豬扒菜飯

大家都知 , 平時袁生對於晚餐的要求 , 會好少俾意見我 , 例牌都係"是但喇"個句 , 或者由袁太發辦盡量煮袁生鐘意食既野 , 但突然袁生同我講 , 佢好想食菜飯喎 ......

我知袁生為何突然想食菜飯 ??? 好簡單 , 因為菜飯大多數都係用小棠菜來煮 , 我家袁生就最愛食小棠菜 , 反而我就唔太鐘意食小棠菜 , 因總覺小棠菜味道怪怪的 , 之但係如果用來做菜飯我又覺得幾好味 , 另外其實袁太有疑問 , 菜飯係咪一定要配排骨或豬扒呢 ??? 因每次在街外食既菜飯套餐多數都係配排骨或豬扒 , 咁我就唔理咁多 , 一於死跟 , 何況冰箱見有好多塊梅頭豬扒肉 , 就換醒它們用來煮吧



街外食既一般都係上粉炸 , 不過最近感覺熱氣左少少 , 都係簡單醃好塊豬扒 , 再入鑊煎就算 , 雖然最後的製成品同出面街既樣貌有好大分別 , 不過啱自己口味就可以喇 , 何況我同袁生都覺得簡單的煎豬扒配上簡單的菜飯 , 都同樣地夾呢 ^^



材料 : 梅頭豬扒肉 , 小棠菜 , 蒜頭 , 乾蔥頭 , 白米 , 薑 , 酒 , 鹽 , 糖 , 魚露 , 胡椒粉 , 辣椒 , 上湯 , 蔥

豬扒用刀背拍一拍鬆兩面 , 切件後放入器皿內 , 加入醃料拌勻靜待1小時 , 小棠菜加少許鹽 , 再加水浸過面靜待10分鐘後切碎 , 用水沖一沖洗及瀝乾 , 蔥洗淨切粒 , 蒜頭去衣拍扁 , 乾蔥頭去衣切片 , 辣椒切粒 , 薑去皮磨成薑汁 , 白米用水沖洗及瀝乾

 

鑊中加入油燒熱 , 蒜頭 , 乾蔥頭落鑊爆香至油有蒜香味 , 將蒜頭及乾蔥頭盛起 , 蒜香油盛起一半備用 , 盛起的蒜頭及乾蔥頭切碎 , 餘下鑊中的蒜油加入白米炒至乾身 , 加少許鹽及1杯份量上湯拌勻炒至上湯收乾 , 將白米轉放入飯煲內 , 再加入餘下一杯份量的上湯及水拌勻(上湯及水的份量至平時煮飯的水量即可) , 按製將飯煮熟 

小棠菜放入鑊中 , 加少許鹽及薑汁拌勻 , 蓋上蓋用慢火煮3分鐘至小棠菜軟身 , 飯煮熟後加入小棠菜拌勻成菜飯 , 之前留起的蒜香油入鑊燒熱 , 加入豬扒用中火煎至兩面金黃色 , 加入己切碎的蒜頭及乾蔥頭 , 加少許魚露調味拌勻 , 盛起放上碟灑上蔥粒及辣椒粒即可

 
材料
梅頭豬扒肉6塊 , 小棠菜1斤 , 蒜頭1/2個 , 乾蔥頭4粒 , 白米3杯 , 薑 , 酒 , 鹽 , 糖 , 魚露 , 胡椒粉 , 辣椒2隻 , 上湯300ml , 蔥


醃料
鹽 , 糖 , 生粉 , 魚露 , 酒 , 胡椒粉 , 生抽 , 老抽



做法
1. 豬扒用刀背拍一拍鬆兩面 

2.  切件後放入器皿內 , 加入醃料拌勻靜待1小時 

3. 小棠菜加少許鹽 , 再加水浸過面靜待10分鐘後切碎 , 用水沖一沖洗及瀝乾 

4. 蔥洗淨切粒 , 蒜頭去衣拍扁 , 乾蔥頭去衣切片 , 辣椒切粒 , 薑去皮磨成薑汁

5. 白米用水沖洗及瀝乾

6. 鑊中加入油燒熱 , 蒜頭 , 乾蔥頭落鑊爆香至油有蒜香味 

7. 將蒜頭及乾蔥頭盛起 , 蒜香油盛起一半備用 , 盛起的蒜頭及乾蔥頭切碎 

8. 餘下鑊中的蒜油加入白米炒至乾身 

9. 加少許鹽及1杯份量上湯拌勻炒至上湯收乾 

10. 將白米轉放入飯煲內 , 再加入餘下一杯份量的上湯及水拌勻
     (上湯及水的份量至平時煮飯的水量即可) 

11. 按製將飯煮熟 

12. 小棠菜放入鑊中 , 加少許鹽及薑汁拌勻 

13. 蓋上蓋用慢火煮3分鐘至小棠菜軟身

14. 飯煮熟後加入小棠菜拌勻成菜飯 

15. 之前留起的蒜香油入鑊燒熱 , 加入豬扒用中火煎至兩面金黃色

16. 加入己切碎的蒜頭及乾蔥頭 , 加少許魚露調味拌勻 

17. 盛起放上碟灑上蔥粒及辣椒粒即可 




用煎代替炸 , 豬扒仍然好香口 , 菜飯又好味 , 呢餐食得好滿足呢 ^^