惹味韓式醬焗金沙骨

自從之前係佳寶買到靚靚的金沙骨 , 啖啖肉好味到暈之後 , 久唔久我就會再去睇下再有冇靚靚的金沙骨賣 , 無意中某日去有見到剛剛開箱的金沙骨 , 又係靚到無朋友 , 買下買下就買左四磅回家 , 之前用剩ddd放左係冰箱 , 不過今次唔煎 , 轉用焗的方法去烹調 ......



而且仲係用袁太最愛的韓式系列製作 , 好簡單地係日式超市買左樽韓式醃肉汁 , 再加上奇異果及其他醃料放入雪櫃醃一晚 , 等金沙骨入晒味之間 , 翌日先再放入焗爐焗至金黃 



金沙骨焗的期間 , 不停掃上醃料醬及蜜糖水 , 當焗至每條金沙骨金金黃黃之後 , 再灑上黑芝麻粒 , 呢個焗金沙骨辣辣地又甜甜地 , 無論用來當小菜 , 派對小食或送酒小食都好適合 , 今次只係用左雪櫃的餘貨製作 , 份量唔多 , 之前就俾左袁生做宵夜配啤酒睇世界盃呢 ^^



材料 : 金沙骨 , 蜜糖 , 蒜頭 , 乾蔥頭 , 韓式醃肉醬 , 金奇異果 , 薑 , 錫紙 , 酒 , 掃 , 糖 , 黑芝麻

金沙骨用水沖洗再抹乾水份 , 薑磨成薑汁 , 金奇異果去皮切粒 , 蒜頭去衣拍扁 , 乾蔥頭去衣切片 , 金沙骨放入器皿內加入韓式醃肉醬 , 酒 , 薑汁及糖拌勻先靜待10分鐘 , 再加入蒜頭 , 乾蔥頭片及奇異果粒拌勻 , 蓋上保鮮紙入雪櫃靜待一晚

 

翌日將金沙骨放回室溫靜待30分鐘 , 期間將焗爐用220C預熱10分鐘 , 焗盤放上錫紙 , 放上金沙骨 , 再用另一張錫紙蓋上 , 放入焗爐用200C上下火焗20分鐘 , 期間將醃金沙骨的醬料盛起

焗20分鐘後將錫紙取走 , 掃上醃醬料入焗爐轉用180C上火焗10分鐘 , 取出反轉另一面 , 再掃上醃醬料入焗爐再用180C上火焗10分鐘 , 每面再掃上蜜糖轉用150C上火焗5分鐘 , 最後灑上黑芝麻靜待10分鐘即可

材料 
金沙骨10條 , 蜜糖2湯匙 , 蒜頭1/2個 , 乾蔥頭2粒 , 韓式醃肉醬2湯匙 , 金奇異果2個 , 薑 , 錫紙 , 酒 , 掃 , 糖 , 黑芝麻



做法
1. 金沙骨用水沖洗再抹乾水份 

2. 薑磨成薑汁 , 金奇異果去皮切粒 , 蒜頭去衣拍扁 , 乾蔥頭去衣切片

3. 金沙骨放入器皿內加入韓式醃肉醬 , 酒 , 薑汁及糖拌勻先靜待10分鐘 

4. 再加入蒜頭 , 乾蔥頭片及奇異果粒拌勻 

5. 蓋上保鮮紙入雪櫃靜待一晚

6. 翌日將金沙骨放回室溫靜待30分鐘 

7. 期間將焗爐用220C預熱10分鐘 

8. 焗盤放上錫紙 , 放上金沙骨 , 再用另一張錫紙蓋上 , 放入焗爐用200C上下火焗20分鐘 

9. 期間將醃金沙骨的醬料盛起 

10. 焗20分鐘後將錫紙取走 

11. 掃上醃醬料入焗爐轉用180C上火焗10分鐘 

12. 取出反轉另一面 , 再掃上醃醬料入焗爐再用180C上火焗10分鐘 

13. 每面再掃上蜜糖轉用150C上火焗5分鐘 

14. 最後灑上黑芝麻靜待10分鐘即可

 



香噴噴熱辣辣的焗金沙骨 , 來一客啤酒啤啤佢一流呢 ^^