最近天氣咁熱喇!
煲呢個湯都唔錯架!



~粉葛赤小豆扁豆瘦肉湯~食譜

材料 : 粉葛-1個 / 紅蘿蔔-1條 / 粟米-1條 / 蜜棗-2粒 / 赤小豆 , 扁豆 - 適量 / 瘦肉-$10

 做法:

 1.粉葛,紅蘿蔔切件,將瘦肉飛水,撈起,切件,備用.

 2.煲內放入適量的水,開大火,待水滾後,放入蜜棗,赤小豆,扁豆,瘦肉,粟米煲30分鐘.
 3.再加入紅蘿蔔,粉葛用大火煲30分鐘後,再轉慢火煲1 1/2小時,下少許鹽調味,即可.

太古城@懷舊香港情

今日去太古搵老公食lunch,
今日開始有微型藝術展,
好懷舊好靚,
仲影左好多相添!
等我今晚得閒post埋d相上個blog到先...

節瓜鱆魚雞腳瘦肉湯

今日的是日湯水本來係節瓜鱆魚瘦肉湯,
但袁生話不如加埋雞腳一齊煲喎!
難得袁生有要求,梗係聽晒老公話喇!
但當袁太買晒材料番屋企後,
先知原來屋企已經冇晒鱆魚,
~點算呀~唉...為由再落街市買喇!
再加幾粒瑤柱一齊煲,
煲出黎好好飲,老公好鐘意!



~節瓜鱆魚雞腳瘦肉湯~食譜

材料 : 節瓜-2個 / 眉豆 , 花生 - 少許 / 雞腳-4隻 / 鱆魚-1塊 / 雞腳-4隻 / 瑤柱-2粒 / 蜜棗-2粒


 做法:

 1.瑤柱浸水3小時,鱆魚浸水30分鐘,備用.

 2 瘦肉飛水,撈起,備用.
 3.雞腳剪去腳甲後出水,放入凍水30分鐘,節瓜洗淨去皮切半.

 4.煲內放入適量的水,滾後放入蜜棗,眉豆,花生,鱆魚用大火煲30分鐘.
 5.再加入節瓜,瑤柱連水用大火煲15分鐘後,轉慢火煲30分鐘,再下雞腳煲30分鐘,下少許鹽調味,即可.

青瓜芋絲牛肉卷

金菇牛肉卷就整過無數次,
何況袁生唔太鐘意金菇,
咁今次就轉下口味,
用芋絲做餡,
其實芋絲我平時都係打邊爐先會食,
好少會用黎煮餸,
而今次的牛肉卷除左用芋絲外,
另外再加上清新的青瓜絲一齊做餡,
唔知咁既配搭會唔會好怪呢
好期待...







~青瓜芋絲牛肉卷~食譜

材料 : 肥牛-12塊 / 芋絲-12扎 / 青瓜-半條

                      獻汁 : 蠔油 , 老抽 , 生粉 , 水 - 適量
 

 

1.肥牛加入少許鹽,生粉拌勻,放入雪櫃冷藏30分鐘.
2.芋絲解開結,青瓜切絲備用.

3.將芋絲,青瓜絲放在肥牛片上捲成卷,用生粉封口.

4.燒紅鑊,放下青瓜芋絲牛肉卷煎至兩面金黃後,加入獻汁煮至杰身,即可.