2017年3月25日 星期六

芝士烤菇牛肉漢堡配炸薯條




其實我一直都好想自製漢堡包 , 但無奈每次都俾袁生撥冷水 , 佢每次都話~想食包 , 去麥當當買咪得囉 , 駛咩自己整咁麻煩呀~ , 咁有時唔係想食就出去買咁簡單 , 係想享受製作過程 , 同埋令身邊的人食得開心 , 就係我喜愛入廚的原因 , 不過袁生總是不明白 ......



不過袁生又點會明我的諗法 , 講黎講去佢都唔明我講咩 , 只係成日問我點解唔出街食 , 要咁辛苦係廚房躲成半日煮餐飯 , 煮完又要洗又何必呢 ??? 睇黎袁生都係唔太識欣賞烹調的樂趣 , 不過算喇 , 只要佢唔討厭我煮的食物就OK , 所以袁太今日就點都要整個漢堡包食下 , 整漢堡包例牌材料當然係牛肉同芝士做首選 , 另外再加上我至愛的燒烤菇 , 未食都知道一定好Yummy 


仲有食漢堡包離不開一定要配炸薯條 , 自己在家製作炸薯條好簡單 , 一樣可以炸到香噴噴脆卜卜 , 炸起灑上椒鹽及七味粉 , 好味到都唔理佢熱唔熱氣呢 ^^



材料 : 燒烤菇 , 免治牛肉 , 薯仔 , 現成漢堡包 , mozzarella cheese , 洋蔥 , 原味乳酪 , 沙律醬 , 雞蛋 , 雞粉 , 辣椒粉 , 椒鹽 , 七味粉 , 黑胡椒碎 , 蒜頭 , 鹽 , 糖




薯仔去皮切粗條放入煲內 , 加入水蓋過面 , 用中火煮3分鐘後盛起薯條 , 用水沖洗及瀝乾水份 , 用廚紙抹乾再放入食物袋 , 放入冰箱冷藏1小時













免治牛肉放入大碗內 , 加入鹽 , 黃糖 , 雞粉 , 辣椒粉 , 黑胡椒碎及雞蛋拌勻靜待30分鐘 , 期間將烤菇切條 , 蒜頭去衣切粒 , 洋蔥去衣切幼絲 , 牛肉醃30分鐘後用手撻廿餘下 , 再分成兩份搓成漢堡扒狀備用


















洋蔥條及烤菇放入鑊中炒至有香味及洋蔥微軟 , 加入少許鹽及黑胡椒碎調味 , 拌勻炒數分鐘後盛起放在錫紙上稍為待涼











原鑊放入漢堡扒用慢火煎至兩面金黃色 , 灑上芝士碎及50ml水 , 蓋上蓋繼續用慢火煮至芝士溶化及水份收乾 , 盛起漢堡扒備用













薯條冷藏2小時後從冰箱取出 , 放入油鑊用慢火慢慢炸至微黃色及硬身 , 盛起放在廚紙上靜待20分鐘 , 碗內加入2湯匙乳酪及1湯匙沙律醬 , 再加入蒜蓉及少許辣椒粉拌勻成醬汁











現成漢堡包放入鑊中微微烘熱 , 先放上洋蔥烤菇 , 淋上醬汁 , 再放上漢堡扒 , 再灑上芝士碎即成 , 將薯條再回油鑊中用大火炸至金黃色 , 盛起吸取油份後灑上椒鹽及七味粉即可



















材料
燒烤菇2隻 , 免治牛肉200g , 薯仔2個 , 現成漢堡包2個 , mozzarella cheese , 洋蔥1個 , 原味乳酪 , 沙律醬 , 雞蛋1隻 , 雞粉 , 辣椒粉 , 椒鹽 , 七味粉 , 黑胡椒碎 , 蒜頭 , 鹽 , 糖



做法
1. 薯仔去皮切粗條放入煲內 , 加入水蓋過面 

2. 用中火煮3分鐘後盛起薯條 , 用水沖洗及瀝乾水份 , 用廚紙抹乾再放入食物袋 

3. 放入冰箱冷藏1小時

4. 免治牛肉放入大碗內 

5. 加入鹽 , 黃糖 , 雞粉 , 辣椒粉 , 黑胡椒碎及雞蛋拌勻靜待30分鐘

6. 期間將烤菇切條 , 蒜頭去衣切粒 , 洋蔥去衣切幼絲 

7. 牛肉醃30分鐘後用手撻廿餘下 , 再分成兩份搓成漢堡扒狀備用

8. 洋蔥條及烤菇放入鑊中炒至有香味及洋蔥微軟 , 加入少許鹽及黑胡椒碎調味 

9. 拌勻炒數分鐘後盛起放在錫紙上稍為待涼 

10. 原鑊放入漢堡扒用慢火煎至兩面金黃色

11. 灑上芝士碎及50ml水 , 蓋上蓋繼續用慢火煮至芝士溶化及水份收乾 

12. 盛起漢堡扒備用 

13. 薯條冷藏2小時後從冰箱取出 , 放入油鑊用慢火慢慢炸至微黃色及硬身 

14. 盛起放在廚紙上靜待20分鐘 

15. 碗內加入2湯匙乳酪及1湯匙沙律醬 , 再加入蒜蓉及少許辣椒粉拌勻成醬汁

16. 現成漢堡包放入鑊中微微烘熱 

17. 先放上洋蔥烤菇 , 淋上醬汁 , 再放上漢堡扒 , 再灑上芝士碎即成 

18. 將薯條再回油鑊中用大火炸至金黃色 , 盛起吸取油份後灑上椒鹽及七味粉即可 




雖然都係一人一個漢堡包同少少薯條 , 不過已經好飽飽呢 ^^




22 則留言:

  1. 薯條炸得好靚

    回覆刪除
  2. 漢堡扒足料又有薯條食,一定正過M字頭個間啦

    回覆刪除
  3. 薯條炸得咁金黃,一定好脆口呢

    回覆刪除
  4. 連薯條都有,正呀!算啦,有D人唔會明自己整同買嘅分別架~~

    回覆刪除
  5. 自己整先最好食嘛, 袁生唔識貨呢~

    回覆刪除
  6. 我想食個炸薯條呀

    回覆刪除
  7. 這個好足料啊, 仲有炸薯條, 正!

    回覆刪除