[可樂餅] 粟米魚柳炸薯餅

一個好好聽的名字"可樂餅" , 亦即係炸薯餅 , 香香脆脆的外表 , 加上軟綿綿的薯蓉餡 , 熱辣辣炸起來最美味 , 袁太可以一個人食好多件 , 不過都係個句~好熱氣呢~ ......

不過其實美味的可樂餅並唔係一定要薯蓉餡 , 可以南瓜餡 , 亦可以用咖哩餡 , 但愛傳統的我 , 如要自家製 , 當然以薯蓉餡做首選 , 整可樂餅好處的地方 , 係可以加入自己喜愛的食材 , 放入薯蓉內一同拌勻成餡料 , 如大家喜愛雜菜 , 可加雜菜 , 喜愛肉類的話 , 可加牛肉 , 而我就最喜愛加粟米同魚柳呢類比較清清地的餡料 , 同時亦可減少心裡的罪惡感



平時最愛係日式超市買呢款麵包糠 , 價錢相當便宜又方便呢

大家都知 , 袁生袁太一向係炸物怪 , 食得多煎炸物 , 面上已急不及待長了兩 , 三粒豆豆 , ~哈~ 畢竟袁太還是好青春吧 , 平日閒時 , 可以整定薯餅放入冰箱 , 想幾時食 , 拎出稍為解凍 , 放入鑊半煎炸就可以 , 袁太最愛沾上少許沙律醬一齊食 , 咁美味的可樂餅 , 唔知大家一口氣可以食到幾多件呢 ???



材料 : 薯仔 , 龍利柳 , 粟米 , 麵粉 , 雞蛋 , 麵包糠 , 鹽 , 黑胡椒碎 , 沙律醬

薯仔去皮切粒 , 放入電蒸鍋內蓋上蓋蒸20分鐘再焗10分鐘 , 蒸好薯仔再蒸粟米 , 粟米放入電蒸鍋內蓋上蓋蒸15分鐘 , 蒸粟米期間 , 將蒸好的薯仔放入大碗內 , 加少許鹽及黑胡椒碎拌勻壓成蓉

蒸好的粟米起出粟米粒 , 魚柳切粒 , 薯蓉內加入粟米粒及魚柳拌勻 , 將適量的餡料搓成圓形再稍為壓平 , 蓋上保鮮紙放入雪櫃靜待30分鐘 , 期間將雞蛋拌勻成蛋液備用

30分鐘後薯餅從雪櫃取出 , 依次序沾上麵粉 >> 雞蛋液 >> 麵包糠 , 放上碟後再灑上少許麵包糠 , 蓋上保鮮紙放入冰箱冷藏1小時 , 1小時後取出靜待10分鐘 , 最後將薯餅以半煎炸方式 , 放入鑊中用慢火慢慢煎至兩面金黃色即可 

 
材料
薯仔3個 , 龍利柳1條 , 粟米1條 , 麵粉 , 雞蛋2隻 , 麵包糠 , 鹽 , 黑胡椒碎 , 沙律醬



做法

1. 薯仔去皮切粒 , 放入電蒸鍋內蓋上蓋蒸20分鐘再焗10分鐘 

2. 蒸好薯仔再蒸粟米 , 粟米放入電蒸鍋內蓋上蓋蒸15分鐘 

3. 蒸粟米期間 , 將蒸好的薯仔放入大碗內 , 加少許鹽及黑胡椒碎拌勻壓成蓉

4. 蒸好的粟米起出粟米粒 , 魚柳切粒 

5. 薯蓉內加入粟米粒及魚柳拌勻 

6. 將適量的餡料搓成圓形再稍為壓平 , 蓋上保鮮紙放入雪櫃靜待30分鐘 

7. 期間將雞蛋拌勻成蛋液備用

8. 30分鐘後薯餅從雪櫃取出 , 依次序沾上麵粉 >> 雞蛋液 >> 麵包糠 

9. 放上碟後再灑上少許麵包糠 , 蓋上保鮮紙放入冰箱冷藏1小時

10. 1小時後取出靜待10分鐘

11. 最後將薯餅以半煎炸方式 , 放入鑊中用慢火慢慢煎至兩面金黃色即可 




金金黃黃熱辣辣 , 外脆內軟滑薯蓉香味的可樂餅 , 真係好想快快咬你一口呢 ^^