豉汁墨魚滑蒸豆腐

有時覺得日日係到諗煮咩餸俾袁生食,
簡直諗到頭都大埋,
因為袁生鐘意食濃味的餸,
而袁太就鐘意清淡的餸,
所以每次諗用咩材料煮飯,
都要認真諗下先好去買,
費時買左材料番屋企煮完出黎,
袁生唔鐘意食!

所以袁太最後諗到今晚晚餐用墨魚滑做材料,
因為墨魚滑袁生袁太都鐘意食,
再加豆腐做材料,
豆腐清清地,袁太鐘意,
再用豉汁去蒸,
豉汁的味道濃濃地,袁生鐘意,
所以呢味餸有晒袁生袁太兩夫婦各有鐘意的清淡材料同埋濃郁的味道喇!
一餸幾得!




~豉汁墨魚滑蒸滑豆腐~食譜

材料 : 墨魚滑-$20 / 蒸煮滑豆腐-1盒 / 蒜蓉豆豉醬-適量 / 蔥(切粒)-少許

1.墨魚滑用少許雞粉醃好.
2.豆腐切片後放上碟沾少許生粉,將墨魚滑放上豆腐面.
 
3.將適量的蒜蓉豆豉醬加少許水,生粉拌勻後淋上墨魚滑豆腐上.
4.用大火隔水蒸10分鐘,最後放上蔥粒,少許熟油,即可.

薑蔥炒肉蟹

最近買咩都咁貴,
有時真係想求求其其平平地煮餐飯就算,
但真係冇咩可能,
就算袁太肯餐餐鹹魚青菜,
袁生都唔肯喇!
何況袁生一向最鐘意食海鮮同埋肉類,
唔貴的都唔食,
雖然袁生袁太每個月都有糧出,
但有時袁太都想慳番d架嗎...

不過現今的社會生活都好難喇!

就算袁太想慳番d,都要袁生配合架!
好似今日咁,袁太放假,諗住打俾袁生問下夜晚想食咩!
點知袁生個答案係:"我想食蟹"
仲要係啖啖肉的肉蟹喎!
雖然袁太心諗,唔係呀!
肉蟹好貴個喎!
但難得袁生開口話想食,
幾貴都要買架喇!
結果買左兩隻肉蟹,都要差唔多$200,
因為袁太好少買蟹番屋企自己整,
多數都係出街食,
所以唔知$200/2隻算唔算貴
但以袁太個角度梗係貴到七彩喇!
好彩袁生都好鐘意食,
不過鐘意還鐘意,都係偶然整一次好喇!
如果成日煮的話,遲早破產...

~薑蔥炒肉蟹~食譜

材料 : 肉蟹-2隻 / 薑 , 蔥 - 適量

1.買肉蟹時,叫人幫手劏埋,去內臟,洗淨斬件
.
2.將劏好的蟹洗乾淨,抺乾,拍少許生粉.
 
3.燒滾油,將蟹走油至轉色,撈起備用.
4.燒紅鑊,爆香薑片,蔥段後,將肉蟹回鑊兜勻,下少許生抽,糖,胡椒    粉調味,再兜勻一會後,下少許
   酒再兜拌一會,即可.

老王瓜瘦肉湯

最近天氣日日都咁熱,
真係出一出街都成身汗,

熱到袁太最近都冇咩胃口兼都無心機煮飯,
所以呢幾日都同袁生出街食,
直到今日袁生開口叫袁太煮飯!
OK,袁生叫到梗係煮喇!
但問袁生夜晚想食咩餸,
袁生的答案都係例牌一句,"是但喇!"
唉...又叫人煮,但又唔俾提議食咩!

餸就未諗到,但湯就易諗!
夏天的湯水,
離不開都係用冬瓜或者老王瓜煲湯架喇!
所以今日就選擇左用老王瓜煲,
再加埋紅蘿蔔,赤小豆,扁豆,瘦肉一齊煲,
呢個湯足足煲左3個鐘架,應該夠晒火喉喇掛,
老公飲左應該消晒暑!



~老王瓜瘦肉湯~食譜

材料 : 老王瓜-1個 / 紅蘿蔔-1條 / 赤小豆 , 扁豆 - 適量 / 蜜棗-2粒 / 瘦肉-$10

做法:
1.老王瓜,紅蘿蔔切件,將瘦肉飛水,撈起,切件,備用.

2.煲內放入適量的水,待水滾後,放入蜜棗,赤小豆,扁豆,瘦肉用大火煲30分鐘.
3.再加入紅蘿蔔,老王瓜煲30分鐘後,再轉慢火煲2小時,下少許鹽調味,即可.