京蔥魚露焗雞扒配菜飯

無意中係冰箱又發現左兩塊大雞扒 , 心諗乾煎好還是開焗爐焗好 ??? 問袁生想點整 , 佢既答案例牌個句 ~是但~ , 即係冇一個特定的答案俾我 , 咁就不如又煎又焗喇 ......



所謂的又煎又焗 , 其實即係煎左塊雞扒表面變成金黃色先 , 再放入焗爐焗至熟 , 用焗的方式去整雞扒 , 雞扒肉好嫩滑 , 絕對唔鞋口 , 平時整雞扒都鐘意簡單只用魚露 , 蒜頭醃 , 蒜頭的香味同魚露好夾 , 另外再加上京蔥一齊焗 , 京蔥都屬於蔬菜類 , 咁就有肉有蔬菜 , 再煮個白飯就可以開餐 , 夠簡單夠方便



不過今次唔想配白飯 , 想配菜飯 , 因我家袁生好鬼鐘意食菜飯 , 應該話佢係喜愛小棠菜至真 , 起初焗雞扒的時候 , 一路焗一路想 , 究竟兩塊雞扒袁生食唔食得晒 ??? 袁太而家唔食得雞 , 因塊雞扒都好大塊 , 焗完之後切件真的覺得份量有點多 , 最終開飯的時候 , 袁生真係好辛苦先食得晒 , 因為食半塊已經有少少飽的感覺 , 另外京蔥焗完香噴噴 , 用來拌飯好味道呢 ^^



材料 : 雞扒 , 魚露 , 蒜頭 , 京蔥 , 酒 , 白米 , 小棠菜 , 薑 , 乾蔥頭 , 胡椒粉 , 上湯 , 水 , 鹽 , 焗爐紙 , 錫紙 , 美的早餐機(MZ-DSY18A) , 美的智能高速鍋(MY-SS5033)

京蔥斜切件 , 蒜頭去衣切粒 , 乾蔥去衣切粒 , 薑去皮磨成薑汁 , 雞扒解凍後用水沖一沖洗兩面再抹乾水份 , 放入器皿內加入魚露 , 醃料 , 少少蒜粒拌勻 , 先醃雞肉個邊 , 靜待30分鐘 , 30分鐘後將雞扒反轉醃雞皮個邊 , 再靜待30分鐘 , 期間將小棠菜加少許鹽 , 再加水浸過面靜待10分鐘 , 用水沖洗乾淨後切碎 , 白米用水沖洗及瀝乾

鑊中加入油燒熱 , 爆香乾蔥粒及餘下蒜粒 , 加入白米炒至乾身 , 加少許鹽及1杯份量上湯拌勻炒至上湯收乾 , 將白米轉放入美的智能高速鍋的煲內 , 加入餘下份量上湯及水拌勻(水的份量至平時煮飯的水量即可) , 蓋上蓋按<米飯>功能 , 再按<開始> , 之後會有時間顯示需時多久 , 焗爐用200C預熱10分鐘

 

焗盆放上焗爐紙 , 放上一半份量京蔥 , 醃好的雞扒放入美的早餐機的煎pan內 , 按<煎餅>功能 , 將雞扒兩面煎至金黃色(煎雞扒的油留起) , 煎完兩塊雞扒後放在京蔥上 , 淋上煎雞扒的油及醃雞扒的蒜粒 , 蓋上錫紙 , 放入焗爐用200C上下火先焗20分鐘 , 20分鐘後將錫紙取走 , 將雞扒反轉(雞皮向上) , 再放上剩餘的一半京蔥 , 放入焗爐用200C上下火焗10分鐘 , 取出靜待10分鐘

高速鍋煮完後會發出嗶嗶聲響 , 焗10分鐘 , 小棠菜放入鑊中 , 加少許鹽及薑汁拌勻 , 蓋上蓋用慢火煮3分鐘至小棠菜軟身 , 盛起放入白飯內拌勻成菜飯即可

材料
雞扒2塊 , 魚露 , 蒜頭1個 , 京蔥1條 , 酒 , 白米2杯 , 小棠菜1/2斤 , 薑 , 乾蔥頭1粒 , 胡椒粉 , 上湯300ml , 水 , 鹽 , 焗爐紙 , 錫紙 , 美的早餐機(MZ-DSY18A) , 美的智能高速鍋(MY-SS5033)

醃料
魚露3湯匙 , 生抽 , 老抽 , 黃糖 , 酒



做法
1. 京蔥斜切件 , 蒜頭去衣切粒 , 乾蔥去衣切粒 , 薑去皮磨成薑汁

2. 雞扒解凍後用水沖一沖洗兩面再抹乾水份 

3. 放入器皿內加入魚露 , 醃料 , 少少蒜粒拌勻 , 先醃雞肉個邊 , 靜待30分鐘

4. 30分鐘後將雞扒反轉醃雞皮個邊 , 再靜待30分鐘 

5. 期間將小棠菜加少許鹽 , 再加水浸過面靜待10分鐘 , 用水沖洗乾淨後切碎 

6. 白米用水沖洗及瀝乾

7. 鑊中加入油燒熱 , 爆香乾蔥粒及餘下蒜粒 , 加入白米炒至乾身 

8. 加少許鹽及1杯份量上湯拌勻炒至上湯收乾 

9. 將白米轉放入美的智能高速鍋的煲內 , 加入餘下份量上湯及水拌勻
   (水的份量至平時煮飯的水量即可)

10. 蓋上蓋按<米飯>功能 , 再按<開始> , 之後會有時間顯示需時多久

11. 焗爐用200C預熱10分鐘

12. 焗盆放上焗爐紙 , 放上一半份量京蔥 

13. 醃好的雞扒放入美的早餐機的煎pan內 , 按<煎餅>功能 , 將雞扒兩面煎至金黃色(煎雞扒的油留起) 

14. 煎完兩塊雞扒後放在京蔥上 , 淋上煎雞扒的油及醃雞扒的蒜粒 , 蓋上錫紙 

15. 放入焗爐用200C上下火先焗20分鐘

16. 20分鐘後將錫紙取走 , 將雞扒反轉(雞皮向上) , 再放上剩餘的一半京蔥 

17. 放入焗爐用200C上下火焗10分鐘 , 取出靜待10分鐘

18. 高速鍋煮完後會發出嗶嗶聲響 , 焗10分鐘 

19. 小棠菜放入鑊中 , 加少許鹽及薑汁拌勻 , 蓋上蓋用慢火煮3分鐘至小棠菜軟身

20. 盛起放入白飯內拌勻成菜飯即可 




雞扒入焗爐焗完依然嫩滑 , 京蔥又焗到香噴噴 , 而且配上菜飯 , 袁生食得好滿足呢 ^^