2019年2月6日 星期三

[賀年炸物] 一口笑口棗




咁多位恭喜發財 , 今日係年初二 , 袁生袁太祝大家身體健康 , 心想事成 , 豬年行大運 , 無論打工或做生意的朋友們 , 今年都搵多d錢同賺多d錢 , 亦希望袁生今年畫圖生意繼續賺多d , 繼續養到我肥肥白白 ......



繼續為大家上傳賀年食譜 , 賀年炸物裡面,  袁太最喜歡就係笑口棗同角仔 , 角仔我習慣出外買 , 因又要預備餡料 , 又要搓皮 , 又要包 , 最大問題係袁太從未整過角仔 , 費時整得唔好又俾袁生鬧浪費食材 , 所以都係出去買較為保險 , 既然唔整角仔 , 咁就整笑口棗喇 , 笑口棗相對比較容易整 , 搓下粉糰再搓圓 , 沾下白芝麻拎去炸就得 , 好鬼簡單 , 袁太今次一炸就炸左好多 , 不過食下一粒 , 食下又一粒 , 其實都好快已經清晒呢 ^^



材料 : 麵粉 , 泡打粉 , 雞蛋 , 白芝麻 , 水 , 白砂糖 , 油 , 刮刀 , 錫紙 , 美的免油健炸寶(MF20B)




麵粉及泡打粉放入大碗內拌勻 , 雞蛋放入碗內 , 加入砂糖及油拌勻 , 倒入麵粉泡打粉內 , 再加入100ml水 , 用刮刀拌成粉糰 , 用手慢慢將粉糰搓成光滑麵糰 , 將麵糰放入碗內 , 蓋上保鮮紙靜待15分鐘 




















將麵糰搓成長條型再切件 , 用手搓成圓形 , 將每粒沾少許水再沾上白芝麻 , 健炸寶放上錫紙 , 放上粒粒芝麻麵糰 , 180C25分鐘成金黃色 , 或將油鑊燒熱 , 放入芝麻麵糰用慢火慢慢炸 , 炸至爆開及成金黃色後盛起 , 瀝乾油份即可





























 
材料
麵粉200g , 泡打粉1茶匙 , 雞蛋1隻 , 白芝麻 , 水100ml , 白砂糖80g , 油 , 刮刀 , 錫紙 , 美的免油健炸寶(MF20B)



做法
1. 麵粉及泡打粉放入大碗內拌勻 

2. 雞蛋放入碗內 , 加入砂糖及油拌勻 

3. 倒入麵粉泡打粉內 , 再加入100ml水 , 用刮刀拌成粉糰 

4. 用手慢慢將粉糰搓成光滑麵糰 , 將麵糰放入碗內 

5. 蓋上保鮮紙靜待15分鐘  

6. 將麵糰搓成長條型再切件 , 用手搓成圓形 , 將每粒沾少許水再沾上白芝麻 

7. 健炸寶放上錫紙 , 放上芝麻麵糰 , 180C25分鐘成金黃色

8. 或將油鑊燒熱 , 放入芝麻麵糰用慢火慢慢炸 , 炸至爆開及成金黃色後盛起 

9. 瀝乾油份即可 




細細粒的笑口棗 , 一口一粒 , 夠脆口 , 夠鬆化 , 好味道 , 祝大家成年都笑口常開呢 ^^









14 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......