2019年8月29日 星期四

<美的多功能食物料理廚師機MKM45食譜> 手抓芝麻蔥油餅




袁太好鐘意食蔥油餅 , 經常都會出街買回家慢慢嘆 , 不過蔥油餅呢樣野絕對係即煎即食先最好味 , 凍左又淋又油唔好味 , 而且街買的蔥油餅有時好厚 , 有時食落口又硬 , 又成口粉味 , 都冇一間覺得好味 , 不過袁太一向搓麵糰唔叻 , 之但係而家有Midea廚師機幫手 , 就唔駛再愁搓麵糰的問題 , 何況自家製蔥油餅 , 一定要落多多蔥先得 ......



決定整就快快手買材料 , 整蔥油餅係要中筋麵粉 , 係東南亞材料店見有得賣 , 就買左一包




袁太版的蔥油餅除左基本材料外 , 還另外加入黑芝麻同白芝麻 , 令蔥油餅變得更香口 , 唔叻搓麵糰的我 , 有廚師機幫忙 , 好輕鬆就有靚靚麵糰 , 拿拿臨去發酵 , 發酵完就壓薄 , 掃油 , 加蔥 , 加黑白芝麻 , 捲起再捲成蛇餅形再壓扁就得 , 簡單放入鑊煎至金黃色就有得食 



熱辣辣煎好的蔥油餅好香好香 , 外脆內軟 , 我最愛食邊邊的脆口位 , 再配上自家製的燕麥少甜熱豆漿 , 呢份早餐簡直完美呢 ^^

 
材料 : 中筋麵粉 , 黑芝麻 , 白芝麻 , 蔥 , 油 , 鹽 , 糖 , 酵母粉 , 水 , 掃 , 麵棍 , 刮刀 , 切刀 , 美的多功能食物料理廚師機(MKM45)




廚師機換上製作麵糰的工具 , 中筋麵粉放入器皿內 , 加少許鹽 , 糖及酵母粉拌勻 , 再加入水拌勻至糰狀 , 廚師機調較1度打成麵糰 , 取出麵糰再略略搓成光滑麵糰 , 將麵糰放入碟或碗內 , 蓋上保鮮紙靜置35分鐘 , 期間將蔥切粒
 























將麵糰分成6份 , 用麵掍將麵糰壓薄 , 掃上油 , 灑上蔥粒 , 加少許鹽 , 灑上黑芝麻及白芝麻 , 從較長個邊開始卷起 , 捲成長條後再捲成蛇餅狀 , 再用麵掍壓扁 , 全部麵糰壓扁後靜置10分鐘 , 鑊中加少許油燒熱 , 放入麵糰用慢火慢慢煎至兩面金黃色即可

























蔥油餅點可以唔配上熱豆漿呢 , 簡單將黃豆洗淨加水浸一晚 , 翌日放入破壁機內 , 加入少許即食燕麥片及冰糖 , 蓋上蓋按<豆漿>功能 , 35分鐘後就有美味的燕麥豆漿喇







材料  
中筋麵粉250g , 黑芝麻 , 白芝麻 , 蔥 , 油 , 鹽1茶匙 , 糖1茶匙 , 酵母粉1/4茶匙 , 水150ml , 掃 , 麵棍 , 刮刀 , 切刀 , 美的多功能食物料理廚師機(MKM45)



做法
1. 廚師機換上製作麵糰的工具 

2. 中筋麵粉放入器皿內 , 加少許鹽 , 糖及酵母粉拌勻 , 再加入水拌勻至糰狀 

3. 廚師機調較1度打成麵糰 , 取出麵糰再略略搓成光滑麵糰

4. 將麵糰放入碟或碗內 , 蓋上保鮮紙靜置35分鐘 

5. 期間將蔥切粒

6. 將麵糰分成6份 , 用麵掍將麵糰壓薄 

7. 掃上油 , 灑上蔥粒 , 加少許鹽 , 灑上黑芝麻及白芝麻 

8. 從較長個邊開始卷起 , 捲成長條後再捲成蛇餅狀 , 再用麵掍壓扁 

9. 全部麵糰壓扁後靜置10分鐘 

10. 鑊中加少許油燒熱 , 放入麵糰用慢火慢慢煎至兩面金黃色即可 




外脆內軟的黑芝麻蔥油餅 , 加上熱豆漿簡直絕配的完美早餐 , 熱豆漿加蛋都相當美味呢 ^^














5 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......