2018年11月2日 星期五

清湯白蘿蔔炆豬軟骨




前排袁太媽咪俾左豬軟骨我 , 成日話唔趁後生時補下d骨 , 老左就辛苦 , 多病痛喎 , 其實豬軟骨俾我選擇 , 我會用來煲湯 , 或者用來炆 , 但用黎煲湯又驚好油 , 都係用來炆好d ......



袁太今次會簡單選擇用清湯炆 , 本來想用咖哩炆 , 因我覺得袁生會比較喜愛咖哩多一點 , 之但係袁太呢排比較熱氣 , 清湯感覺好好多 , 配上最愛的白蘿蔔一齊炆 , 白蘿蔔入晒味 , 好鬼正 , 而且清湯汁用來拌飯食真係好一流 , 炆左個半鐘左右 , 無論白蘿蔔 , 豬軟骨都入晒味 , 袁生食唔停口 , 袁太細細聲話大家知 , 平時袁生唔係咁鐘意食豬軟骨架 , 不過今次見佢食左好多 , 唔駛問都知啱佢口味



食唔晒的白蘿蔔炆豬軟骨 , 放入雪櫃一晚 , 翌日再加熱 , 配上河粉或米粉做午餐都好好味道呢 ^^



材料 : 急凍豬軟骨 , 白蘿蔔 , 黑白胡椒粒 , 薑 , 蔥 , 蒜頭 , 乾蔥頭 , 八角 , 月桂葉 , 冰糖 , 上湯 , 酒 , 水


  
 
豬軟骨用水沖洗 , 抹乾水份 , 薑去皮切絲 , 蒜頭 , 乾蔥頭去衣切碎 , 蔥分別切段 , 切粒及幼絲 , 豬軟骨放入鑊中 , 加入蔥段 , 薑絲 , 酒及水 , 蓋上蓋用中火出水10分鐘 , 盛起用水沖一沖洗及瀝乾
















鑊中加入黑白胡椒粒 , 蒜粒及乾蔥粒爆香 , 加入豬軟骨 , 贊少許酒拌勻炒數分鐘 , 加入上湯 , 水拌勻 , 再加入冰糖 , 八角及月桂葉 , 用中火煮滾後蓋上蓋轉慢火炆1小時 , 期間將白蘿蔔去皮切件



















1小時後加入白蘿蔔拌勻蓋上蓋繼續用慢火炆30分鐘 , 熄火焗1小時即可













材料
急凍豬軟骨2磅 , 白蘿蔔1條 , 黑白胡椒粒 , 薑 , 蔥 , 蒜頭1/2個 , 乾蔥頭2粒 , 八角3粒 , 月桂葉4-5片, 冰糖 , 上湯300ml , 酒 , 水4杯



做法
1. 豬軟骨用水沖洗 , 抹乾水份 

2. 薑去皮切絲 , 蒜頭 , 乾蔥頭去衣切碎 , 蔥分別切段 , 切粒及幼絲 

3. 豬軟骨放入鑊中 , 加入蔥段 , 薑絲 , 酒及水 , 蓋上蓋用中火出水10分鐘 

4. 盛起用水沖一沖洗及瀝乾

5. 鑊中加入黑白胡椒粒 , 蒜粒及乾蔥粒爆香 , 加入豬軟骨 , 贊少許酒拌勻炒數分鐘 

6. 加入上湯 , 水拌勻 

7. 再加入冰糖 , 八角及月桂葉 , 用中火煮滾後蓋上蓋轉慢火炆1小時 

8. 期間將白蘿蔔去皮切件

9. 1小時後加入白蘿蔔拌勻蓋上蓋繼續用慢火炆30分鐘 , 熄火焗1小時即可
 



加入黑白胡椒炆豬軟骨 , 夠惹味 , 而且白蘿蔔入晒味 , 好味道呢 ^^








22 則留言:

  1. 白蘿蔔豬軟骨都美味

    回覆刪除
  2. 我想食白蘿蔔

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......