2013年6月7日 星期五

泰美味了... <附泰式肉碎生菜包食譜>

炎熱天氣之下又係唔想煮飯的日子,又或者平時放工太夜,梗本冇咩時間俾我諗煮咩餸好,雖然話好又一餐,唔好又一餐,但始終都覺得煮飯好過叫外賣,何況我發覺袁生最近好鐘意我煮飯,以前當我放工夜,袁生一定叫我唔好煮,求其買D食物回來吃就算,唔通我而家的廚藝進步得太多,令到一向喜愛出街食的袁生都喜愛回家吃飯的時候

我會唔會太高估左自己呢 ??? 嘻 ... 嘻 ...

好喇,每當天氣熱的時候,我都鐘意食酸酸地辣辣地的食物,可能覺得會開胃D,所以泰式料理永遠係我夏天的首選,今次就整左生菜包,用泰式香料烹調,再加上至愛的辣椒

真係"泰"好味了


不過我最擔心係袁生唔鐘意食,因為以前袁生講過用生菜包住黎食好麻煩喎,其實我覺得佢係包得冇技巧,所以D餡料成日都跌晒出黎,唉 ... 所以我呢個老婆為左袁生食得方便,所以就親自包俾袁生食,有時都要扮下恩愛先得 !



泰式肉碎生菜包
材料 : 豬肉碎<$20>,金不換葉<6片>,檸檬葉<2片>,青檸汁<1個>,辣椒<1隻>,蒜蓉,乾蔥蓉<適量>,唐生菜<1斤>
醃料 : 魚露,生抽,糖,胡椒粉,水<適量>


做法 :
1. 豬肉碎加入醃料醃1小時,生菜洗淨瀝乾水份備用

2. 金不換同檸檬葉洗淨切碎

3. 燒紅鑊,爆香蒜蓉及乾蔥蓉,加入豬肉碎炒香,再加入金不換,檸檬葉及辣椒兜勻

4. 熄火加入青檸汁拌勻即可




8 則留言:

  1. 早前我也整了二次,好醒胃又有菜食
    [版主回覆06/09/2013 12:55:02]夏天食真係唔錯架!

    回覆刪除
  2. 寧靜中的不寧靜2013年6月7日 上午6:39

    我都覺太麻煩...因為真係好易趺哂出黎......包細細個, 一口一個就最好.....哈哈
    [寧靜中的不寧靜回覆06/10/2013 06:37:01]一百萬個怕麻煩,,,,,
    [版主回覆06/09/2013 12:55:42]原來妳都係一個驚麻煩的人黎既

    回覆刪除
  3. 超簡單又容易弄,一定很好吃! 很好的分享喲, thank you. ♡♡♡
    我也寫了一篇 Motives 美妝party的文章, 你也可看看喲。 ♣ ♣
    [版主回覆06/09/2013 12:56:27]唔好客氣,我一定會去參選妳個blog

    回覆刪除
  4. 呢個好味呀 !
    [版主回覆06/09/2013 12:56:52]酸酸辣辣,好開胃!

    回覆刪除
  5. 我食生菜包會食到周圍都係,跌曬出黎
    [版主回覆06/11/2013 22:14:32]原來妳同袁生都一樣既

    回覆刪除
  6. 我會加D豪士粒吊味.
    [阿黃送金桔回覆06/11/2013 22:18:00]你試試. 太咸要先浸水.
    [版主回覆06/11/2013 22:15:16]加蠔豉粒會唔會好怪架?

    回覆刪除
  7. 我家大老爺都好鐘意呢味餸, 等我又煮唻冧下佢先
    [版主回覆06/11/2013 22:16:46]希望妳家大老爺喜歡喇!

    回覆刪除
  8. 好正呀, 一定要試下整!!
    [版主回覆07/02/2013 21:00:04]快d試下喇!

    回覆刪除