2018年3月22日 星期四

梅菜扣肉煲




梅菜扣肉一向係袁生袁太的至愛 , 一般情況下只會出街食 , 因始終覺得自己整梅扣係好麻煩 , 同埋一定要用好長時間去煮 , 應該話係蒸的時間長 , 不過難得見有靚靚五花肉賣 , 冇理由唔買番舊整梅扣喇 ......



不過梅菜扣肉對我來說 , 我比較鐘意用梅菜撈飯多過鐘意食扣肉呢 , 之但係要買靚靚五花肉又係要睇彩數 , 好彩有靚五花肉賣 , 就買左一舊 , 買完所有材料後就好開心咁彈下彈下彈番屋企 , 回家後同袁生講今晚有梅菜扣肉食 , 以為佢會好開心喇 , 點知 ... 居然俾佢睇死我一定整得唔好味 , 超 ... 越俾袁生睇死 , 我就越要出盡全力煮 , 等佢食的時候冇聲出 , 不過我都同袁生講 , 如果整得唔好食 , 我下次咪唔再整囉 , 咁得未 ??? 



係廚房賣命咁整 , 整呀整 , 整左幾粒鐘終於攪掂 , 當然即刻要俾袁生試味 , 袁生試食完相當滿意 , 話味道好好 , 話舊五花肉半肥瘦剛剛好 , 見袁生食唔停口 , 咁即係代表下次可以再encore呢 ^^



材料 : 五花肉 , 梅菜 , 乾蔥頭 , 薑絲 , 八角 , 香葉 , 糖 , 胡椒粉 , 錫紙 , 酒 , 芫茜(裝飾可省略)




梅菜放入大碗內加水浸過面靜待1小時 , 將五花肉放入煲內 , 加入薑絲 , 八角 , 香葉 , 酒及水 , 用中火煮滾後將五花肉盛起用水沖一沖洗再抹乾水份 , 用叉係皮的位置吉幾下 , 加入老抽醃五花肉靜待1小時
 

















已醃1小時的五花肉放入油鑊中慢慢炸至金黃色 , 盛起切件放入煲內加入醃料拌勻靜待1小時











將浸好的梅菜用水沖一沖洗乾淨 , 瀝乾水份再渣乾水份後切粒 , 乾蔥頭去衣切粒 , 梅菜及乾蔥頭放入鑊中 , 加少許麻油及糖拌勻炒數分鐘有香味備用













之前切件醃好的五花肉放入錫紙盆或大碗內 , 將梅菜放面 , 再淋上醃五花肉的汁料 , 用錫紙封口 , 放入電蒸鍋內蓋上蓋蒸2小時再焗1小時 , 蒸好將五花肉放入煲內 , 淋上梅菜連汁 , 放上芫茜裝飾即可





















材料
五花肉1大舊 , 梅菜1棵 , 乾蔥頭5粒 , 薑絲 , 八角3粒 , 香葉3-4片 , 糖 , 胡椒粉 , 錫紙 , 酒 , 芫茜(裝飾可省略)

醃料
生抽 , 老抽 , 糖 , 生粉 , 麻油 , 胡椒粉 , 水



做法
1. 梅菜放入大碗內加水浸過面靜待1小時

2. 將五花肉放入煲內 , 加入薑絲 , 八角 , 香葉 , 酒及水

3. 用中火煮滾後將五花肉盛起用水沖一沖洗再抹乾水份 , 用叉係皮的位置吉幾下 

4. 加入老抽醃五花肉靜待1小時

5. 已醃1小時的五花肉放入油鑊中慢慢炸至金黃色 

6. 盛起切件放入煲內加入醃料拌勻靜待1小時

7. 將浸好的梅菜用水沖一沖洗乾淨 , 瀝乾水份再渣乾水份後切粒 , 乾蔥頭去衣切粒 

8. 梅菜及乾蔥頭放入鑊中 , 加少許麻油及糖拌勻炒數分鐘有香味備用 

9. 之前切件醃好的五花肉放入錫紙盆或大碗內

10. 將梅菜放面 , 再淋上醃五花肉的汁料 , 用錫紙封口

11. 放入電蒸鍋內蓋上蓋蒸2小時再焗1小時 

12. 蒸好將五花肉放入煲內 , 淋上梅菜連汁 , 放上芫茜裝飾即可 




雖然扣肉係好味 , 不過我還是最愛梅菜同汁料的味道 , 單單用來拌飯我都可以食到兩碗呢 ^^







28 則留言:

  1. 呢個撈飯食超正呀

    回覆刪除
  2. 請問梅菜用甜定咸的? 謝謝

    回覆刪除
  3. 嘩…引到我流口水啦

    回覆刪除
  4. 我同袁太一樣鐘意用梅菜汁撈飯架

    回覆刪除
    回覆
    1. 梅菜汁真係好好味,好難忍口唔食呢

      刪除
  5. 我係餐廳有時都會食梅菜扣肉飯,唔係每間都整得好,袁太呢個一定好好味

    回覆刪除
  6. 一大煲,我會食到三碗飯咁多架

    回覆刪除
  7. 整得仲正過街個D, 袁太叻叻. 😊

    回覆刪除
  8. 巧巧味��
    袁太。我好鍾意食八珍出品嘅零嘴八珍薑。但係成$28得100克。每次買都覺得好貴好肉赤。袁太你知唔知點樣整呀?可唔可以教我呢!��

    回覆刪除
    回覆
    1. 呢個我真係唔係好知點整喎,等我研究下先

      刪除
    2. 好的!謝謝袁太��

      刪除
    3. 唔好客氣,研究到話妳知,不過唔知要幾耐呢

      刪除
  9. 自家整,好好味,你件豬肉唔肥,我鍾意呀。

    回覆刪除
  10. 袁太你好!如果用煤氣隔水蒸要多長時間啊,多謝

    回覆刪除
    回覆
    1. 隔水蒸一樣係蒸兩個鐘再熄火焗一個鐘呢

      刪除
  11. 我以前都跟過食譜整呢個但係....我最怕就係炸呢PART!

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......