2017年5月22日 星期一

[早餐之選] 火腿粒雜豆貝殼粉




好耐 ... 好耐冇自己整過早餐 , 平時都係落街求其買個包就算 , 不過食得多麵包都會有厭倦的時候 , 如果俾我自己整早餐的話 , 我首選一定係湯粉 ......



湯粉有好多款 , 有螺絲粉 , 有蝴蝶粉 , 有長通粉同普通的通粉 , 不過我最愛係貝殼粉 , 最愛貝殼粉細細粒 , 容易入口 , 最經典煮湯粉的配料一定係火腿 , 火腿湯粉我由細到大都好鐘意食架 , 不過出街食一個早餐的火腿湯粉 , 火腿的數量真係少到有d想喊 , 自己煮就可以落多多配料同煮



今次的早餐系列 , 除左有火腿外 , 仲加左雜豆 , 甘旬絲同生菜絲 , 甘旬絲係上次整米餅的時候 , 留起少少份量用來煮貝殼粉 , 唔好浪費呀 ~~ 以往煮粉必然用雞湯做底 , 之不過而家唔食得雞 , 咁雞湯當然係唔用得喇 , 唯有簡單只用水去煮 , 煮好後只用鹽 , 胡椒粉 , 黑胡椒碎去調味 , 雖然湯底的味道比較清 , 不過反而可以突出番火腿的味道呢 ^^



材料 : 貝殼粉 , 雜豆 , 唐生菜 , 火腿扒 , 甘旬絲 , 鹽 , 胡椒粉 , 黑胡椒碎 , 水




將貝殼粉放入煲內 , 加水蓋過面 , 用中火煮滾 , 期間將火腿扒切粒 , 連同雜豆用水沖一沖洗及瀝乾 , 唐生菜切絲 , 煮貝殼粉的水滾後 , 用匙拌一拌勻預防黏底 , 煮至自己喜愛的硬度 , 盛起貝殼粉瀝乾水份  











 

煲內放入貝殼粉 , 火腿粒 , 雜豆及甘旬絲 , 加入1000ml水拌勻用中火煮滾 , 滾後加入生菜絲 , 少許鹽 , 胡椒粉調味拌勻 , 熄火焗5分鐘 , 盛起貝殼粉及配料後 , 灑上黑胡椒碎即可



















材料 
貝殼粉 , 雜豆 , 唐生菜1棵 , 火腿扒$10 , 甘旬絲 , 鹽 , 胡椒粉 , 黑胡椒碎 , 水1000ml



做法
1. 將貝殼粉放入煲內 , 加水蓋過面 , 用中火煮滾

2. 期間將火腿扒切粒 , 連同雜豆用水沖一沖洗及瀝乾 , 唐生菜切絲 

3. 煮貝殼粉的水滾後 , 用匙拌一拌勻預防黏底 , 煮至自己喜愛的硬度 

4. 盛起貝殼粉瀝乾水份  

5. 煲內放入貝殼粉 , 火腿粒 , 雜豆及甘旬絲 , 加入1000ml水拌勻用中火煮滾 

6. 滾後加入生菜絲 , 少許鹽 , 胡椒粉調味拌勻 

7. 熄火焗5分鐘 , 盛起貝殼粉及配料後 , 灑上黑胡椒碎即可 




久違了的自家製早餐 , 一碗貝殼粉配蕃茄汁 , 呢份早餐實在食得非常滿足呢 ^^





16 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......