有機生活

太子-芥菜籽

灣仔-菜菜子

最近袁太無意中愛上左有機食物,
呢個星期周圍去有機的舖頭睇下有咩賣,
雖然有機的蔬菜,
比
起普通街市買的價錢貴約一倍,
但真係好新鮮,
所以袁太都唔執輸買左菜心同芥蘭番屋企!
另外袁太係其他blog友到睇到,
好多blog友都話康寧牛奶好好味,
所以買左兩支番屋企,
但唔知係袁生袁太唔識品嘗還是點樣,
兩公婆都覺得味道淡左少少,
唔係太鐘意!

康寧牛奶

川貝雪梨栗子排骨湯

今日係街市生果檔見到有雪梨賣,
一份$10
都有5個咁多,一於今晚用黎煲湯喇!
但係今次唔想加埋蘋果一齊煲,
咁可以用咩煲呢
其實雪梨除左同蘋果一齊煲外,
用川貝都係一個唔錯的選擇黎架!
之前用栗子煲湯用剩半包,咁就加埋落去一齊煲!
但今次用咩肉煲好呢
又唔想用瘦肉,咁不如用排骨煲喇!
袁太覺得用排骨煲完湯出黎,d排骨好腍,好好味架!
不過唔知用川貝煲湯,袁生鐘唔鐘意呢?
因為川貝本身有少少苦!



~川貝雪梨栗子排骨湯~食譜

材料 : 川貝-$20 / 雪梨-3個 / 栗子-12粒 / 紅蘿蔔-1條 / 排骨-$20 / 蜜棗-2粒 / 南北行-少許 /
                               無花果-1粒 / 果皮-1小塊

做法:
1.排骨飛水,無花果用水浸軟.

2.果皮浸水後刮去瓤,備用.
3.川貝浸水,雪梨去皮去芯後切件,用水浸住,紅蘿蔔去皮切件.
 
4.煲內放入適量的水,凍水落蜜棗,南北行.

5.待滾後,加入栗子,排骨,無花果用大火煲30分鐘.
6.再加入川貝,紅蘿蔔,雪梨,果皮用大火煲30分鐘後,轉慢火煲1小時,下少許鹽調味,即可
.

功效:川貝-有清熱潤肺,止咳化痰的功效. 
                    雪梨-有清熱降火,潤肺去燥功效.  無花果-對喉痛好有功效.

                    

桂花魚肉豆腐蒸蛋白

袁生平時簡直超鐘意食桂花魚,

但今次唔想再用薑蔥蒸,

已經食到厭喇!

所以今次就將桂花魚起肉,

用蒸的方法黎煮,

再加埋豆腐,蛋白一齊蒸,


我諗味道應該唔錯,

不過最麻煩就係蒸蛋白的步驟,

平時袁太蒸蛋都整得麻麻地,

何況今次仲要蒸蛋白,

袁太好驚蒸得唔好,

浪費晒d桂花魚肉!

所以袁太決定打俾媽咪問下有冇咩辦法,

可以蒸到超滑的蛋白,

媽咪話最緊要係份量要控制得好,

同埋要用慢火蒸,

唔怪知得喇!

袁太平時係用中火蒸架!

唔怪得次次都蒸到好似火山口咁喇!

經過媽咪的貼士,

袁太今次蒸的蛋白簡直超滑,

連袁生都大讚,好開心呀!

成個人感覺飄飄然!



~桂花魚肉豆腐蒸蛋白~食譜

材料 : 桂花魚-1條 / 蒸煮滑豆腐孖裝-1盒 / 雞蛋-4隻 / 清雞湯(細)-1盒 /
                                青豆 , 水 - 適量        

                                            

 

1.豆腐切片後鋪上碟.
 
2.雞蛋白發勻,加入半盒雞湯,水,少許鹽,雞粉拌勻後,倒入步驟(1)內,用慢火隔水蒸約10分鐘.
3.桂花魚叫魚檔代為起肉後,洗淨切雙飛,用少許鹽,糖,雞粉略醃後,燒紅鑊將桂花魚肉落鑊炒熟後鋪上
   步驟(2)內再用慢火蒸約3分鐘.
4.再燒紅鑊,加入剩餘半盒雞湯,青豆,生粉水埋芡,淋上步驟(3)內,即可.

媽咪貼士:雞蛋白,雞湯,水的比例一定要1:1:1,同埋蒸蛋白一定要用慢火,蒸出黎的蛋白就會滑溜好多,不過
             切記唔好蒸過時,否則蛋白會變老.