原來袁生有時都幾細心

雖然大暑日袁生聽話係屋企避暑,
但原來袁生係屋企休息,袁太都唔好受!
因為袁生成日話屋企又多塵,又亂!
又話要執下間屋,
到頭來咪又係袁太自己一個人執,
不過袁生開到聲,咁袁太梗係要拿拿臨開工做家務喇!

袁太由今朝買完早餐,冬瓜水的材料之後,
番到屋企食完早餐,煲緊冬瓜水之後,
就開始今日的家務大作戰,
由11:00am開始,
袁太的家務~洗床單,洗廁所,抺廚房,吸塵,抺地,洗窗簾.
袁生的任務~同BB沖涼,梳毛,修甲.
袁太做完晒所有家務都約下午15:00喇!
見做到成身汗就沖下涼,
但沖完涼出黎唔見左袁生喎!唔通落左街?
過左一陣袁生番來喇!
原來落左街市買荔枝,仲買左4磅咁多!
買咁多做咩呀?兩個人邊食得晒呀!
點知袁生話~我買咁多,因為想你整荔枝雪糕俾我食~
之前如果袁生主動叫袁太整野食,
袁太一定好開心!
但今日做左咁多家務,人都散晒喇!
仲邊有氣力整雪糕喎!
當袁太想罵袁生之際,點知...

袁生除左買荔枝之外,
因為袁太之前講過話想飲M記的青蘋新地樂,
原來專登去M記買左杯俾我飲!

當時條氣即刻順晒,仲有少少感動添!
因為同袁生拍左11年拖,結左婚差不多10個月,
袁生一向好少會做呢d野!
原來袁生偶然都幾細心架!~Sweet Sweet~
好喇老公,我今日真係散晒,聽日喇!聽日整荔枝雪糕俾你食!