2013年6月3日 星期一

炎炎夏日之簡單晚餐

袁太又偷懶左幾日冇upload blog了,冇辦法,由於天氣實在太熱,令到個人都冇咩心情上網,懶下一日又一日,今日終於要upload下,因為我驚大家會唔記得左我

由於天氣太熱太焗,攪到我都唔想係廚房煮晚飯,大熱天時係廚房實在太辛苦了,唔駛15分鐘已經出晒汗,真係想大叫救命,但其實唔想飯都可以有好多選擇

例如 : 沙律,麵包,生果,冷盤等等 ...


所以袁太就一口氣整左好多食物,全部都係易入口凍冰冰的食物,真係唔錯,唔通炎炎夏日要我食粥做晚餐咩 ???

何況袁生對今次的晚餐讚不絕口,點解 ...

因為全部都係袁生鐘意食的野,眼見袁生最近都熱到冇咩胃口,所以我呢個老婆就整左比較簡單又好味的食物當晚餐,希望袁生食完可以消下暑,涼一涼個身體降下溫喇 !



炎炎夏日之簡單晚餐
簡單又好味的晚餐包括有 :

<煙肉薯仔蘋果沙律>
用左日本薯仔同日本富士蘋果去整,再加上炸過的煙肉碎,真係食到唔停口,而且我仲放左係冰箱冷藏,等沙律有少少冰的感覺,真係好正架 !




<芝士沙樂美腸蛋醬法包>
係麵包店買左條法包,簡簡單單加左生菜,自製蛋沙律醬,再放上沙樂美腸同袁生至愛的芝士粒,起初都驚呢個配搭怪怪的,但原來都幾好味架,不過食的時候就有少少麻煩,因為個法包太大了,好似我咁口細的人都好難咬,要慢慢食先得,哈 ... 哈 ...


另外整法包的時候,將法包面切開左,但掉左佢又好浪費,就諗到一個好簡單的做法,將法包皮切粒,用少許香草,蒜鹽,橄欖油拌勻,放入焗爐用180C焗5分鐘,焗完之後麵包脆卜卜,好好味架 !


最後有袁生至愛的風乾火腿,再加上哈密瓜,鹹鹹地甜甜地好好味,不過哈蜜瓜我都搵左幾間生果檔先有得賣 !



9 則留言:

  1. 嘩...你個晚餐變得高貴好多呢~
    [版主回覆06/05/2013 23:30:17]嘻 ... 嘻 ... 多謝

    回覆刪除
  2. 小蓮蓮小食xdxd2013年6月4日 凌晨12:29


    [版主回覆06/05/2013 23:30:30]

    回覆刪除
  3. 寧靜中的不寧靜2013年6月4日 清晨6:45

    嘩...好豐富呀...........我尤其鍾意薯仔沙律, 入口凍冰冰, 少少酸味.......岩哂......有時我見D外國人呢, 會加D螺絲粉入去沙律度......都OK架~
    [版主回覆06/06/2013 22:24:11]個衰佬又冇講點解,淨係話覺得怪怪地咁囉!
    [寧靜中的不寧靜回覆06/06/2013 06:46:25]何解??? 係唔係佢認為通粉一定要熱食先叫通粉???
    [版主回覆06/05/2013 23:31:07]我以前都整過沙律通粉,不過袁生唔鐘意呀!

    回覆刪除
  4. 火腿加哈密瓜係我嘅最愛
    [版主回覆06/05/2013 23:31:45]原來妳同袁生係同道中人!

    回覆刪除
  5. 天氣熱 冷盤少不了
    [版主回覆06/05/2013 23:32:26]天氣咁熱,真係唔多願想煮飯,呢排都整多左冷盤!

    回覆刪除
  6. 你個法包咁大, 食到牙都軟~
    [版主回覆06/05/2013 23:33:20]都真係有少少軟架!

    回覆刪除
  7. 一D都唔簡單,我老公愛中式,我和大女亞仔愛西菜
    [版主回覆06/06/2013 22:23:31]多數男人都喜愛中式菜多D!

    回覆刪除
  8. 火腿配蜜瓜,真係好正呀~~
    [版主回覆06/14/2013 00:15:54]原來大家都愛火腿哈密瓜

    回覆刪除
  9. 風乾火腿可以係邊買呀?
    [版主回覆06/15/2013 21:18:01]我係吉吉島買,citysuper都有架!

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......