2017年9月1日 星期五

黑胡椒白蘿蔔炆金錢肚




話咁快暑假完結 , 又係同學仔開學的日子 , 9月1日除左開學日 , 仲係袁生袁太拍拖週年的日子 , 唔經唔覺一齊左18年 , 好佩服自己可以頂呢個男人18年咁耐 ^^ 唔知結左婚的Blog友仔 , 會唔會再慶祝咩拍拖週年或者情人節的浪費節日呢 ......



又或者當有特別要慶祝日子的時候 , 有冇為心愛的另一半 , 炮製一餐特別的晚餐 , 還是出外慶祝兼收花收禮物 ??? 我就好簡單 , 咩節日都會選擇在家過 , 其實節日對我來說 , 沒有什麼大意義 , 起初同袁生拍頭幾年拖都有花收有禮物收, 之但係我唔係一個喜歡收花的人 , 心總覺得既然買花送俾我 , 倒不如用來食好過 , 我就至鐘意食野 , 久而久之拍拖越耐 , 就沒有想過再慶祝拍拖週年 , 何況都結左婚七年 , 浪漫呢樣野唔太適合我地 , 浪漫呢樣野對我地已經越來越遠



所以近好多年的節日都簡簡單單煮個飯 , 過平日冇咩分別的晚餐 , 特別的節日唔一定要煮西餐或煎牛扒 , 只要煮另一半喜歡的食物 , 他一樣會覺得好窩心



今次簡單煮個金錢肚 , 我家袁生好愛食 , 係呢邊街市唔係常見有得賣 , 所以有時見有得賣就會買定一包回家 , 再配上白蘿蔔炆 , 味道清清地 , 金錢肚亦炆得好腍身 , 袁太仲加左黑胡椒粒一齊煮 , 夠惹味呢 ^^



材料 : 急凍金錢肚 , 白蘿蔔 , 黑胡椒粒 , 西生菜 , 薑 , 蔥 , 蒜頭 , 乾蔥頭 , 八角 , 月桂葉 , 冰糖 , 上湯 , 水


  
 
薑去皮切片 , 蒜頭去衣切粒 , 乾蔥頭去衣拍扁 , 蔥一半切段 , 一半切粒 , 鑊中加入薑片 , 蔥段 , 水及金錢肚 , 蓋上蓋用中火出水10分鐘 , 盛起用水沖一沖洗及瀝乾








燒紅鑊 , 爆香蒜粒 , 乾蔥頭及黑胡椒粒 , 加入金錢肚(原塊)拌炒數分鐘 , 加入上湯 , 約5碗份量水 , 八角 , 月桂葉及冰糖拌勻 , 用中火煮滾後蓋上蓋轉慢火炆1小時 , 炆金錢肚期間將白蘿蔔去皮切件 , 西生菜切塊用水沖一沖洗及瀝乾備用





















1小時後加入白蘿蔔拌勻蓋上蓋繼續用慢火炆30分鐘 , 再炆30分鐘後將金錢肚盛起切件 , 回鑊拌勻後蓋上蓋焗1小時 , 西生菜放入煲內用慢火灼熟先放入碗內 , 最後將蘿蔔金錢肚翻熱放入有西生菜的碗內 , 再灑上蔥粒即可


















 
 


材料
急凍金錢肚三塊 , 白蘿蔔1條 , 黑胡椒粒 , 西生菜1個 , 薑 , 蔥 , 蒜頭1/2個 , 乾蔥頭3粒 , 八角2粒 , 月桂葉 , 冰糖2粒 , 上湯1杯 , 水5杯



做法
1. 薑去皮切片 , 蒜頭去衣切粒 , 乾蔥頭去衣拍扁 , 蔥一半切段 , 一半切粒 

2. 鑊中加入薑片 , 蔥段 , 水及金錢肚 , 蓋上蓋用中火出水10分鐘 

3. 盛起用水沖一沖洗及瀝乾

4. 燒紅鑊 , 爆香蒜粒 , 乾蔥頭及黑胡椒粒 , 加入金錢肚(原塊)拌炒數分鐘 

5. 加入上湯 , 約5碗份量水 , 八角 , 月桂葉及冰糖拌勻 

6. 用中火煮滾後蓋上蓋轉慢火炆1小時

7. 炆金錢肚期間將白蘿蔔去皮切件 , 西生菜切塊用水沖一沖洗及瀝乾備用

8. 1小時後加入白蘿蔔拌勻蓋上蓋繼續用慢火炆30分鐘 

9. 再炆30分鐘後將金錢肚盛起切件 

10. 回鑊拌勻後蓋上蓋焗1小時 

11. 西生菜放入煲內用慢火灼熟先放入碗內 , 最後將蘿蔔金錢肚翻熱放入有西生菜的碗內 

12. 再灑上蔥粒即可 




金錢肚我就麻麻地 , 何況我而家都唔食得 , 但蘿蔔就入晒味呢 ^^





 


食剩的蘿蔔金錢肚放入雪櫃一晚 , 翌日簡單加入河粉及幾塊炸魚皮又一餐 ^^




21 則留言:

  1. 回覆
    1. 我都一向鐘意食,不過而家唔食得喇

      刪除
  2. 我鍾意食呀!
    袁生袁太拍拖咁多年先結婚,真係愛情長跑。

    回覆刪除
    回覆
    1. 係呀,所以我都好佩服自己可以頂袁生咁耐

      刪除
  3. 我都中意食金錢肚,但驚好難整,但袁太教完覺得都OK喎~~下次要試~~

    回覆刪除
  4. 用黑胡椒蘿蔔炆金錢肚,只見材料都知好味道呢

    回覆刪除
  5. 金錢肚我鐘意食,去酒樓必食

    回覆刪除
  6. 白蘿蔔,金錢肚我兩款都食,不過黑胡椒就……

    回覆刪除
  7. Otherwise just sit on the floor there and press the paper cup to your ear and cover your other ear with your other hand -this will help you listen. https://imgur.com/a/yAdg8H9 https://imgur.com/a/OtyzqBn https://imgur.com/a/0Q5gJcV https://imgur.com/a/KZhYBdi https://imgur.com/a/osqpPSj https://imgur.com/a/idnJHnu https://imgur.com/a/ttxULZl

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......