葡汁煮雜菜雜菇

繼上次煲左一大煲素上湯用黎整左紅燒豆腐煲之後 , 見還有少許上湯剩 , 又黎整一道我同袁生都非常愛吃的小菜(又係素菜黎呢) ......



其實我家袁生好鬼可愛 , 特別喜歡黃色的食物 , 例如 : 豆腐卜 , 咖哩 , 薯仔 , 酸芒果 , 零食中的黃色薯片 , 或者炸到金金黃黃的炸物他統統都愛 , 雖然袁太唔係食物 , 但我係姓黃喎 , 唔怪得知袁生喜歡我呢 (~哈~我真係一個自大狂) , 除左以上幾種食物外 , 黃色的葡汁亦係袁生的大愛 , 袁太都愛架



以往我會買一樽樽現成葡汁回家 , 簡單加水加椰漿就可以 , 雖然方便 , 但感覺味道越食越怪怪 , 越食就覺得好鹹 , 所以唯一方法就自己調製葡汁 ,  葡汁食譜由袁太媽咪提供 , 煮好後俾街買的還要香濃得多 , 本應想整葡國雞 , 不過大家知喇 , 而家袁太唔食得雞 , 所以就轉用蔬菜兼雜菇 , 蔬菜裡有袁生至愛的豆腐卜同西蘭花 , 菇類就有袁太喜愛的草菇同蘑菇 , 而且葡汁炆到收乾汁 , 完完全全俾材料索晒 , 真係飯都可以食多幾碗呢 ^^



材料 : 西蘭花 , 豆卜 , 草菇 , 啡/白蘑菇 , 甘旬 , 薯仔 , 黃薑粉 , 素上湯 , 椰漿 , 月桂葉 , 椰絲 , 洋蔥 , 胡椒粉 , 薑 , 鹽 , 糖 , 水

豆腐卜放入煲內 , 加入水用中火煮滾 , 盛起豆腐卜用水沖一沖洗去油份 , 再瀝乾及渣乾水份備用 , 西蘭花切段後用水沖洗及瀝乾 , 草菇及啡/白蘑菇沖洗乾淨切片 , 西蘭花放入煲內 , 加少許鹽及水用中火煮滾 , 盛起西蘭花瀝乾水份 , 甘旬去皮切細件 , 蒜頭去衣切粒 , 洋蔥去衣切條 , 薯仔去皮切細件 , 再用水沖一沖洗及瀝乾

 

燒紅鑊 , 爆香薑粒 , 加入洋蔥及甘旬拌勻炒至洋蔥有香味 , 再加入草菇 , 啡/白蘑菇 , 薯仔及少許鹽拌勻數分鐘

逐一加入黃薑粉 , 月桂葉 , 椰絲 , 糖 , 椰漿拌勻 , 再加入素上湯 , 2碗水份量再拌勻 , 用中火煮滾後蓋上蓋轉用慢火煮20分鐘

20分鐘後加入豆腐卜及西蘭花拌勻 , 蓋上蓋繼續用慢火煮5分鐘 , 最後加少許胡椒粉調味 , 轉用中火拌勻炒數分鐘至汁料收乾即可

材料
西蘭花2個 , 豆卜 , 草菇 , 啡/白蘑菇 , 甘旬1條 , 薯仔2個 , 黃薑粉1湯匙 , 素上湯300ml , 椰漿50ml , 月桂葉5-6片 , 椰絲 , 洋蔥1個 , 胡椒粉 , 薑 , 鹽 , 糖 , 水2杯



做法
1. 豆腐卜放入煲內 , 加入水用中火煮滾 , 盛起豆腐卜用水沖一沖洗去油份 

2. 再瀝乾及渣乾水份備用 

3. 西蘭花切段後用水沖洗及瀝乾 , 草菇及啡/白蘑菇沖洗乾淨切片 

4. 西蘭花放入煲內 , 加少許鹽及水用中火煮滾 , 盛起西蘭花瀝乾水份 

5. 甘旬去皮切細件 , 蒜頭去衣切粒 , 洋蔥去衣切條 

6. 薯仔去皮切細件 , 再用水沖一沖洗及瀝乾

7. 燒紅鑊 , 爆香薑粒 , 加入洋蔥及甘旬拌勻炒至洋蔥有香味 

8. 再加入草菇 , 啡/白蘑菇 , 薯仔及少許鹽拌勻數分鐘 

9. 逐一加入黃薑粉 , 月桂葉 , 椰絲 , 糖 , 椰漿拌勻 , 再加入素上湯 , 2杯水份量再拌勻 

10. 用中火煮滾後蓋上蓋轉用慢火煮20分鐘 

11. 20分鐘後加入豆腐卜及西蘭花拌勻 , 蓋上蓋繼續用慢火煮5分鐘 

12. 最後加少許胡椒粉調味 , 轉用中火拌勻炒數分鐘至汁料收乾即可 
 



蔬菜同菇類有益 , 而且吸收汁料的味道 , 絕對又係好拌飯系列呢 ^^