南瓜素翅海鮮湯

事實上袁太已經有好幾年冇煲過南瓜湯喇,
點解?
咪就係因為袁生唔鐘意食南瓜,
嫌用南瓜煲湯好甜喎,
相反袁太就好鐘意南瓜,
但袁生唔鐘意,袁太梗係唔再用南瓜做材料喇,
由於袁太而家睇中醫,
有好多野都唔食得,
已經有好多材料唔可以煲湯俾袁生飲,
袁太唯有再用番南瓜煲湯,
但都要經過袁生同意先得,
袁太用左幾多口水先攪掂袁生答應,
但袁生話俾你煲南瓜湯都得,
但唔好煲番以前個南瓜栗子湯喎,
死喇!袁太就係想煲呢個,
唉...唯有諗過第二樣材料!



袁太諗左成個鐘都毫毛頭緒,
點知打開冰箱見到有包素翅,
就即刻諗到煲咩湯喇,
就係"南瓜素翅海鮮湯",
淨係聽個名都知好味道,
何況袁生鐘意食海鮮,
應該可以為呢個湯加唔少分掛,
袁太煲左2小時,
終於煲好喇!
袁生話望落去好似龍蝦湯喎,
~咁犀利~
咁味道好唔好先!
袁太真係"O"晒嘴,
居然袁生話好味道喎,
不過袁太都覺得好好味,
就係因為袁太煲左呢個湯,
南瓜呢樣材料終於可以係袁家裡面從出江湖,
可喜可賀!



~南瓜素翅海鮮湯~食譜

材料 : 南瓜-半邊 / 素翅-1碗 / 急凍海鮮-1包 / 薯仔-1個 / 清雞湯-500ml

做法:                      

1.素翅解凍備用.
2.南瓜去皮去籽,薯仔去皮切細件.

3.海鮮解凍後用少許麻油,胡椒粉,鹽醃30分鐘後飛水備用.


4.煲內加入雞湯及水,待滾後加入南瓜用大火煲1小時,

5.加入薯仔轉慢火煲30分鐘.
6.再加入海鮮,素翅煲15分鐘,下少許鹽調味,即可.