2018年4月24日 星期二

蒜香金沙骨配肉鬆薑蛋炒飯




呢幾日一時好太陽 , 一時又落雨 , 攪到個人好攰 , 大家都知 , 平時去買餸的街市攪裝修 , 又懶得搭車用行上去街市買餸 , 所以最近都只去附近急凍店睇下有咩賣 ......



係急凍店見有金沙骨賣 , 仲要啱啱開箱 , 條條都靚到冇朋友 , 20蚊/磅 , 買下買下就買左兩磅




起初想黎焗 , 後來又想煎 , 見雪櫃有冷飯 , 就決定用金沙骨配炒飯 , 又黎碟頭飯系列 , 最近炒飯最愛用肉鬆加蛋同炒 , 簡簡單單又好味 , 不過金沙骨要醃一日先可以處理 , 翌日將醃好的金沙骨沾上麵包糠一齊煎 , 表面脆脆口 , 內裡肉質嫩滑 , 配上炒飯好夾 , 下次如果再見到有靚金沙骨 , 一定要入貨用黎焗先得呢 ^^



材料 : 急凍金沙骨 , 豬肉鬆 , 冷飯 , 蒜頭 , 乾蔥頭 , 雞蛋 , 薑汁 , 糖 , 鹽 , 黑芝麻, 白芝麻 , 麵包糠 , 椒鹽 , 酒 , 蒜鹽





金沙骨用水沖一沖洗抹乾水份放入器皿內 , 加入醃料拌勻先靜待10分鐘 , 加入一半份量薑汁 , 蒜鹽及一半份量蒜頭拌勻 , 蓋上保鮮紙放入雪櫃靜待一晚

















翌日將金沙骨取出靜待30分鐘 , 乾蔥頭去衣切片 , 蒜頭去衣拍扁 , 一隻雞蛋分開蛋黃及蛋白 , 餘下兩隻雞蛋連同一隻雞蛋的蛋黃拌勻成蛋液 , 將要煎的金沙骨放入大碗內 , 加入蛋白拌及生粉拌勻靜待10分鐘















鑊中放入乾蔥片炒香 , 加入一半份量蛋液快炒至半凝固 , 加入冷飯及少許鹽拌勻炒散 , 將餘下份量的蛋液及薑汁加入 , 炒至飯乾身 , 放入豬肉鬆炒數分鐘即成肉鬆薑蛋炒飯



















金沙骨掃上油 , 灑上麵包糠 , 鑊中加入餘下一半份量蒜頭爆香 , 取出蒜頭 , 放入金沙骨用慢火慢慢煎至兩面金黃色 , 金沙骨上碟時 , 可灑上黑白芝麻或椒鹽即可












材料 
急凍金沙骨2磅 , 豬肉鬆 , 冷飯2碗 , 蒜頭1/2個 , 乾蔥頭4粒 , 雞蛋2隻 , 薑汁 , 糖 , 鹽 , 黑芝麻, 白芝麻 , 麵包糠 , 椒鹽 , 酒 , 蒜鹽

醃料 
生抽 , 老抽 , 酒 , 糖



做法
1. 金沙骨用水沖一沖洗抹乾水份放入器皿內 , 加入醃料拌勻先靜待10分鐘 

2. 加入一半份量薑汁 , 蒜鹽及一半份量蒜頭拌勻 

3. 蓋上保鮮紙放入雪櫃靜待一晚

4. 翌日將金沙骨取出靜待30分鐘 

5. 乾蔥頭去衣切片 , 蒜頭去衣拍

6. 一隻雞蛋分開蛋黃及蛋白 , 餘下兩隻雞蛋連同一隻雞蛋的蛋黃拌勻成蛋液 

7. 將要煎的金沙骨放入大碗內 , 加入蛋白拌及生粉拌勻靜待10分鐘 

8. 鑊中放入乾蔥片炒香 , 加入一半份量蛋液快炒至半凝固

9. 加入冷飯及少許鹽拌勻炒散 

10. 將餘下份量的蛋液及薑汁加入 , 炒至飯乾身 

11. 放入豬肉鬆炒數分鐘即成肉鬆薑蛋炒飯 

12. 金沙骨掃上油 , 灑上麵包糠 

13. 鑊中加入餘下一半份量蒜頭爆香 , 取出蒜頭 , 放入金沙骨用慢火慢慢煎至兩面金黃色 

14. 金沙骨上碟時 , 可灑上黑白芝麻或椒鹽即可 




脆口的金沙骨配上金金黃黃的蛋炒飯 , 今餐食得好滿足呢 ^^







20 則留言:

  1. 如有外賣,我都要一份呀

    回覆刪除
  2. 我哋好少食凍肉。見到你的排骨好新鮮,下次我都會試試。

    回覆刪除
  3. 你D住家飯真係吸引過出街食呀^^

    回覆刪除
  4. 出面一定食唔到呢個呀

    回覆刪除
  5. 回覆
    1. 今次買到咁靚的金沙骨真係好好彩呢

      刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......