榨菜肉絲上海麵

之前係Blogger cici小廚房見到雪菜肉絲上海麵的文章

令袁太心思思想食上海麵

計計下都有好幾個月冇食呢 , 上海麵簡直係我至愛

不過可惜袁生唔食 , 所以唯有等 ... 等 ... 等 ...



等到袁生唔回家食飯的一日 , 我就可以食上海麵喇

~哈~ 終於俾我等到了

袁生上星期五有飯局 , 只有袁太一人在家

開心地去街市買材料

整期待而久的榨菜肉絲上海麵



雖然只係一碗平平無奇的麵

但由湯底到肉絲我都十分講究呢

當然喇 , 等左咁耐先可以煮 , 當然要用無限心思煮好佢



何況一人在家唔駃俾袁生煩住

可以好安心煮 , 慢慢煮 ^^

 

材料有榨菜絲 , 肉絲 , 乾蔥頭 , 辣椒 , 蔥段 , 上海麵 (粗) , 雞骨 , 西芹 

首先將乾蔥頭切絲 , 放入油鑊中 (下3湯匙油) 用慢火慢慢炸至金黃色 (約5分鐘) , 盛起乾蔥絲 , 炸乾蔥的油盛起留用

肉絲加入醃料拌勻醃30分鐘 , 煲內加入適量水 , 放入雞骨煮滾 , 西芹去纖維後切條 , 乾蔥頭切件放入鑊中爆香 , 加入雞骨湯內用中火煲30分鐘 , 轉慢火煲 1 1/2小時成雞湯底

燒紅鑊 , 爆香辣椒及蔥段 , 加入肉絲炒至轉色 , 再加入榨菜拌勻炒至肉絲熟透盛起

上海麵放入水中煮至熟透 , 盛起放入水中過冷河 , 再盛起放入大碗內 , 再加入自製雞湯底

放上榨菜肉絲 , 炸香的乾蔥絲 , 最後淋上炸乾蔥絲的油 , 完成 ~~~

材料
上海麵(粗)1個 , 榨菜絲 , 肉絲 , 乾蔥頭 , 辣椒 , 西芹 , 雞骨半隻

醃料
生抽 , 糖 , 生粉 , 麻油 , 胡椒粉 ,水



做法
1. 將乾蔥頭切絲 , 放入油鑊中 (下3湯匙油) 用慢火慢慢炸至金黃色 (約5分鐘) , 盛起乾蔥絲 , 炸乾蔥的油盛起留用

2. 肉絲加入醃料拌勻醃30分鐘

3. 煲內加入適量水 , 放入雞骨煮滾 , 西芹去纖維後切條 , 乾蔥頭切件放入鑊中爆香 , 加入雞骨湯內用中火煲30分鐘 , 轉慢火煲 1 1/2小時成雞湯底

4. 燒紅鑊 , 爆香辣椒及蔥段 , 加入肉絲炒至轉色 , 再加入榨菜拌勻炒至肉絲熟透盛起

5. 上海麵放入水中煮至熟透 , 盛起放入水中過冷河

6. 盛起放入大碗內 , 再加入自製雞湯底

7. 放上榨菜肉絲 , 炸香的乾蔥絲 , 最後淋上炸乾蔥絲的油即可 

好滿足的大碗麵 ^^