[阿華田食譜] 阿華田麻糬波波

袁太好耐好耐出食譜係冇步驟圖呢 , 點解 ??? 皆因上次過相時手殘 , 一delete , 就delete左好多相 , 有好幾個食譜係完全俾我刪晒 , 呢個係其中次一 ......



說回主題 , 大家喜愛食麻糬波波嗎 ??? 我就唔太喜歡 , 之不過我家中麻煩友就喜愛到不得了 , 無論芝士波波 , 綠茶波波 , 甚至今次袁太整的朱古力波波佢都喜歡 , 今次的麻糬波波又係阿華田食譜 , 用阿華田營養麥芽粉製作 , 用機智豆當朱古力粒用 , 搓成波波圓球型後放入焗爐焗 , 25分鐘就出爐喇 , 食的時候再灑d阿華田營養麥芽粉就食得 , 初初出爐時袁生已經食左2個 , 大讚好味 , 袁太雖然唔多鐘意食 , 但都想試一個 , 點知想食的時候先發現 , 原來全部已經俾袁生食晒

袁生以為袁太唔食 , 所以係冇問我的情況下已經吞晒落肚 , 究竟袁太應該開心 , 還是唔開心好呢 ??? 開心袁生鐘意食 , 鐘意到一個都唔留俾我 , 還是唔開心佢食晒唔預番個俾我呢 ^^

材料
木薯粉15g , 糯米粉130g , 阿華田營養麥芽粉1/2包 , 鹽少許 , 砂糖30g , 牛油溶液30g , 雞蛋1隻 , 牛奶35g , 阿華田機智豆1包   



做法
1. 焗爐用180C預熱10分鐘

2. 木薯粉 , 糯米粉 , 阿華田營養麥芽粉放入大碗內拌勻 , 再加少許鹽拌勻

3. 砂糖 , 牛油溶液 , 雞蛋加入做法<2>內拌勻 , 再逐少加入牛奶拌勻

4. 阿華田機智豆弄碎加入做法<3>內拌勻

5. 取起一湯匙份量麵糰 , 搓成圓球 , 表面沾上少量糯米粉後放在焗盤上 

6. 入焗爐用180C上下火焗25分鐘

7. 取出灑上阿華田營養專芽粉即可

  


雖然袁太一個都冇食 , 但見個賣相都覺得唔錯呢^^