咸菜胡椒豬肚湯 <附食譜>

咸菜豬肚湯係袁太其中一款喜愛的湯水，雖然話就話喜愛，但好似一次都未煮過，記得以前婆婆煲先有得飲，婆婆煲的真係超級好味到不得了

雖然每次同奶奶去西環食飯都會飲豬肚湯，雖然都好好味，但始終味道都不及婆婆的好，平時見袁生唔太喜愛咸菜，但見去親西環食潮州菜，袁生都會飲完一碗又一碗，袁太先發覺原來袁生都幾鐘意呢款湯水，所以就決定自己試一試，唔知攪唔攪得掂呢 ???





咸菜胡椒豬肚湯
材料 : 豬肚<1個>，潮州咸菜<1斤>，瘦肉<$20>，白胡椒粒<1湯匙>，黑胡椒粒，胡椒粉<適量>，薑(豬肚出水用)<3片>


做法 :
1. 將豬肚內外洗淨(先剪開豬肚，剪去入面白色肥膏，再用生粉，鹽沖洗後，再用清水沖洗多次

2. 燒紅鑊，略煎一煎肚兩面，之後用薑片將豬肚出水，出水後再用凍水清洗就可以

3. 瘦肉洗淨出水，咸菜切片後用鹽水浸30分鐘，瀝乾水份備用

4. 燒紅鑊，爆香白胡椒粒

5. 煲內放入適量水，放入瘦肉，白胡椒粒，待滾後轉慢火煲2小時成湯底

6. 再放入咸菜，豬肚煲1小時，拿起豬肚切片放回湯中，最後加入少許鹽，黑胡椒粒，胡椒粉即可

何況天氣涼涼地，飲下胡椒湯可以暖胃，經過兩個幾鐘頭的時間，終於完成豬肚湯，雖然味道一定冇婆婆煲的，又或者冇出面餐廳的好味，但袁生覺得個味道真係唔錯，不過唯一的就係落得太多咸菜，連袁太都要讚下自己，呢個豬肚湯真係好好味 !