2016年4月27日 星期三

[消暑去濕系列] 西瓜皮蜜棗水 , 西瓜皮冬瓜薏米水鴨湯




前排持續落雨天蔭的日子 , 令人冇咩動力冇咩心情的情況下 , 感覺做咩都好似唔多順利

雖然這兩天太陽怕怕偶然出來服務大家 , 但依然感覺好悶焗

好鬼熱 , 袁太都開始著短衫短褲落街 , 而且屋企甚至附近周圍

陸續已經有好多蚊的出現 , 都俾d衰蚊針左唔少 ......



去街市買材料的時候 , 發現開始有靚西瓜賣

其實袁生之前已經吩咐過 , 如果係街市見到靚西瓜 , 一定要買回來俾佢做飯後果

而且西瓜 ... 相信有好多人都喜愛

而且每逢夏天熱到死或悶熱的天氣 , 它必然係最佳的消暑食品

以前只會將西瓜起肉雪凍 , 西瓜皮掉左佢的我

當某次知道西瓜皮原來好有用處之後 , 先知道以前掉左佢係一件好浪費的事

所以今次買左西瓜回來後 , 一定要用盡整個西瓜



其實西瓜除當生果外 , 亦可以用來做沙律 , 小菜或涼拌 , 如果大家有養狗狗的話

可以將西瓜皮切幼絲俾寶貝食 , 唔講唔知 , 西瓜皮對狗狗好有益處架



由於係袁生吩咐落要去街市買西瓜來做飯後果的關係

所以今次呢個西瓜會演變成三重美食


(一) 最簡單當然係將西瓜起肉來做飯後果
(二) 2/3份量西瓜皮+蜜棗用來煲西瓜皮水 , 好有消暑功效
(三) 餘下的1/3份量西瓜皮+冬瓜同水鴨煲成去濕湯水



袁太講左咁多 , 大家係咪覺得西瓜皮原來好多用途 , 下次千其唔好再浪費 , 掉晒d西瓜皮

呢個炎熱的夏天 , 大家拿拿臨去買個西瓜回來炮製獨一無二的美食呢 ^^



先將西瓜切開 , 2/3份量的西瓜起肉 , 留起白色部份及綠色外皮 , 餘下1/3份量的西瓜起肉 , 去掉綠色外皮 , 只留白色部份 , 西瓜肉蓋上保鮮紙放入雪櫃做飯後果








材料 : 西瓜皮 , 冬瓜 , 薑 , 果皮(已浸軟) , 薏米 , 水鴨 , 蜜棗 , 豆 , 鹽 , 芹菜 (裝飾可省略)




保留綠色外皮的西瓜皮洗淨抹乾水份 , 放入煲內再加入4粒蜜棗 , 適量水用中火煲15分鐘至滾











滾後蓋上蓋轉慢火煲1小時 , 煲西瓜水期間將冬瓜連皮切大件 , 薑連皮切片 , 陳皮刮去囊 , 水鴨放入水中蓋上蓋出水5分鐘後盛起放入大碗內沖洗乾淨 , 再倒去水份













西瓜水煲1小時後熄火焗10分鐘 , 待涼放入樽後入雪櫃雪凍即可





 


煲內放入水鴨 , 去掉綠色外皮的西瓜皮 , 豆 , 薏米 , 2粒蜜棗 , 薑片及陳皮 , 加入適量水用中火煲滾












加入冬瓜拌勻再煮滾 , 蓋上蓋轉慢火煲 1 1/2小時 , 最後加少許鹽調味即可







 



材料
西瓜皮 , 冬瓜1斤 , 薑 , 果皮(已浸軟) , 薏米 , 水鴨1隻 , 蜜棗6粒 , 豆 , 鹽 , 芹菜 (裝飾可省略)



做法
1. 保留綠色外皮的西瓜皮洗淨抹乾水份

2. 放入煲內再加入4粒蜜棗 , 適量水用中火煲15分鐘至滾 

3. 滾後蓋上蓋轉慢火煲1小時

4. 煲西瓜水期間將冬瓜連皮切大件 , 薑連皮切片 , 陳皮刮去囊

5. 水鴨放入水中蓋上蓋出水5分鐘後盛起放入大碗內沖洗乾淨 , 再倒去水份

6. 西瓜水煲1小時後熄火焗10分鐘 , 待涼放入樽後入雪櫃雪凍即可

7. 煲內放入水鴨 , 去掉綠色外皮的西瓜皮 , 豆 , 薏米 , 2粒蜜棗 , 薑片及陳皮

8. 加入適量水用中火煲滾 

9. 加入冬瓜拌勻再煮滾 , 蓋上蓋轉慢火煲 1 1/2小時 , 最後加少許鹽調味即可 




悶熱的天氣令人出了不少汗水 , 西瓜皮有迅速補充流失水份的功效呢 ^^



18 則留言:

  1. 通常一物二用,已經好好,你仲犀利,竟然可以三用,多謝您的分享呀.

    回覆刪除
    回覆
    1. 西瓜全個都係補,其實仲想整埋沙冰俾袁生架,不過咁啱佢肚仔痛,所以冇整

      刪除
  2. 消暑飲品+去濕湯水,袁太真係好利害,讚

    回覆刪除
  3. 好掂呀袁太,我通常都會掉西瓜皮架,原來咁有用,下次一定會留起

    回覆刪除
    回覆
    1. 我以前都會掉西瓜皮架,不過知道好有用後就唔再掉喇

      刪除
  4. 我家都係有留起西瓜皮嚟煮餸,煲湯,同煲水飲嘅習慣

    回覆刪除
  5. 西瓜皮都可以整到三重奏,真係好佩服袁太的心機同創意

    回覆刪除
    回覆
    1. 本來加埋沙冰整四重奏架,不過撞正袁生肚痛,咪冇整沙冰呢

      刪除
  6. 我都曾經用過西瓜皮煲水,好好飲呢

    回覆刪除
  7. 回覆
    1. 西瓜皮無論煲水或煲湯都好啱夏天呢

      刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......