2017年8月4日 星期五

咖哩牛筋牛展




袁生平時好喜愛去"大大活"或者"大快樂"食咖哩飯 , 不過我就反而覺得麻麻地 , 咖哩汁有時水汪汪冇咩味道 , 有時就辣到噴火 , 而且一碟得個幾舊雞 , 幾舊牛腩的咖哩 , 都要四十幾五十個大洋 , 太唔化算 ......


  
剛巧經過急凍店見有靚靚牛展 , 一於買回家來整咖哩俾袁生嘆下 , 但要整一碟香噴噴的咖哩真係唔容易架 , 最重要當然係咖哩汁 , 袁太試過用咖哩粉 , 不同牌子的咖哩汁 , 始終還是覺得利川最好 , 袁生喜愛牛展 , 而我就反而喜愛牛筋 , 不過今次的咖哩絕對冇我份 , 因為而家的袁太唔食得牛 , 所以唯有煮完的時候 , 索下香味呢 , 煮咖哩當然要加入必需品"薯仔" , 除左加薯仔外 , 仲加入蕃薯同西蘭花 , 等袁生可以有菜食下 , 起初想配薄餅 , 但袁生反對了 , 話配薄餅會唔夠飽 , 所以考慮過係都係配白飯 , 炆好一大碟 , 一餐當然食唔晒 , 食剩的留起放入百寶箱



第二日袁生突然話要用來配伊麵 , 攪到袁太急急腳去街市買伊麵 , 幸好街市婆婆還有伊麵未賣完 , 街市婆婆的伊麵賣得好快架 , 晏少少去都可能買唔到 , 都唔知係袁生好彩還是袁太幸運呢 ^^



材料 : 牛展 , 牛筋 , 薯仔 , 蕃薯 , 西蘭花 , 利川咖哩汁 , 蔥 , 薑 , 蒜頭 , 糖 , 水




蒜頭去衣拍碎 , 薑去皮切片 , 蔥切段及切幼絲 , 鑊加入薑片及蔥段 , 放入牛展及牛筋 , 蓋上蓋用中火出水5分鐘 , 將牛展盛起沖一沖洗及瀝乾 , 鑊中蓋上蓋繼續將牛筋用中出水10分鐘後熄火焗20分鐘 , 盛起切件 













西蘭花切件 , 用水沖一沖洗及瀝乾 , 放入煲內加水拌勻用中火煮5分鐘至滾起 , 盛起西蘭花瀝乾水份












燒紅鑊 , 先爆香蒜頭 , 加入牛展及牛筋炒數分鐘 , 再加入生抽 , 糖拌勻 , 加入5杯水份量拌勻用中火煮滾 , 蓋上蓋轉慢火炆1小時 , 炆牛展牛筋期間將薯仔 , 蕃薯去皮切件 , 分別用水沖一沖洗及瀝乾



















1小時後將牛展盛起切件放回鑊中 , 再加入薯仔及利川咖哩汁拌勻 , 蓋上蓋用慢火繼續炆15分鐘 , 再加入蕃薯及西蘭花拌勻 , 蓋上蓋轉用中火炆5分鐘後熄火焗30分鐘 , 將材料盛起放入煲或碗內 , 灑上蔥絲即可
























材料 
牛展1條 , 牛筋1條 , 薯仔2個 , 蕃薯1條 , 西蘭花2個 , 利川咖哩汁1罐 , 蔥 , 薑 , 蒜頭1/2個 , 糖 , 水5杯



做法
1. 蒜頭去衣拍碎 , 薑去皮切片 , 蔥切段及切幼絲 

2. 鑊加入薑片及蔥段 , 放入牛展及牛筋 , 蓋上蓋用中火出水5分鐘 

3. 將牛展盛起沖一沖洗及瀝乾 

4. 鑊中蓋上蓋繼續將牛筋用中出水10分鐘後熄火焗20分鐘 , 盛起切件 

5. 西蘭花切件 , 用水沖一沖洗及瀝乾 , 放入煲內加水拌勻用中火煮5分鐘至滾起 

6. 盛起西蘭花瀝乾水份

7. 燒紅鑊 , 先爆香蒜頭 , 加入牛展及牛筋炒數分鐘 

8. 再加入生抽 , 糖拌勻 , 加入5杯水份量拌勻用中火煮滾 , 蓋上蓋轉慢火炆1小時 

9. 炆牛展牛筋期間將薯仔 , 蕃薯去皮切件 , 分別用水沖一沖洗及瀝乾

10. 1小時後將牛展盛起切件放回鑊中 

11. 再加入薯仔及利川咖哩汁拌勻 , 蓋上蓋用慢火繼續炆15分鐘 

12. 再加入蕃薯及西蘭花拌勻 

13. 蓋上蓋轉用中火炆5分鐘後熄火焗30分鐘 , 將材料盛起放入煲或碗內 , 灑上蔥絲即可

 


一碟香噴噴的咖哩 , 未食都已經流口水 , 不過可惜我冇份食呢 ^^ 






21 則留言:

  1. 咖喱好味,牛展牛筋都好味

    回覆刪除
  2. 唔該外賣一碗咖哩伴飯啊! 哈哈😍

    回覆刪除
  3. 我什少食牛,但呢兩樣我都喜歡

    回覆刪除
    回覆
    1. 我都鐘意,不過同EE相反,想食但唔食得

      刪除
  4. 即牛筋牛展炆一時,再煮 15 分鐘,閂火焗半個鐘?

    回覆刪除
    回覆
    1. 炆1小時後加薯仔同咖哩汁再炆15分鐘,最後加西蘭花再煮5分鐘,熄火焗30分鐘就食得喇

      刪除
  5. 我都鐘意食牛筋架

    回覆刪除
  6. 哩個我中意!一定要有飯!

    回覆刪除
  7. 今晚整咗,冇落番薯,果真好味到添飯,多謝袁太��

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......