韓式牛肉茄子卷

呢兩日天氣又凍番 , 又想食辣野添

幸好雪櫃還有韓國辣椒醬 , 一於又來韓式食物做晚餐

~哈~ 韓式食物永遠係我至愛

真係百食不厭呢 ......



韓式食物裡面我最愛係泡菜炒豬肉 , 同埋炒牛肉

問問袁生意見後 , 決定用牛肉炒

簡簡單單用辣椒醬醃 , 再加洋蔥一起炒

其實簡單一碟洋蔥牛肉已經好好送飯

但想起睇韓劇或韓國飲食節目時

韓國人好喜愛用菜包住肉來吃

等於我們平時食的生菜包差不多

如果用生菜包住剛剛炒起的牛肉一起食的話

我相信一定超美味呢 



所以快快手買多棵生菜回家

但當去街市買菜期間 , 聽到一位相信係嫁來香港的韓國人太太

話用煎過的茄子包住肉類或海鮮都相當美味

茄子 ???

心想煎完已經油淋淋 , 仲要包住肉一起食

會唔會有點兒怪怪呢 ???

但又想試試喎



之但係如果開飯時候叫袁生夾起塊茄子

再放生菜及牛肉先可以食

我相信佢會寧願唔食

所以袁太就預先用芹菜絲綁起 , 咁食的時候就方便好多呢 ^^



材料 : 火鍋牛肉片 , 洋蔥 , 茄子 , 生菜 , 芹菜 (莖及葉分開處理) , 雞蛋 , 蒜頭 , 麵粉 , 韓國辣椒醬

牛肉片加入醃料拌勻醃2小時 , 洋蔥切幼條 , 芹菜莖放入水中煮約5分鐘至軟身 , 盛起再撕成幼絲 , 生菜洗淨切細塊 , 芹菜菜洗淨備用

茄子洗淨切片 , 每塊分別沾上麵粉 >> 雞蛋液 , 放入鑊中用中慢火慢慢煎至兩面金黃色及軟身 , 盛起放在廚紙上吸取過多油份

燒紅鑊 , 加入牛肉炒至半熟時 , 再加入洋蔥拌勻炒至牛肉熟透 , 洋蔥軟身後盛起

將一片茄子放上生菜 , 再放上洋蔥辣牛肉 , 將茄子對摺起起後用芹菜絲綁好放上碟 , 最後灑上芹菜葉即可

材料
火鍋牛肉片 , 洋蔥1個 , 茄子1條 , 生菜 , 芹菜 (莖及葉分開處理) , 雞蛋2隻

醃料
韓國辣椒醬1茶匙 , 生抽2湯匙 , 糖 , 蒜蓉 , 生粉 , 麻油



做法
1. 牛肉片加入醃料拌勻醃2小時 , 洋蔥切幼條

2. 芹菜莖放入水中煮約5分鐘至軟身 , 盛起再撕成幼絲

3. 生菜洗淨切細塊 , 芹菜菜洗淨備用

4. 茄子洗淨切片 , 每塊分別沾上麵粉 >> 雞蛋液

5. 放入鑊中用中慢火慢慢煎至兩面金黃色及軟身 , 盛起放在廚紙上吸取過多油份 

6. 燒紅鑊 , 加入牛肉炒至半熟時

7. 再加入洋蔥拌勻炒至牛肉熟透 , 洋蔥軟身後盛起 

8. 將一片茄子放上生菜 , 再放上洋蔥辣牛肉

9. 將茄子對摺起起後用芹菜絲綁好放上碟 , 最後灑上芹菜葉即可 




~哈~唔整唔知 , 唔食唔知 , 原來用茄子夾牛肉係好好味架 , 茄子煎完吸取油份後一d都唔油膩 , 就連袁生都話好味添 ^^