咖哩花甲肉蟹煲

今日行過街市,見到有好多蟹賣,
諗住買番幾隻肉蟹番屋企慢慢嘆!
嘩...但係成$128/斤,好貴喎!
不過又唔係成日整,
冇所謂喇!
就買兩隻番去喇!
承惠$158,好肉痛,
不過冇計喇!鬼叫袁生鐘意食蟹咩!
再買埋花甲一齊煮,
加少許咖哩醬,簡直超好食!
最緊要係肉蟹啖啖肉,一流~~



~咖哩花甲肉蟹煲~食譜

材料 : 肉蟹-2隻 / 花甲-半斤 / 薑絲 , 蔥 - 適量 / 咖哩醬-2湯匙

 

1.蟹洗淨斬件,瀝乾水,花甲洗淨,用水浸住,備用.
2.燒紅鑊,爆香薑絲,蔥段後,加入蟹炒至轉色後,贊酒,加適量的水,咖哩醬,蓋上炆一陣.
 
3.加入花甲,少許生抽,糖,鹽調味,蓋上炆至花甲開殼.
4.燒熱瓦煲,將所有材料放入煲內,待煲後加入蔥段,即可.