香煎芙蓉蛋飯

最近都玩一碟過或一碗過 , 繼菜飯 , 焗豬扒飯之後 , 今日就有佢 , 唔知大家喜唔喜歡食煎蛋呢 ??? 我同袁生平時都好鐘意食煎蛋 , 我就比較喜愛荷包蛋 , 煎蛋角 , 不過如果要袁生選擇 , 他愛的煎蛋系列 , 唔需要問 , 他首選一定是佢最愛的芙蓉蛋吧 ......



其實芙蓉蛋都屬煎蛋系列 , 我都愛 , 愛芙蓉蛋可以加入自己喜愛的材料 , 只不過做芙蓉蛋的材料離不開都係個幾樣 , 叉燒呀~~~蝦呀~~~火腿 , 銀芽 , 韭黃咁個幾類 , 而且呢類材料全部都係袁生喜愛的食物 , 唔怪得知佢一向都鐘意食芙蓉蛋 , 每次同袁生講晚餐有芙蓉蛋食 , 佢就好似細路仔咁拍晒手 , 又或者好似食左屎咁 , 好鬼死開心 , 仲提袁太記得一定要加甜豉油 , 話有一碟芙蓉蛋飯已經好足夠 , 之不過你夠我唔夠呢 , 我點都要炒多碟菜先開飯 , 吹咩~~~



有時袁生袁太出街食飯都會點下芙蓉蛋飯 , 不過我就唔太喜愛配簡單的白飯 , 如果俾我 , 我比較鐘意配有香味的飯 , 所以煮飯的時候 , 就用薑片同蒜頭炒下d米 , 再加水放入飯煲煮 , 咁就有蒜香味重的白飯 , 配上金金黃黃的芙蓉蛋就完美呢 ^^



材料 : 雞蛋 , 叉燒 , 火腿 , 銀芽 , 韭黃 , 急凍蝦仁 , 鹽 , 生粉 , 胡椒粉 , 甜豉油 , 魚露 , 蒜頭 , 薑 , 錫紙 , 白米 , 蔥 , 洋蔥

銀芽放入煲內 , 加水拌勻用中火煮至滾起 , 盛起銀芽用水沖一沖洗及瀝乾 , 洋蔥去衣切條 , 薑去皮切片 , 蒜頭去衣拍扁 , 蔥切幼絲 , 韭黃切段 , 再用水沖一沖洗及瀝乾

白米用水沖洗及瀝乾 , 薑片及蒜頭放入鑊中爆香 , 加入白米 , 少許鹽調味拌勻炒至乾身 , 盛起放入飯煲內 , 加水(水量同平時煮飯的份量就可)拌勻 , 放入飯煲蓋上蓋開製待飯煮至熟

火腿切片 , 叉燒切條 , 急凍蝦仁加入生粉拌勻用水沖洗 , 再一次加入生粉拌勻用水沖洗多次 ,  加入熱水灼至轉色備用

燒紅鑊 , 先加入叉燒及洋蔥爆香 , 炒至洋蔥微軟 , 加入火腿 , 蝦仁及少許鹽調味炒數分鐘 , 再加入韭黃 , 銀芽拌勻 , 盛起放在錫紙上靜待20分鐘待涼

雞蛋打入大碗內拌勻打散 , 將待涼的配料放入蛋液內 , 加少許魚露及胡椒粉調味拌勻 , 靜待10分鐘 , 燒紅鑊 , 將適量的蛋漿放入鑊中 , 用慢火慢慢煎至一面金黃色後 , 反轉再用慢火煎至金黃 , 煮好的蒜香飯拌散即可

材料
雞蛋5隻 , 叉燒$25 , 火腿3片 , 銀芽$3 , 韭黃$3 , 急凍蝦仁 , 鹽 , 生粉 , 胡椒粉 , 甜豉油 , 魚露 , 蒜頭 1/2個 , 薑 , 錫紙 , 白米2杯 , 蔥 , 洋蔥1個



做法
1. 銀芽放入煲內 , 加水拌勻用中火煮至滾起 , 盛起銀芽用水沖一沖洗及瀝乾

2. 洋蔥去衣切條 , 薑去皮切片 , 蒜頭去衣拍扁 , 蔥切幼絲 

3. 韭黃切段 , 再用水沖一沖洗及瀝乾

4. 白米用水沖洗及瀝乾 

5. 薑片及蒜頭放入鑊中爆香 , 加入白米 , 少許鹽調味拌勻炒至乾身 

6. 盛起放入飯煲內 

7. 加水(水量同平時煮飯的份量就可)拌勻 , 放入飯煲蓋上蓋開製待飯煮至熟

8. 火腿切片 , 叉燒切條 

9. 急凍蝦仁加入生粉拌勻用水沖洗 , 再一次加入生粉拌勻用水沖洗多次 

10. 加入熱水灼至轉色備用

11. 燒紅鑊 , 先加入叉燒及洋蔥爆香 , 炒至洋蔥微軟 

12. 加入火腿 , 蝦仁及少許鹽調味炒數分鐘 , 再加入韭黃 , 銀芽拌勻 

13. 盛起放在錫紙上靜待20分鐘待涼

14. 雞蛋打入大碗內拌勻打散 

15. 將待涼的配料放入蛋液內 , 加少許魚露及胡椒粉調味拌勻 , 靜待10分鐘

16. 燒紅鑊 , 將適量的蛋漿放入鑊中 , 用慢火慢慢煎至一面金黃色後 

17. 反轉再用慢火煎至金黃 , 煮好的蒜香飯拌散即可 




餡料多多的美味芙蓉蛋 , 配上用蒜頭 , 薑片煮的白飯 , 簡單又美味呢 ^^