自家製柚子蜜

咁多位~中秋節快樂~ , 每逢中秋節前後 , 街市 , 超市都陸續見有柚子賣 , 價錢便宜 , 不過袁生袁太一向都唔太喜歡食柚子 , 但我家袁生就好喜愛飲柚子蜜 , 大家知喇 , 市面賣一樽樽的柚子蜜都幾貴 , 自家製價錢便宜 , 仲冇防腐劑 , 好健康呢 ......

其實以前袁太都買一大樽柚子蜜回家俾袁生 , 不過根本飲極都飲唔晒 , 因買回家的時候總是滿心歡喜 , 每次總會立即沖一杯 , 但當沖了五六次後就放在雪櫃長眠 , 唔會再有人理樽柚子蜜



難得中秋節有柚子賣 , 當然整番樽自家製版 , 細細樽一定清得晒 , 不過自己整柚子蜜其實都幾繁複 , 又要浸 , 又要煮一煮 , 又要加柚子肉 , 冰糖再煮一粒鐘 , 煮完就加蜜糖拌勻 , 待涼入樽 , 當整完柚子蜜的時候 , 就沖一杯俾袁生試下 , 袁生好滿意 , 仲大讚俾街既還是好味 , 一樽樽金金黃黃靚靚仔仔的柚子蜜 , 味道超正~讚讚~ , 大家襯而家仲有柚子賣 , 就試下動手做吧 , 大家一定會喜歡呢 ^^

材料 : 金柚 , 冰糖 , 蜜糖 , 鹽 , 玻璃樽 , 隔篩 , 刀

金柚放入大碗內 , 加鹽及水沖洗金柚表面 , 用毛巾抹乾水份 , 用刀將柚子皮起出 , 柚子皮的白色部份盡量切去 , 柚子皮切成幼條

將切條的柚子皮放入大碗內 , 加少許鹽及水浸30分鐘 , 期間將柚子肉去掉白色外皮後撕成細塊 , 浸30分鐘的柚子皮條用水沖一沖洗及瀝乾水份後放入鑊中 , 加約200ml水拌勻 , 蓋上蓋用慢火先煮10分鐘

10分鐘後將柚子皮盛起 , 用水沖一沖洗及瀝乾後再放入鑊中 , 加200ml水拌勻 , 蓋上蓋再用慢火煮5分鐘 , 再將柚子皮盛起 , 用水沖一沖洗及瀝乾

再將柚子皮回鑊中 , 逐一加入柚子肉 , 500ml水及冰糖拌勻 , 先用中火煮至冰糖溶掉後 , 蓋上蓋轉慢火煮60分鐘 , 期間不時要開蓋拌一拌勻以免黏底 , 拌勻後再蓋上蓋用慢火繼續煮 , 煮好60分鐘後盛起放入大碗內待涼20分鐘 , 最後加入蜜糖拌勻入玻璃樽即可(入樽後放入雪櫃可保存3個月左右)

材料

金柚1個 , 冰糖200g , 蜜糖6湯匙 , 鹽 , 玻璃樽 , 隔篩 , 刀

做法

1. 金柚放入大碗內 , 加鹽及水沖洗金柚表面 , 用毛巾抹乾水份 

2. 用刀將柚子皮起出 

3. 柚子皮的白色部份盡量切去 , 柚子皮切成幼條

4. 將切條的柚子皮放入大碗內 , 加少許鹽及水浸30分鐘 

5. 期間將柚子肉去掉白色外皮後撕成細塊 

6. 浸30分鐘的柚子皮條用水沖一沖洗及瀝乾水份後放入鑊中 , 加約200ml水拌勻 

7. 蓋上蓋用慢火先煮10分鐘

8. 10分鐘後將柚子皮盛起 , 用水沖一沖洗及瀝乾後再放入鑊中 

9. 加200ml水拌勻 , 蓋上蓋再用慢火煮5分鐘 

10. 再將柚子皮盛起 , 用水沖一沖洗及瀝乾

11. 再將柚子皮回鑊中 , 逐一加入柚子肉 , 500ml水及冰糖拌勻 

12. 先用中火煮至冰糖溶掉後 , 蓋上蓋轉慢火煮60分鐘 

13. 期間不時要開蓋拌一拌勻以免黏底 , 拌勻後再蓋上蓋用慢火繼續煮 

14. 煮好60分鐘後盛起放入大碗內待涼20分鐘 

15. 最後加入蜜糖拌勻入玻璃樽即可 (入樽後放入雪櫃可保存3個月左右)
  

自家製的柚子蜜勝在無添加 , 簡單加入熱水或凍水就飲得 , 仲可以用黎煮餸添呢 ^^