2017年9月18日 星期一

[肉燥兩食] 肉燥拌炒油麥菜 , 肉燥蒸滑滑水蛋




袁生最近學人玩牙痛 , 成個小朋友咁成日又話唔舒服 , 呢頭話牙肉腫 , 個頭又話頭痛 , 講真我每日對住你 , 何常唔係日日都頭痛 , 起初同袁生講 , 不如我整個水蛋俾你食 , 容易入口 , 點知麻煩友第一反應 , 好呀 , 不過淨水蛋我唔要 , 我要加肉燥 , 大家有睇開袁太廚房的朋友仔 , 一定會知肉燥我久唔久就會煮 , 皆因袁生好鐘意食 , 佢可以話係一個肉燥怪 ......



大家可以翻查袁太廚房過往的食譜 , 都可以容易找到有關肉燥的食譜 , 例如用來做餃子餡料 , 用來拌麵 , 配銀芽雞蛋 , 或者用來炆米我通通都做過 , 今次就簡單只用來配油麥菜同蒸滑滑水蛋



油麥菜係我同袁生都鐘意食的菜類之一 , 不過油麥菜對我來說只會有時用蒜蓉清炒 , 同埋間唔中會去超市買罐而家貴到嘔的豆豉鯪魚回來加油麥菜一齊炒 , 味道濃濃好拌飯 , 有時出外去台灣餐廳食野 , 必然會有肉燥套餐 , 只不過我從來唔會叫 , 原因好簡單 , 因為街食的實在太鹹 , 鹹到根本吞唔落口 , 所以每次我或袁生想食肉燥 , 一定會自己買材料整 , 在家整肉燥其實好簡單 , 有齊所有調味料 , 只要買豬肉碎 , 蔥頭就可以 , 先爆香豬肉碎 , 加入調味料及水拌勻用慢火煮佢1粒鐘 , 再用肉燥汁爆香蒜頭再炒菜 , 將菜先盛上碟 , 再淋上肉燥即可 , 係咪一D都唔難呢 , 另外留起少少肉燥 , 再蒸個滑滑水蛋 , 水蛋蓋上保鮮紙蒸15分鐘 , 蒸出來的滑蛋簡直滑到冇朋友 , 配上濃味的肉燥 , 真係多多碗飯都食得落 , 雖然話就話平時我地兩個都鐘意食肉燥 , 只不過食得多其實都幾厭架 , 有時懷疑袁生點解食極都唔厭



濃味的肉燥配上清爽的油麥菜 , 簡單用來拌飯都可以食到幾碗 , 閒時仲可以炆好肉燥放入雪櫃 , 想食的時候煮翻熱 , 用來拌菜 , 拌麵 , 或拌銀芽或者用來炒米炆米都一流呢 ^^



材料 : 油麥菜 , 豬肉碎 , 乾蔥頭 , 蒜頭 , 薑 , 五香粉 , 蔥 , 糖 , 鹽 , 台灣醬油膏 , 酒 , 胡椒粉 , 雞蛋 , 水




薑磨成薑汁 , 乾蔥頭去衣切粒 , 蒜頭去衣拍扁 , 蔥切粒 , 燒紅鑊 , 先爆香乾蔥粒 , 加入豬肉碎 , 贊少許酒炒至轉色 , 逐一加入糖 , 五香粉及調味料拌勻炒至豬肉鬆散及熟透 , 加入4杯水份量拌勻 , 用中火煮滾後蓋上蓋轉用慢火煮45分鐘


















期間將油麥菜切段 , 放入盆內加少許鹽用水浸過面10分鐘 , 洗淨瀝乾水份









雞蛋打入大碗內加1倍半水的份量(300ml)拌勻成蛋液 , 用隔網去雜質放入器皿內 , 再蓋上保鮮紙 , 放入電蒸鍋內蓋上蓋蒸15分鐘再焗5分鐘 

















肉燥煮45分鐘後先盛起(留少許肉燥汁在鑊內 , 用來炒菜的) , 蒜頭放入鑊中炒香 , 加入油麥菜及薑汁拌炒菜至微軟 , 蓋上蓋用慢火煮3分鐘至菜軟身熟透 , 再放入少許肉燥拌炒數分鐘即可 , 水蛋焗5分鐘後取出淋上適量肉燥 , 最後灑上蔥粒即可
























材料 
油麥菜1斤 , 豬肉碎 , 乾蔥頭3粒 , 蒜頭1個 , 薑 , 五香粉 , 蔥 , 糖 , 鹽 , 台灣醬油膏 , 酒 , 胡椒粉 , 雞蛋3隻 , 水300ml

調味料
台灣醬油膏1湯匙 , 生抽 , 老抽 , 胡椒粉



做法
1. 薑磨成薑汁 , 乾蔥頭去衣切粒 , 蒜頭去衣拍扁 , 蔥切粒 

2. 燒紅鑊 , 先爆香乾蔥粒 , 加入豬肉碎 , 贊少許酒炒至轉色 

3. 逐一加入糖 , 五香粉及調味料拌勻炒至豬肉鬆散及熟透 , 加入4杯水份量拌勻 

4. 用中火煮滾後蓋上蓋轉用慢火煮45分鐘

5. 期間將油麥菜切段 , 放入盆內加少許鹽用水浸過面10分鐘 , 洗淨瀝乾水份 

6. 雞蛋打入大碗內加1倍半水的份量(300ml)拌勻成蛋液 

7. 用隔網去雜質放入器皿內 , 再蓋上保鮮紙 

8. 放入電蒸鍋內蓋上蓋蒸15分鐘再焗5分鐘 

9. 肉燥煮45分鐘後先盛起(留少許肉燥汁在鑊內 , 用來炒菜的) 

10. 蒜頭放入鑊中炒香 , 加入油麥菜及薑汁拌炒菜至微軟 

11. 蓋上蓋用慢火煮3分鐘至菜軟身熟透 , 再放入少許肉燥拌炒數分鐘即可

12. 水蛋焗5分鐘後取出淋上適量肉燥 , 最後灑上蔥粒即可




鹹鹹的肉燥無論配上油麥菜 , 或配上清淡的滑滑水蛋 , 都係好拌飯系列首選呢 ^^







26 則留言:

  1. 呢個肉燥兩食好正喎

    回覆刪除
  2. 炒菜同蒸水蛋都一樣正正,我最鐘意個蒸水蛋,看來好滑滑

    回覆刪除
  3. 睇黎袁生真係非常鐘意食肉燥呢

    回覆刪除
    回覆
    1. 佢真係好鐘意食肉燥架,佢食極都唔會厭

      刪除
  4. 而我就鐘意食蒸水蛋個邊,因為油麥菜我麻麻地

    回覆刪除
  5. 牙痛真係好辛苦,袁生有冇睇醫生呀

    回覆刪除
    回覆
    1. 冇呀,冇睇醫生呀,話自然由佢好喎

      刪除
  6. 我個仔牙痛都係食蒸水蛋.

    回覆刪除
  7. 牙痛食蒸水蛋真係唔錯,滑嘟嘟易入口

    回覆刪除
  8. 牙痛真好慘架,我前排都牙痛,要餐餐食粥

    回覆刪除
  9. 下次再牙痛都要蒸水蛋食下

    回覆刪除
  10. 牙痛真係好慘……食水蛋啱晒~

    回覆刪除
  11. 牙痛慘過大病WO, 袁生有無去睇牙醫呀?

    回覆刪除