西瓜皮紅蘿蔔排骨湯

前幾日袁太買左1/4個西瓜番屋企,
將西瓜起肉後,西瓜皮留番要黎做咩呢
答案就係:煲湯喇!
通常食完西瓜,d西瓜皮都係就咁掉左佢就算,
都冇諗過用西瓜皮煲湯架!
但無意中上網有介紹過,
話西瓜皮原來有消暑作用,

用黎煲湯會好好味個喎!
所以袁太就嘗試用西瓜皮做材料煲湯喇!
袁太經過2小時時間,
用西瓜皮煲的湯於完成喇!
原來真係好好味架!
清清地,甜甜地,味道有少少似青木瓜湯,
袁生袁太都好鐘意飲,
袁生仲話,下次再買西瓜的時候,
記得再煲呢個湯喎!
袁太見西瓜皮湯咁好味,就即刻打電話媽咪介紹佢煲呢個湯喇!
點知媽咪個反應係"唔係呀用西瓜皮煲湯?"
我話,係呀!好好飲架!你下次都試下喇!
不過媽咪話西瓜好涼,
就算好飲都叫袁太唔好飲咁多喎!

~西瓜皮紅蘿蔔排骨湯~食譜

材料 : 西瓜皮-1/4個 / 紅蘿蔔-1條 / 排骨-$30 / 蜜棗-2粒


做法:

1.西瓜起肉,留下西瓜皮,去掉綠色外皮,洗淨切件
.
2.將排骨飛水,備用.
 
3.煲內放入適量的水,放入蜜棗,待滾後加入紅蘿蔔,排骨用大火煲30分鐘.
4.再加入西瓜皮煲30分鐘後,再轉慢火煲1小時,下少許鹽調味,即可.