2016年6月2日 星期四

煎蛋蕃茄免治牛肉醬配長通粉




蕃茄免治牛肉呢樣食物係袁生最愛的西式菜式之一 , 每次用來整肉醬意粉 , 肉醬熱狗

佢都會食到 lam lam 脷 , 大家曾經有冇去過大大樂食過煎蛋免治牛肉飯呢 ???

記得袁生前幾年仲有打工仔的時候 , 公司附近得d小型食店同大大樂

佢幾乎每日同同事去大大樂都係食呢個飯 , 有時我都會問佢 , 究竟你食厭左未 ......



佢個答案居然係仲未食厭 , 仲話我問起佢 , 佢又想食喎 , 問我可唔可以整俾佢做晚餐

雖然我唔係咁鐘意食免治牛肉 , 不過又唔係非常抗拒 , 偶然食一餐都問題不大

煮呢個免治牛肉醬真係超簡單 , 爆香所有材料再加茄膏 , 雞湯同水煮



呢個雞湯又係袁太自己煲架 , 而家我已經好少用現成雞湯 , 閒時用雞殼煲定一煲大雞湯

用來浸菜 , 炒米粉樣樣得 , 自家製的雞湯一定無添加又健康 , 絕無防腐劑呢



呢個蕃茄免治牛肉用來拌飯拌意粉 , 甚至用來做肉醬熱狗都得 , 起初袁生想用來配飯

不過見廚房有長通粉 , 就即時轉話唔配飯配通粉喎 , 最衰屋企冇芝士碎 , 如果有芝士碎

加係肉醬上面一定仲好味 , 另外煎蛋一定要蛋黃半生熟狀態

當蛋黃流出拌肉醬通粉一齊食 , 真係好鬼正 , 整左大大碟份量俾袁生佢都話唔夠食

仲問我廚房仲有冇 , 冇喇 , 已經冇喇 , 係咪要將我個份俾埋你先夠呢 ^^ 



材料 : 牛肉碎 , 蕃茄 , 洋蔥 , 茄膏 , 雞湯 , 雞蛋 , 鹽 , 胡椒粉 , 黑胡椒碎 , 芹菜




牛肉碎放入大碗內加少許鹽 , 胡椒粉及黑胡椒拌勻醃30分鐘 , 蕃茄洗淨切粒 , 洋蔥去皮切細粒 , 將芹菜莖洗淨切細粒









煲內加入少許油燒熱 , 放入蕃茄 , 芹菜 , 洋蔥用中火拌勻炒至出茄油 , 再加入牛肉碎拌勻炒至轉色









加入2湯匙茄膏拌勻 , 再加入雞湯及3碗份量水拌勻 , 用中火煮滾後蓋上蓋轉慢火煮1小時














期間如發現水份收乾 , 再加入水拌勻蓋上蓋繼續用慢火煮 (以防黏底)







1小時後加入少許黑胡椒碎拌勻調味 , 熄火蓋上蓋焗30分鐘成免治牛肉醬備用









將雞蛋打出放入鑊或煎pan中用慢火煎成半生熟蛋 , 長通粉放入水中煮至軟身 , 盛起隔去水份放上碟或碗內 , 再淋上肉醬即可











材料 
牛肉碎200g , 蕃茄2個 , 洋蔥1個 , 茄膏2湯匙 , 雞湯1杯 , 雞蛋 , 鹽 , 胡椒粉 , 黑胡椒碎 , 芹菜



做法
1. 牛肉碎放入大碗內加少許鹽 , 胡椒粉及黑胡椒拌勻醃30分鐘 

2. 蕃茄洗淨切粒 , 洋蔥去皮切細粒 , 將芹菜莖洗淨切細粒 , 芹菜葉留起作裝飾

3. 煲內加入少許油燒熱 , 放入蕃茄 , 芹菜 , 洋蔥用中火拌勻炒至出茄油

4. 再加入牛肉碎拌勻炒至轉色

5. 加入2湯匙茄膏拌勻 , 再加入雞湯及3碗份量水拌勻

6. 用中火煮滾後蓋上蓋轉慢火煮1小時

7. 期間如發現水份收乾 , 再加入水拌勻蓋上蓋繼續用慢火煮 (以防黏底)

8. 1小時後加入少許黑胡椒碎拌勻調味

9. 熄火蓋上蓋焗30分鐘成免治牛肉醬備用  

10. 將雞蛋打出放入鑊或煎pan中用慢火煎成半生熟蛋

11. 長通粉放入水中煮至軟身 , 盛起隔去水份放上碟或碗內 , 再淋上肉醬即可 




呢款免治牛肉醬無論配白飯 , 意粉或通粉 , 蝴蝶粉都同樣美味呢 ^^


22 則留言:

  1. 我以前讀書午飯時時食這個呢.

    回覆刪除
  2. 我鐘意用肉醬來配意粉

    回覆刪除
  3. 自家製原來唔困難,等我記低個食譜先

    回覆刪除
  4. 回覆
    1. 袁生都好鐘意食,佢仲百食不厭添架

      刪除
  5. 份量就係唔夠巨喎!袁生一定勁到喉唔到肺..haha

    回覆刪除
  6. 回覆
    1. 我就反而麻麻地呢,最主要都係整俾袁生食

      刪除
  7. 我係快餐店都好鐘意食呢個

    回覆刪除
  8. 見到呢個,真係令人諗起快餐店嘅場面

    回覆刪除
  9. 自家製好足料,好味道呀

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......