狗狗食譜 <附乳酪三絲生菜卷食譜>

昨日係大暑，大家有冇買冬瓜煲冬瓜水或冬瓜湯呢 ???

袁太星期日就晨早去街市同d師奶呀婆爭冬瓜，煲左一大煲放係雪櫃，等袁生自己攞黎飲，大暑的日子，人就要買冬瓜消暑，咁狗狗呢 ???

其實狗狗都要消暑，何況好似BB呢d扁鼻狗，係好容易中暑，雖然BB平時就唔多出街，但做主人的我都要整d食物俾BB消下暑先得，夏天屋企雪櫃成日都有西瓜係度，上次用左西瓜皮煲水，大家知唔知原來西瓜皮對狗狗都有一定的消暑作用

所以可以用西瓜皮整一d消暑食物俾佢，袁太就諗到，不如整個生菜卷俾BB嘆下，材料除左有西瓜皮，青瓜，甘旬，仲有低脂乳酪，好健康

而且整的過程好簡單，袁太一路整，BB一路等，整左一條都急不及待俾BB試下

 

BB都不知幾鐘意，仲食唔停口，不過袁生話一下子唔好俾咁多，所以只俾左3條BB食，不過BB一定唔夠喉 !

乳酪三絲生菜卷
材料 : 西瓜皮<4塊>，甘旬，青瓜<半條>，西生菜<6塊>，原味低脂乳酪<適量>(約3茶匙)

做法 :

1. 西瓜皮刨去綠色外皮，只要白色部份後切絲，甘旬，青瓜洗淨去皮切絲

2. 燒滾水，將西生菜灼一灼，盛起待涼備用

3. 將乳酪加入三絲內拌勻

4. 將乳酪三絲放入西生菜內，最後將西生菜卷起即可