2016年11月4日 星期五

日式鯖魚定食 (七味香煎鯖魚柳 , 昆布蜆清湯 , 白飯)




大家有冇發覺袁太平時 , 平時好少會上傳有關魚的食譜呢 ??? 皆因袁生唔太愛食魚 , 應該說他只愛桂花魚同九肚魚 , 而我就喜愛鲩魚 , 何況袁生根本唔喜愛多骨的魚 , 因怕害怕吐骨 (好似細個有陰影) , 所以真係好難搵到大家都啱食的魚 ......



事緣發生前幾日 , 袁生睇日本卡通 , 睇日本電影及劇集的時候 , 突然同我講 , 點解日本人早餐一定要有一碗飯 , 一碗味噌湯同一碟煎魚呢 ??? 當我諗緊究竟點答佢的時候 , 佢就話不如明早妳都整個日式早餐俾我喇 , 我都想試下早餐食飯會唔會飽肚d , 個一刻我當堂"O"晒嘴 , 你係咪傻架 , 咁我咪要好早起床 , 不過袁太屬於犯賤的類別 , 雖然口講話唔想咁早起身 , 但我都較定鬧鐘早些少起身處理袁生要求的飯飯早餐



袁太定的日式早餐好簡單 , 當然有白飯一碗 , 魚就唔會煎三文魚 , 會煎鯖魚柳 , 因為有次出外吃飯食過鯖魚柳後 , 我同袁生都鐘意 , 喜愛它煎完後個魚皮脆脆 , 好吸引 , 而且鯖魚柳骨唔算多 , 袁生可以食得好放心 , 而且價錢相當便宜 , 係急凍店買都係$20/3大條


 

湯方面我唔會整味噌湯 , 我最討厭味噌的味道 , 簡單用昆布 , 木魚花同蜆煲個日式蜆清湯 , 味道清得來有昆布同蜆的鮮味 , 我同袁生都好鐘意 , 昆布係屋企附近的日式超市買 , 得一款冇得選擇




個朝袁太準時鬧鐘八點響就起床 , 前一晚預先浸左昆布先 , 起床就處理鯖魚柳 , 用鹽 , 胡椒粉醃一醃佢 , 落定米煮飯 , 醃魚 , 煮飯期間就去買埋其他所需材料 , 回家就煮個湯 , 煎下魚 , 看似簡單 , 但由八點鐘起床計 , 整整下都要11點左右先有得食 , 雖然辛苦 , 但袁生見有咁豐富的早點 , 見佢食得開心滿足 , 所有辛苦都冇晒呢 ^^



材料 : 鯖魚柳 , 乾昆布 , 木魚花 , 薑 , 白蜆 , 青檸 , 滑豆腐 , 黑芝麻 , 蔥 , 鹽 , 生粉 , 七味粉 , 椒鹽 , 胡椒粉 , 水 , 隔篩




乾昆布用濕布抹乾 , 放入大碗內加2000ml水浸過夜 , 鯖魚柳洗淨用廚紙抹乾水份 , 放入器皿內加少許鹽及胡椒粉拌勻魚的兩面 , 蓋上保鮮紙靜待1小時













將浸過夜的昆布放入煲內 , 再加入浸昆布的水 , 用中火煮至微滾出現小泡泡的時候 , 加入木魚花立刻熄火 , 待3分鐘後將昆布盛起 , 其餘的用隔篩隔去木魚花 , 將昆布木魚清湯倒回煲內備用















白蜆放入大碗內加入鹽 , 加水浸過面靜待30分鐘吐沙 , 之前盛起的昆布切成幼條後用水沖洗及瀝乾 , 蔥切細粒 , 薑去皮切絲 , 豆腐切粒













昆布木魚清湯用中火煲滾後 , 加入薑絲 , 豆腐轉慢火滾10分鐘 , 醃好的鯖魚柳每面沾上薄薄的生粉 , 靜待10分鐘 , 將浸好的蜆倒去水份  ,用水再沖洗及瀝乾



















將白蜆加入昆布清湯內用中火煮至開口 , 加少許鹽調味及放入昆布條拌勻再煮滾 , 熄火焗5分鐘即成昆布蜆清湯 , 鯖魚柳切件放入鑊中用慢火慢慢煎至兩面金黃色 (先煎魚肉個邊 , 再反轉煎魚皮個邊) , 盛起放在廚紙上吸取油份 , 放上碟後灑上椒鹽及七味粉 , 青檸切件拌碟即可 , 最後蜆清湯灑上蔥粒 , 白飯灑上黑芝麻即可


























材料
鯖魚柳3條 , 乾昆布1條 , 木魚花 , 薑 , 白蜆1/2斤 , 青檸1個 , 滑豆腐1/2盒 , 黑芝麻 , 蔥 , 鹽 , 生粉 , 七味粉 , 椒鹽 , 胡椒粉 , 水 , 隔篩



做法
1. 乾昆布用濕布抹乾 , 放入大碗內加2000ml水浸過夜

2. 鯖魚柳洗淨用廚紙抹乾水份 , 放入器皿內加少許鹽及胡椒粉拌勻魚的兩面

3. 蓋上保鮮紙靜待1小時

4. 將浸過夜的昆布放入煲內 , 再加入浸昆布的水 , 用中火煮至微滾出現小泡泡的時候 

5. 加入木魚花立刻熄火

6. 待3分鐘後將昆布盛起 , 其餘的用隔篩隔去木魚花 , 將昆布木魚清湯倒回煲內備用

7. 白蜆放入大碗內加入鹽 , 加水浸過面靜待30分鐘吐沙

8. 之前盛起的昆布切成幼條後用水沖洗及瀝乾 , 蔥切細粒 , 薑去皮切絲 , 豆腐切粒 

9. 昆布木魚清湯用中火煲滾後 , 加入薑絲 , 豆腐轉慢火滾10分鐘 

10. 醃好的鯖魚柳每面沾上薄薄的生粉 , 靜待10分鐘

11. 將浸好的蜆倒去水份  ,用水再沖洗及瀝乾 

12. 將白蜆加入昆布清湯內用中火煮至開口 

13. 加少許鹽調味及放入昆布條拌勻再煮滾 , 熄火焗5分鐘即成昆布蜆清湯 

14. 鯖魚柳切件放入鑊中用慢火慢慢煎至兩面金黃色 (先煎魚肉個邊 , 再反轉煎魚皮個邊)

15. 盛起放在廚紙上吸取油份 , 放上碟後灑上椒鹽及七味粉 , 青檸切件拌碟即可 

16. 最後蜆清湯灑上蔥粒 , 白飯灑上黑芝麻即可

 


煎到脆卜卜的鯖魚柳加入椒鹽及七味粉後味道提升不少 , 絕對好好送飯 , 而蜆清湯味道美味 , 整個鯖魚定食好滿足呢 ^^





24 則留言:

  1. 很豐富的早餐呀,袁生真幸福,佢咁晏先食早餐?佢一定係大老闆,返工時間自由。

    回覆刪除
    回覆
    1. 佢唔係大老闆,只不過係自由身,接單係屋企畫圖,所以平時都好晏先食早點架

      刪除
  2. 如果王子叫我咁做,我一定唔會睬佢囉,你真係好就得佢呀

    回覆刪除
  3. 我都喜歡食鯖魚,呢個早餐好豐富。

    回覆刪除
  4. 早餐都咁豐富,袁太真係好呀

    回覆刪除
    回覆
    1. 袁生話要食,咪整俾佢食囉,費時唔整又黑面呀

      刪除
  5. 鯖魚柳煎到金金黃黃,成個餐都好正咁喎

    回覆刪除
  6. 晨咁早起身整早餐,如果換係我的另一半叫我咁做,我唔會理佢

    回覆刪除
  7. 袁生真係好幸福,每次想食咩袁太都會整,太好了

    回覆刪除
    回覆
    1. 其實係佢開到口而我又唔整的話,佢實黑面呢

      刪除
  8. WAAA...真係好太太呀袁太~
    如果我老公叫我..我應該唔采佢...哈哈!!

    回覆刪除
    回覆
    1. 其實正常的太太們都應該唔理呢,係我犯賤,寵壞左佢,哈哈...

      刪除
  9. 好靚、好有日式風味!我好少食飯做早餐,但哩個做午餐晚餐都一流呀~~

    回覆刪除
    回覆
    1. 我完全都未試過早餐係食飯,個日食完飽到夜晚個餐都唔想食^^

      刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......