2016年12月8日 星期四

清燉牛尾湯





平時見超市有靚靚的急凍牛尾 , 袁太必然會買定幾包放雪櫃存貨 , 想煮的時候 , 拎出黎解一解凍就煮得 , 本應想用來炆 , 不過袁生又話想飲牛尾湯喎 , 仲要求要中式的牛尾湯 , 唔要用蕃茄煲 , 真係麻Q煩 ...... 



~清燉牛尾湯~ , 袁太知牛肉或牛尾湯都係一道補身的湯水 , 因牛肉可以健脾 , 補氣血的功效 ,不同體質的朋友仔都可以用來強身健體 , 特別對~久病體虛~ , ~中氣下陷~ , ~氣短~ , ~唇白~ , ~面色發黃 (袁太)~ , ~容易腹瀉 (袁生)~及~手足冰冷 (袁生)~的人 , 如果加埋紅棗一齊煲 , 仲能~補中益氣~ , ~助肌生長並促進傷口癒合~添 , 不過袁太今次就冇加入紅棗 



呢款湯水煲好後湯頭仍然非常清晰 , 但味道絕對唔淡 , 有好香的牛肉香味 , 如果大家喜歡既可以加入白飯變成湯飯 , 又或者加個麵用來做成牛肉湯麵都得 , 而且袁生一向都好鐘意食牛尾 , 呢個湯完全啱晒佢口味 , 如果大家唔想用牛尾 , 轉用牛展都可以



煲好的湯渣盛起掉左又好似好浪費 , 留起西芹同甘旬下次用來煮餸 , 咁就唔會浪費d冇人食但有好味的湯渣呢 ^^



材料 : 急凍牛尾 , 西芹 , 甘旬 , 蘋果 , 洋蔥 , 月桂葉 , 蔥 , 黑胡椒粒 , 鹽 , 胡椒粉 , 薑




牛尾放入大碗內 , 加水浸過面靜待15分鐘 , 倒去水份後再加水浸過面15分鐘 , 瀝乾水份










牛尾放入水中蓋上蓋用中火出水10分鐘 , 盛起沖一沖洗及瀝乾 , 薑去皮切絲 , 蔥切段及切粒









煲內放入牛尾 , 薑絲及蔥段 , 加入適量水用中火煲滾 , 蓋上蓋繼續用中火先煲30分鐘














 

期間將西芹去纖維 , 甘旬去皮 , 洋蔥去皮 , 西芹切段 , 甘旬切厚片 , 西芹及甘旬用水沖一沖洗及瀝乾 , 蘋果洗淨去芯切件










湯煲30分鐘後將薑絲及蔥段戒起去掉 , 逐一加入西芹 , 甘旬 , 蘋果 , 月桂葉及黑胡椒粒拌勻 , 用中火煲滾 , 蓋上蓋轉慢火煲1 1/2小時 , 期間將洋蔥切幼絲














煲1 1/2小時後將湯裡的湯渣盛起 (只留牛尾 , 月桂葉及黑胡椒粒係湯入面) , 加入洋蔥拌勻轉用中火煮至大滾, 熄火蓋上蓋焗30分鐘 , 最後加少許鹽調味拌勻再煲滾 , 將湯連牛尾放入碗內 , 灑上蔥粒即可



















材料
急凍牛尾400g , 西芹 , 甘旬1條 , 蘋果2個 , 洋蔥1個 , 月桂葉3片 , 蔥 , 黑胡椒粒 , 鹽 , 胡椒粉 , 薑



做法
1. 牛尾放入大碗內 , 加水浸過面靜待15分鐘 , 倒去水份後再加水浸過面15分鐘

2. 瀝乾水份

3. 牛尾放入水中蓋上蓋用中火出水10分鐘 , 盛起沖一沖洗及瀝乾

4. 薑去皮切絲 , 蔥切段及切粒

5. 煲內放入牛尾 , 薑絲及蔥段 , 加入適量水用中火煲滾 , 蓋上蓋繼續用中火先煲30分鐘 

6. 期間將西芹去纖維 , 甘旬去皮 , 洋蔥去皮 , 西芹切段 , 甘旬切厚片

7. 西芹及甘旬用水沖一沖洗及瀝乾 , 蘋果洗淨去芯切件 

8. 湯煲30分鐘後將薑絲及蔥段戒起去掉

9. 逐一加入西芹 , 甘旬 , 蘋果 , 月桂葉及黑胡椒粒拌勻

10. 用中火煲滾 , 蓋上蓋轉慢火煲1 1/2小時 , 期間將洋蔥切幼絲

11. 煲1 1/2小時後將湯裡的湯渣盛起 (只留牛尾 , 月桂葉及黑胡椒粒係湯入面)

12. 加入洋蔥拌勻轉用中火煮至大滾, 熄火蓋上蓋焗30分鐘

13. 最後加少許鹽調味拌勻再煲滾 , 將湯連牛尾放入碗內 , 灑上蔥粒即可

 


牛尾湯的顏色非常清晰 , 飲落仲有濃郁的牛肉味 , 超正又有益 , 盛起的西芹同甘旬放入雪櫃 , 留番下次用來煮餸呢 ^^




16 則留言: