2017年6月5日 星期一

西柚蜜焗豬扒




袁太最近做左慘慘豬 , 因為之前腰的舊患復發 , 久唔久就要去醫院覆診 , 打止痛針 , 做治療 , 感覺身體慢慢開始響起警號 , 有時令自己唔好想太多 , 盡量煮野麻醉自己 , 盡量控制自己的情緒 ......



亦由於腰患的關係 , 醫生下令袁太肉類方面 , 除左豬之外 , 雞 ~~ 牛 ~~ 羊 ~~ 鴨 ~~ 鵝統統都唔食得 , 所以袁太廚房的肉類食譜 , 暫時都會得豬的出現 , 希望大家唔好介意



其實豬 , 我最愛係腩肉同豬扒 , 前幾日係大型連鎖急凍店買左幾塊有骨豬扒 , 本應只想醃好再乾煎或做吉列 , 不過打開雪櫃的時候發現有樽西柚蜜 , 呢樽西柚蜜係袁生之前係尖沙咀 , 韓國街個度買既 , 平時袁生好鐘意食西柚或者飲呢類型的飲品 , 不過買左回來咁耐 , 都從未見佢開過 , 咁就由我去開封 , 當佢係柚子蜜咁用黎整豬扒 , 今次就將豬扒煎完再焗 , 酸酸甜甜好開胃呢 ^^



材料 : 有骨豬扒 , 西柚蜜 , 酒 , 胡椒粉 , 魚露 , 鹽 , 糖 , 生粉 , 錫紙




有骨豬扒洗淨抹乾水份 , 放入器皿內加入醃料拌勻 , 蓋上保鮮紙靜待1小時












焗爐用200C預熱10分鐘 , 西柚蜜中的西柚切碎 , 燒紅鑊 , 將豬扒放入鑊中用慢火慢慢煎至表面轉色 , 期間焗盤放上錫紙 , 將煎豬扒放上 , 再蓋上錫紙封口












將豬扒放入焗爐用200C上下火先焗15分鐘 , 取出除去錫紙 , 掃上西柚蜜 , 再放入焗爐轉用150C上火焗5分鐘 , 取出將豬扒反轉 , 再掃上西柚蜜 , 再放入焗爐用150C上火焗多5分鐘即可


















材料
有骨豬扒4塊 , 西柚蜜 , 酒 , 胡椒粉 , 魚露 , 鹽 , 糖 , 生粉 , 錫紙 

醃料
魚露 , 生抽 , 老抽 , 鹽 , 糖 , 生粉 , 胡椒粉 , 酒




做法
1. 有骨豬扒洗淨抹乾水份 , 放入器皿內加入醃料拌勻 , 蓋上保鮮紙靜待1小時

2. 焗爐用200C預熱10分鐘 

3. 西柚蜜中的西柚切碎 

4. 燒紅鑊 , 將豬扒放入鑊中用慢火慢慢煎至表面轉色 

5. 期間焗盤放上錫紙 , 將煎豬扒放上 , 再蓋上錫紙封口

6. 將豬扒放入焗爐用200C上下火先焗15分鐘 

7. 取出除去錫紙 , 掃上西柚蜜 , 再放入焗爐轉用150C上火焗5分鐘 

8. 取出將豬扒反轉 , 再掃上西柚蜜 , 再放入焗爐用150C上火焗多5分鐘即可 




豬扒配上西柚蜜絕對超好味 , 大家都可以試下用西柚來代替柚子來煮餸呢 ^^


  

16 則留言: