[經典小食 , 派對小食] 咖哩三寶 (魚蛋 , 牛栢葉 , 魷魚)

又係繼續同大家分享為朋友家炮製的派對小食 , 上次就同大家分享左金金黃黃圓碌碌的炸薯波後 , 今次就同大家分享經典地道的香港小食 ~咖哩三寶~ ......



咖哩呢樣野可以話是香港地道小食 , 不過坊間有好多做法 , 大家都有自己秘製咖哩汁 , 而咖哩汁方面袁太當然唔會用超市一樽樽的咖哩汁 , 以前試過用現成咖哩汁烹調 , 味道感覺麻麻地 , 我同袁生唔多喜歡個味道 , 何況要為朋友做來用做派對小食 , 一定要用心製作 , 唔可以打爛自己入得廚房 , 出得廳堂的生招牌呢 , 所以袁太只用簡單的醬料 (海鮮醬 , 蠔油 , 咖哩粉等等 ... ) , 煮出一大鍋咖哩汁 , 再放入三寶材料 , 今次袁太就為朋友選擇左魚蛋 , 牛栢葉同魷魚鬚 , 當然大家可以轉用其他自己喜愛的材料灼煮 , 例如 : 白蘿蔔呀 ~~ 豬皮 , 雞翼 , 或雞翼尖都可以



當係急凍店買魚蛋 , 牛栢葉的時候 , 見到有魷魚有分魷魚鬚同魷魚頭兩款 , 魷魚頭已經切好花紋 , 好鬼方便 , 一於兩款買晒回家

連同魚蛋 , 牛栢葉一齊用來煮咖哩 , 煮好再焗佢幾粒鐘就有得食 , 其實無論用來做派對小食 , 或者用來做下午茶 , 宵夜都適合 , 我就愛用細細粒炸魚蛋的原因 , 係可以一啖一粒 , 好鬼正斗 , 好鬼爽 , 希望朋友仔會喜歡袁太做既呢款小食呢 ^^ 



材料 : 迷你炸魚蛋 , 魷魚鬚 , 魷魚頭 , 牛栢葉 , 咖哩粉 , 乾蔥頭 , 蒜頭 , 海鮮醬 , 糖 , 生粉 , 酒 , 水 , 蔥 , 薑 , 雞粉

魷魚鬚切細條 , 魷魚頭切半後放入大碗內 , 加入醃料拌勻蓋上保鮮紙靜待30分鐘 , 薑去皮切幼條 , 蔥切段 , 蒜頭 , 乾蔥頭分別去衣切粒

鑊中加入水 , 放入薑絲 , 蔥段及酒拌勻 , 加入迷你炸魚蛋 , 牛栢葉蓋上蓋用中火出水5分鐘 , 熄火焗10分鐘後隔水盛起 , 將牛栢葉切件 , 連同魚蛋用水沖一沖洗及瀝乾

燒紅鑊 , 爆香蒜粒及乾蔥粒 , 加入魷魚鬚及魷魚頭拌勻 , 加入約3湯匙水拌勻 , 蓋上蓋用中火煮3分鐘 , 煮魷魚期間將魚蛋及牛栢葉放入醃魷魚的醃料內拌勻靜待10分鐘 , 咖哩汁的材料全部放入杯內加入水拌勻備用

魷魚煮3分鐘後先盛起 , 魚蛋牛栢葉倒去醃料 , 原鑊加入魚蛋及牛栢葉拌勻 , 再加入調味料及1杯水份量拌勻 , 用中火煮滾後蓋上蓋轉慢火煮10分鐘 , 再加入魷魚一同拌勻繼續蓋上蓋用慢火煮5分鐘

煮5分鐘後熄火將材料轉放入細煲內 , 蓋上蓋焗至食前再番熱即可

材料 
迷你炸魚蛋1/2磅 , 魷魚鬚1條 , 魷魚頭 , 牛栢葉1塊 , 咖哩粉 , 乾蔥頭4粒 , 蒜頭2個 , 海鮮醬 , 糖 , 生粉 , 酒 , 水 , 蔥 , 薑 , 雞粉

醃料 
咖哩粉半茶匙 , 生抽 , 老抽 , 糖 , 生粉 , 麻油 , 酒

咖哩汁料
咖哩粉1茶匙 , 蠔油2湯匙 , 海鮮醬1湯匙 , 生抽 , 糖 , 雞粉 , 水



做法
1. 魷魚鬚切細條 , 魷魚頭切半後放入大碗內 , 加入醃料拌勻蓋上保鮮紙靜待30分鐘

2. 薑去皮切幼條 , 蔥切段 , 蒜頭 , 乾蔥頭分別去衣切粒

3. 鑊中加入水 , 放入薑絲 , 蔥段及酒拌勻

4. 加入迷你炸魚蛋 , 牛栢葉蓋上蓋用中火出水5分鐘 , 熄火焗10分鐘後隔水盛起

5. 將牛栢葉切件 , 連同魚蛋用水沖一沖洗及瀝乾 

6. 燒紅鑊 , 爆香蒜粒及乾蔥粒 , 加入魷魚鬚及魷魚頭拌勻

7. 加入約3湯匙水拌勻 , 蓋上蓋用中火煮3分鐘

8. 煮魷魚期間將魚蛋及牛栢葉放入醃魷魚的醃料內拌勻靜待10分鐘 

9. 咖哩汁的材料全部放入杯內加入水拌勻備用

10. 魷魚煮3分鐘後先盛起

11. 魚蛋牛栢葉倒去醃料

12. 原鑊加入魚蛋及牛栢葉拌勻 , 再加入調味料及1杯水份量拌勻

13. 用中火煮滾後蓋上蓋轉慢火煮10分鐘

14. 再加入魷魚一同拌勻繼續蓋上蓋用慢火煮5分鐘

15. 煮5分鐘後熄火將材料轉放入細煲內 , 蓋上蓋焗至食前再番熱即可 




一碟香噴噴的咖哩小食 , 未食都已經流晒口水呢 ^^