黃金糕

大家記唔記得袁太之前post話買左盒黃金糕粉，終於係大年初一晚同袁生一齊整，不過唔整唔知，原來整的時間都幾長架，我地由夜晚12點幾開始整，唔知點解整整下整到凌晨4點幾先攪掂，真係攞晒命。


不過呢個黃金糕基本上係袁生整既，由拌勻材料至攞去焗，都係袁生一手包辦，袁太淨係係隔離教袁生整，不過估唔到袁生今次整的黃金糕都幾好味個喎，雖然係第一次整，但咬落去好煙un，好正，不過唔係好夠椰汁味，同埋略甜左少少，不過都有80分架喇，雖然整的份量唔太多，但都有俾左d媽咪同奶奶試下，佢地都話好味道。




~黃金糕~

材料:
黃金糕粉 ------ 2/3盒
雞蛋 ------ 4隻
椰汁 ------ 100ml
牛油 ------ 20g
砂糖 ------ 適量

做法:
<1>牛油隔水座溶後，加入椰汁，少許鹽拌勻。

<2>黃金糕粉分三次加入做法<1>內用刮刀拌勻。

<3>雞蛋同砂糖打至企身後加入做法<2>內拌勻。

<4>將拌勻的黃金糕糊篩走多餘粒狀後倒入電飯煲內。

<5>蓋上電飯煲蓋，啟動保搵功能(warm)，讓黃金糕發酵，係發酵期間每15分鐘用刮刀拌勻1次，全程要拌勻4次。

<6>糕盆塗上少許油，倒入黃金糕糊，蓋上保鮮紙讓其發酵1小時，其間不需要攪拌。

<7>焗爐用180C預熱10分鐘。

<8>待黃金糕發酵完成後放入焗爐，用180C焗30分鐘即可。

<1>做黃金糕的時候最重要係確保發酵成功，所以發酵的時間同溫度係好重要，電飯煲的保溫功能可維持大約40左右溫度，係發酵的最佳時間，而利用電飯煲的保溫功能來做發酵，可解決因天氣同溫度的影響而造成發酵不足或發酵過度而變酸的問題。

<2>黃金糕初次發酵時，需每隔15分鐘將糊狀拌勻1次，確保發酵均勻。

<3>黃金糕倒入糕盆後則不可再攪拌，咁樣做出來的黃金糕才會出現均勻的小孔和坑紋，食起來才鬆軟彈牙。

<4>要知道黃金糕是否熟透，可用竹籤插入糕的中間位置，若見竹籤沒有沾上麵糊便OK。

<5>剛焗好的黃金糕可切件即刻食或雪凍後煎成金黃色。

炸芋蝦

袁太以前根本唔知有芋蝦呢樣賀年食品，係無意中睇電視見到教整呢個芋蝦，睇落好似好好食咁喎，雖然係街都有呢個賀年食品賣，但以袁太的性格，梗係自己試下係屋企整先喇，整唔到先出街買都未遲喇，不過袁太咁有廚藝天份，唉...又唔知醜，自己讚自己，大家唔好見怪，應該難唔到我既 !


何況整芋蝦所需材料都好簡單，去街市買芋頭，芫茜就可以開工，其實整的過程仲一d都唔難添，只係覺得去到炸的步驟就比較麻煩d，當袁太炸完一個之後，就即刻熱辣辣攞俾袁生食，袁生話好脆口，好味道，袁太真係好開心，起碼唔駛俾人彈話唔好食，不過袁太今次淨係買左半個芋頭，整兇黎的份量唔算多，又要留俾自己食，又要俾媽咪同奶奶，真係好似唔夠分喎，等我再去街市買芋頭番黎再整過。


由於唔係人人都食芫茜，所以袁太就整左兩款，一款係淨芋蝦，一款係芋蝦入面有少少芫茜碎，不過街賣個d好似冇芫茜個喎，但是袁太睇電視，人地有用芫茜一齊整，所以袁太就照做喇 !



~炸芋蝦~

材料:
芋頭 ------ 半個
糯米粉 ------ 2湯匙
芫茜(淨取葉) ------ 適量

調味料:
鹽，雞粉，酒，胡椒粉 ------ 適量

做法:
<1>芋頭洗淨，刨去外皮，將芋頭切片後再刨成絲，芫茜只留葉備用。

<2>將糯米粉，調味料放入芋絲中拌勻。

<3>鑊中加入大量油，將拌勻的芋絲放入罩籬仔，再放入少許芫茜碎，再放入少許芋絲。

<4>待油滾後，將罩籬仔放入熱油內，用慢火炸至定型。

<5>便將芋蝦倒在油鑊中，炸透至金黃色，撈起用廚房紙吸去油份即可。

炸慈菇片

又到新年喇，每到新年的時候，袁太一定會整賀年食品，今年亦都唔例外，因為唔整的話，袁太總會覺得好似欠缺某d野咁，不過今年同上年一樣，都係整炸慈菇片同埋炸芋蝦，今年袁太亦都有新嘗試，就係試下整黃金糕，唔知難唔難整，成唔成功呢 ???


好喇 ! 講番個主角"炸慈菇片"先，記得上年整的慈菇片簡直超樣衰，因為當時冇切片器幫手，只係用刀切，所以每片的厚度都唔一樣，同埋大部份都炸燶晒，但今年唔同喇，屋企有個切片器，不過袁太一開始就割傷左隻手，因為個切片器太利喇，攪到大年初一即見紅，割傷"中指"d血係咁流。

袁生見到我整親隻手，又話我做咩咁唔小心，係驚左我的情況下，袁生就幫我切薄片，真係塊塊都咁薄，炸出黎仲好靚添，好似薯片咁，而味道方面梗係OK喇，咪慈菇味囉，哈...今年整得咁靚都係多得袁生幫手咋。



~炸慈菇片~

材料:
慈菇 ------ 1斤(約10粒)
鹽 ------ 少許

做法:
<1>將慈菇洗淨，外皮，用切片器切成薄片(可用刀切，不過厚度會唔平均，因為慈菇太細舊，切到尾尾的時候會好難切，小心手指)。

<2>將切好的慈菇片用廚房紙稍為吸乾水份。

<3>鑊中加入大量油，以慢火將慈菇片炸成金黃色脆片。

<4>撈起瀝乾油份後，灑上少許鹽調味即可。

年廿九-食湯丸

每年踏入新年前一定會煮湯丸,
因為團團圓圓,
袁太梗係都唔例外都煮湯丸喇,
年廿九個日同袁生行去花市後,
就番屋企煮湯丸,
初時諗住自己包架,
但個幾日執屋都執到死死下,
所以都係買湯丸番黎算喇,
由於夜媽媽先食湯丸,
所以簡簡單單用片糖煮就ok,
不過袁生話d片糖水淡左少少喎,
唔係呀!
袁太覺得啱啱好,
何況唔好成日食咁甜,
對身體冇益架!

我家有隻憤怒B

新年前梗係要同BB去寵物店沖涼喇,
袁太見BB d毛咁長,
所以就叫寵物店的姐姐同BB剪埋毛,
剪完毛,沖完涼的BB例牌唔會采我,
一定智第日先會采番袁太,
點知原來新年呢幾日係超凍,
咁BB冇晒毛咪好凍囉,
平時BB又唔鐘意著衫,
所以袁生就買左條大毛巾俾BB,
條毛巾係憤怒鳥圖案黎架,
好靚呀,
BB當堂暖晒,
仲好得意添!

煎蓮藕餅

呢個煎藕餅其實一直都想整,
不過又懶得將蓮藕刨絲,
所以一直都冇整過,
自從之前睇月兒blog的時候,
見到月兒整藕餅,
覺得其實整藕餅都唔係好麻煩姐,
所有袁太就決定整,

不過其實呢個食譜已經係新年前整左,
因為袁太最近太忙喇,
又要番工,又要執屋,
淨係執屋都執左幾日,
都唔知點解間屋只係兩個人1隻狗住,
都會有咁多垃圾,
再加上新年前買左新傢俬換,
簡直執屋執到頭都暈埋!



好喇!講番個蓮藕餅先,
本身諗住用臘肉整架,
點知原來雪櫃的臘肉已經俾袁太食晒,
所以唯有改用臘腸,
不過都係一樣咁好味!
連袁生都大讚話味道好好,
等我有機會下次再整過!

~煎蓮藕餅~食譜

材料 : 蓮藕-1節 / 豬肉碎-$10 / 臘腸(細)-2條 / 蝦米-適量 / 冬菇-5隻 / 芫茜 , 蔥 - 少許
                      醃料 : 生粉 , 糖 , 生抽 , 麻油 , 水 - 少許

 

1.冬菇,蝦米浸軟後切細粒,臘腸切細粒,芫茜,蔥切碎.

2.豬肉碎加入醃料醃30分鐘.

3.蓮藕磨成蓉備用.

4.燒紅鑊(不落油),分開爆香臘腸粒,冬菇粒,蝦米粒.

5.將爆香的材料連同芫茜碎,蔥粒加入蓮藕茸內一同拌勻.

6.加入少許鹽,胡椒粉,生粉,糖調味.

7.濕手將蓮藕蓉搓成丸子後放入鑊中,用慢火煎至一面金黃色後用鑊鏟輕輕壓成餅形後才反另一面煎.
8.煎至兩面金黃色即可.

媽咪煮的晚餐

袁太上星期番娘家食飯,
因為袁生個日有朋友仔結婚,
所以袁太唔晒煮飯,
就番娘家同爹地媽咪食飯,
媽咪就打俾袁太問夜晚想食咩餸,
梗係食d平時袁太鐘意食的野,
但又唔會係屋企煮既,
就係袁生唔鐘意食的餸喇,
袁太的首選就係:蕃茄牛肉炒蛋"
呢個餸由細食到大,撈飯簡直一流,
仲有另外媽咪煮的蠔油冬菇鮑片,
雖然好好味,但有少少鹹,
仲有一煲超油的湯,
唔知點解媽咪煲的湯永遠都好多油,
但媽咪係特登燉俾袁太飲,
話俾袁太補下個身喎,
煲湯有好多料架,
有圓肉,杞子,花膠,雞....
真係好好味!
媽咪煮的飯,炒的餸,煲的湯係最好既!