2018年1月5日 星期五

[火鍋底,湯麵底] 椰香沙爹湯底 / 湯烏冬




最近的天氣極為寒冷 , 每朝落街都要著番件厚褸先頂得住冷風 , 大家出門前謹記要多多保重身體 , 千其唔好冷親呀 ......



每當天氣秋涼或寒冷的時候 , 袁太多時都會在家整火鍋 , 上次袁太就同大家推介個冬蔭功湯底 , 其實除左冬蔭功湯外 , 袁生對火鍋湯底仲有好多要求 , 要求過豆漿湯底 , 豬骨湯底 , 不過袁太都會一一配合 , 但佢今次仲變態 , 居然要求沙爹湯底 , 嘩 ... 想玩我咩 ??? 沙爹湯我一次都未煲過 , 以往都係買現成包包加水煮就算 , 不過既然袁生有難題要考我 , 一於放馬過黎 , 我未驚過 , 誓要煲出一道美味的沙爹湯 , 等袁生寫個服字俾我 , 仲要等佢知道我呢個老婆係冇野難到我既



其實我曾經係電視睇過沙爹湯多數用牛骨配豬骨一齊煲 , 只不過我這邊街市得一間牛肉檔 , 唔知會唔會有得賣 , ~哈~ 點知係冇既 , 咁就將牛骨轉牛尾黎煲 , 再加上豬骨同其他材料煲, 呢個沙爹湯可以用作火鍋湯底或湯麵底 



因為袁太一向覺得沙爹係比較燥熱 , 所以煲的時候落少dd沙爹醬 , 落多左椰漿 , 咁整個沙爹湯裡面除左有濃郁牛的味道同豬的味道外 , 仲有沙爹同椰漿的香味 , 好鬼正 , 當日煲好個沙爹湯都用左黎做火鍋湯底 , 而袁太仲留起左部份牛尾同沙爹湯 , 留待翌日加烏冬作午餐   袁生食到唔停口呀 , 仲話個湯底好香好夠味呢 ^^



最近發現東南亞材料店有細細包的椰漿賣 ,  一次用一包 , 好鬼方便





材料 : 牛尾 , 豬骨 , 沙爹醬 , 洋蔥 , 蒜頭 , 乾蔥頭 , 八角 , 芹菜 , 花生碎 , 薑 , 蔥 , 椰漿 , 椰絲




牛尾 , 豬骨沖洗乾淨 , 放入煲內分別加水用中火煮滾 , 盛起用水沖一沖洗碎骨及瀝乾水份 , 洋蔥去皮切件 , 芹菜莖切段 , 用水沖一沖洗及瀝乾 , 蒜頭去衣拍扁 , 乾蔥頭去衣切半 , 薑去皮切片 , 蔥切粒


















煲內加入少許油爆香蒜頭 , 乾蔥頭 , 洋蔥及薑片 , 再加入芹菜莖 , 豬骨 , 花生碎 , 椰絲及沙爹醬拌勻炒數分鐘 , 加入熱水拌勻用中火煮滾 , 蓋上蓋轉慢火先煲1小時





















1小時後加入牛尾及適量熱水拌勻 , 滾後蓋上蓋繼續用慢火煲1 1/2小時 , 最後加入椰漿拌勻轉用中火煲滾 , 熄火焗30分鐘即可
















材料
牛尾 , 豬骨 , 沙爹醬 , 洋蔥1個 , 蒜頭1個 , 乾蔥頭2粒 , 八角2粒 , 芹菜1扎 , 花生碎 , 薑 , 蔥 , 椰漿 , 椰絲



做法
1. 牛尾 , 豬骨沖洗乾淨 , 放入煲內分別加水用中火煮滾 

2. 盛起用水沖一沖洗碎骨及瀝乾水份 

3. 洋蔥去皮切件 , 芹菜莖切段 , 用水沖一沖洗及瀝乾 

4. 蒜頭去衣拍扁 , 乾蔥頭去衣切半 , 薑去皮切片 , 蔥切粒

5. 煲內加入少許油爆香蒜頭 , 乾蔥頭 , 洋蔥及薑片 

6. 再加入芹菜莖 , 豬骨 , 花生碎 , 椰絲及沙爹醬拌勻炒數分鐘 

7. 加入熱水拌勻用中火煮滾 , 蓋上蓋轉慢火先煲1小時

8. 1小時後加入牛尾及適量熱水拌勻 , 滾後蓋上蓋繼續用慢火煲1 1/2小時 

9. 最後加入椰漿拌勻轉用中火煲滾 , 熄火焗30分鐘即可




呢個沙爹湯味道濃郁 , 無論沙爹味 , 椰漿味都好香 , 而仲仲有牛尾食 , 用作火鍋湯底 , 或者配上麵或烏冬都一樣正 , 袁生今次好滿意 , 仲叫我將自家製湯底拎出街賣添 ^^





21 則留言:

  1. 沙爹湯底作火鍋,正呀

    回覆刪除
  2. 袁太好叻啊, 我都係買現成包包. 😋

    回覆刪除
  3. 沙爹湯都可以自己煲,袁太勁呀

    回覆刪除
  4. 沙爹湯無論做火鍋湯底或麵湯底都正呀,我一定會飲埋湯

    回覆刪除
  5. 隔住個MON...肥人都聞到好香呢...

    回覆刪除
  6. 好吸引的沙爹湯底

    回覆刪除
  7. 沙爹湯底作火鍋好正呀

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......