吉列雞蛋豆腐魚肉三文治

大家有冇印象 , 上次袁太整滑滑水蛋時 , 見還有無糖豆漿剩 , 就整多一兜雞蛋豆腐 , 今日就同大家揭曉個兜雞蛋豆腐後來做左咩料理 , 咩美食 ......



袁太曾經講過 , 想自製雞蛋豆腐只需要用無糖豆漿同雞蛋就可以 , 豆漿其實除左可以整豆腐外 , 仲可以用來煲湯 , 整甜豆漿 , 鹹豆漿都得 , 好多用途架 , 不過講開雞蛋豆腐 , 其實只不過係玉子豆腐 , 我家袁生就至愛 , 袁生呢個怪人唔愛布包豆腐 , 唔愛板豆腐 , 亦唔愛豆乾 , 但唯一玉子豆腐 , 他就無任歡迎 , 多多都食得落 



其實睇開袁太廚房的朋友仔們 , 都應該知道袁生袁太係炸物怪 , 上次就簡單用來蒸水蛋 , 今次就將兜雞蛋豆腐待涼切成一片片扮方包 , 內餡用上生菜及魚肉 , 做到好似三文治咁 , 不過呢個唔係蛋治 , 唔係吞食魚治 , 而係豆腐魚肉三文治 , 不過豆腐比較滑 , 比較容易散 , 所以處理的時候要好小心呢 , 然後再沾上麵粉 , 雞蛋液及麵包糠做成吉列模樣 , 入冰箱雪至定型再放入鑊半煎炸 , ~哈~又係香口野來



見廚房還有半包黑芝麻 , 又係唔記得何時買落又未用完 , 加入麵包糠一起拌勻 , 再沾上豆腐落鑊炸 , 金金黃黃又黑色一點點 , 好靚靚 , 而且豆腐炸到外脆內軟滑 , 好味道 , 雖然功夫程序比簡單的魚肉煎豆腐多左少少步驟咁多多 , 但袁生喜愛這種食法 , 仲大讚袁太有心思 , 有創意呢 ^^



材料 : 無糖豆漿 , 雞蛋 , 唐生菜 , 鯪魚肉 , 黑芝麻 , 鹽 , 麵粉 , 麵包糠 , 胡椒粉 , 刀 , 隔篩

三隻雞蛋打入碗中 , 加入鹽及無糖豆漿拌勻 , 器皿放上保鮮紙 , 將豆漿蛋液用篩網隔去多餘泡沫及雜質 , 先放入蒸鍋內蓋上蓋蒸2分鐘 , 再蒸25分鐘 , 用筷子將鑊蓋留縫隙(可避免蒸出來的豆腐過老或變火山口) 

 

取出稍為待涼 , 切成一片片 , 蓋上保鮮紙入雪櫃靜待30分鐘 , 期間將鯪魚肉放入大碗內 , 加少許鹽 , 麻油 , 胡椒粉拌勻靜待30分鐘 

生菜洗淨撕成細塊 , 麵包糠 , 黑芝麻拌勻 , 餘下的兩隻雞蛋拌勻成蛋液 , 將生菜逐片逐片放在雞蛋豆腐上(只放一半份量在豆腐上) , 再放上鯪魚肉 , 再將一片雞蛋豆腐放上 , 用手輕輕壓平成三文治

將每件雞蛋豆腐三文治逐一沾上麵粉 >>蛋液 >> 黑芝麻麵包糠 , 放上碟後再灑上黑芝麻麵包糠 , 蓋上保鮮紙後入冰箱冷藏1小時 , 最後放入鑊中用慢火半煎炸慢慢煎至兩面金黃色即可

材料
無糖豆漿300ml , 雞蛋5隻 , 唐生菜 , 鯪魚肉$10 , 黑芝麻 , 鹽 , 麵粉 , 麵包糠 , 胡椒粉 , 刀 , 隔篩



做法
1. 三隻雞蛋打入碗中 , 加入鹽及無糖豆漿拌勻 

2. 器皿放上保鮮紙 , 將豆漿蛋液用篩網隔去多餘泡沫及雜質 

3. 先放入蒸鍋內蓋上蓋蒸2分鐘 

4. 再蒸25分鐘 , 用筷子將鑊蓋留縫隙(可避免蒸出來的豆腐過老或變火山口) 

5. 取出稍為待涼 , 切成一片片 , 蓋上保鮮紙入雪櫃靜待30分鐘

6. 期間將鯪魚肉放入大碗內 , 加少許鹽 , 麻油 , 胡椒粉拌勻靜待30分鐘  

7. 生菜洗淨撕成細塊 

8. 麵包糠 , 黑芝麻拌勻 , 餘下的兩隻雞蛋拌勻成蛋液 

9. 將生菜逐片逐片放在雞蛋豆腐上(只放一半份量在豆腐上) , 再放上鯪魚肉 

10. 再將一片雞蛋豆腐放上 , 用手輕輕壓平成三文治

11. 將每件雞蛋豆腐三文治逐一沾上麵粉 >>蛋液 >> 黑芝麻麵包糠

12. 放上碟後再灑上黑芝麻麵包糠 , 蓋上保鮮紙後入冰箱冷藏1小時 

13. 最後放入鑊中用慢火半煎炸慢慢煎至兩面金黃色即可 




要切開先可以清楚見到三文治的形狀 , 而且煎到金金黃黃 , 脆口又吸引呢 ^^